លោកស៊ិក ប៊ុនហុក សម្រេចលាឈប់ពីតំណែងជាប្រធានគ.ជ.ប ដោយសារបញ្ហាសុខភាព
គណៈកម្មាធិការអចិន្ត្រៃយ៍នៃរដ្ឋសភា នៅថ្ងៃព្រឹកថ្ងៃសុក្រទី ៤ខែមិថុនានេះ បានបើកកិច្ចប្រជុំសម្រេចលើពាក្យសុំលាឈប់ពីតំណែងប្រធានគណៈកម្មាធិការជាតិរៀបចំការបោះឆ្នោត (គ.ជ.ប) របស់លោកស៊ិក ប៊ុនហុក។ លោកស៊ិក ប៊ុនហុក វ័យ ៧៥ឆ្នាំ បានសម្រេចដាក់ពាក្យលាឈប់ ពីតំណែងប្រធានគ.ជ.ប ក្នុងសប្តាហ៍នេះ ដោយបញ្ហាសុខភាព។ នេះបើតាមការបញ្ជាក់ពីលោកឌឹម សុវណ្ណារ៉ុំ សមាជិក និងជាអ្នកនាំពាក្យគ.ជ.ប ប្រាប់វិទ្យុបារាំងនៅថ្ងៃសុក្រនេះ។ ក្រោយការលាឈប់នេះ រដ្ឋសភា នឹងរៀបចំនីតិវិធីដើម្បីជ្រើសរើសបេក្ខភាពជំនួសតំណែងលោកស៊ិក ប៊ុនហុក។
ចុះផ្សាយនៅថ្ងៃ៖
ស្តាប់ - ០២:០៥
លោកឌឹម សុណ្ណារ៉ុំ បានបញ្ជាក់ថា ដោយសារតែបញ្ហាសុខភាពផ្ទាល់ខ្លួន លោកស៊ិក ប៊ុនហុក ក៏សម្រេចដាក់ពាក្យលាឈប់ពីតំណែងជាប្រធានគ.ជ.ប ដោយខ្លួនលោក ដើម្បីសម្រាកព្យាបាល។ តាមលោក ឌឹម សុវណ្ណារ៉ុំ មុនពេលដែលរដ្ឋសភា អាចជ្រើសរើសអ្នកជំនួសតំណែងជាប្រធានគ.ជ.ប បាន គឺអនុប្រធានគ.ជ.ប ជាអ្នកកាន់ការងារជាប្រធានស្តីទីជំនួសលោកស៊ិក ប៊ុនហុក។
នៅក្នុងសម័យប្រជុំគណៈកម្មាធិការអចិន្ត្រៃយ៍នៃរដ្ឋសភា តាមប្រព័ន្ធវីដេអូ នៅថ្ងៃសុក្រទី ៤ខែមិថុនានេះ បានអនុម័តយល់ព្រមនូវពាក្យសុំលាឈប់ពីតួនាទី និងតំណែងប្រធានគ.ជ.ប របស់លោកស៊ិក ប៊ុនហុក។ អង្គប្រជុំ បានអនុម័តយល់ព្រមនូវសេចក្តីព្រាងសេចក្តីសម្រេច ស្តីពីការកំណត់បែបបទ និងនីតិវិធីនៃការជ្រើសរើសបេក្ខជន ប្រធានគ.ជ.ប និងប្រគល់ភារកិច្ច ជូនអគ្គលេខាធិការដ្ឋានរដ្ឋសភា ធ្វើសេចក្តីជូនដំណឹងជ្រើសរើសបេក្ខជន ហើយធ្វើរបាយការណ៍ជូនគណៈកម្មាធិការអចិន្ត្រៃយ៍រដ្ឋសភាវិញ។
អ្នកនាំពាក្យរដ្ឋសភា លោកឡេង ប៉េងឡុង បានប្រាប់អ្នកសារព័ត៌មាន ក្រោយបញ្ចប់កិច្ចប្រជុំថា តាមនីតិវិធី ការប្រកាសជ្រើសរើសបេក្ខជនប្រធានគ.ជ.ប ត្រូវធ្វើឡើងរយៈពេល ៥ថ្ងៃ ហើយតាមច្បាប់ គឺគណបក្សប្រជាជនកម្ពុជា ដែលឈ្នះឆ្នោត ជាអ្នកស្នើដាក់បេក្ខជន។ តាមរដ្ឋសភា បេក្ខជនដែលត្រូវជ្រើសរើស គឺត្រូវតែមានលក្ខណៈសម្បត្តិគ្រប់គ្រាន់ តាមសេចក្តីប្រកាស។
សូមរម្លឹកជូនថា លោក ស៊ិក ប៊ុនហុក ត្រូវបានរដ្ឋសភា បោះឆ្នោតតែងតាំងជាប្រធានគ.ជ.ប ក្រោយការស្រុះស្រួលនយោបាយរវាងគណបក្សប្រជាជនកម្ពុជា និងអតីតគណបក្សសង្គ្រោះជាតិ កាលពីអំឡុងខែមេសា ឆ្នាំ ២០១៥។ លោកស៊ិក ប៊ុនហុក បានកាន់ការងារជាប្រធានគ.ជ.ប តាំងពីឆ្នាំ ២០១៥ រហូតមកដល់បច្ចុប្បន្នជាមួយសមាសភាព ៨រូបទៀត។
ក្នុងរយៈពេលកាន់តំណែងជិត ៦ឆ្នាំមកនេះ លោកស៊ិក ប៊ុនហុក បានដឹកនាំគ.ជ.ប សម្រេចបានការរៀបចំការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៤ ឆ្នាំ២០១៧។ ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៤ ឆ្នាំ២០១៨។ ការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ និង ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៣ ឆ្នាំ២០១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ