ដើម្បីឲ្យអស់មន្ទិល រដ្ឋាភិបាលកម្ពុជាគ្រោងអនុញ្ញាតឲ្យអនុព័ន្ធយោធាអាមេរិកពិនិត្យមើលកំពង់ផែរាម
រដ្ឋាភិបាលកម្ពុជា នឹងអនុញ្ញាតឲ្យអនុព័ន្ធយោធាអាមេរិកប្រចាំនៅកម្ពុជា ចុះទៅពិនិត្យកំពង់ផែរាម ដើម្បីឲ្យអស់មន្ទិលសង្ស័យថាមានមូលដ្ឋានកងទ័ពចិននៅទីនោះ។ ការអនុញ្ញាតនេះ ត្រូវបានលោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិកម្ពុជា បង្ហើបប្រាប់កាសែតអនឡាញ Fresh News នៅព្រឹកថ្ងៃព្រហស្បតិ៍នេះ ថាមានសំណើរពីអនុរដ្ឋមន្ត្រីការបរទេសអាមេរិក ទៅកាន់លោកនាយករដ្ឋមន្ត្រី ហ៊ុន សែន កាលពីពេលថ្មីៗនេះ។
ចុះផ្សាយនៅថ្ងៃ៖
ស្តាប់ - ០២:២៤
ការអនុញ្ញាតឲ្យអនុព័ន្ធយោធាសហរដ្ឋអាមេរិកប្រចាំនៅកម្ពុជា ចុះទៅពិនិត្យមូលដ្ឋានកងទ័ពជើងទឹករាមរបស់កម្ពុជា គឺធ្វើឡើងក្រោយមានសំណើររបស់អនុរដ្ឋមន្ត្រីការបរទេសអាមេរិក លោកស្រី Wendy R. Sherman កាលពីថ្ងៃអង្គារ អំឡុងពេលលោកស្រីមានជំនួបផ្លូវការមួយជាមួយលោកនាយករដ្ឋមន្ត្រី ហ៊ុន សែន នៅវិមានសន្តិភាព។
នៅក្នុងជំនួបជាមួយប្រមុខរដ្ឋាភិបាលកម្ពុជា តាមរយៈដំណើរទស្សនកិច្ចដ៏តក់ក្រហល់កាលពីថ្ងៃអង្គារ លោកស្រី Wendy R. Sherman បានលើកឡើងពីកង្វល់ដ៏ធំ ជុំវិញបញ្ហាវត្តមានយោធារបស់ចិន និងការកសាងទីតាំងនៅមូលដ្ឋានកងទ័ពជើងទឹករាម ក្នុងឈូងសមុទ្រថៃ។
លោកស្រី Sherman ក៏បានសុំការបំភ្លឺលើការវាយកំទេចអគារចំនួន២ ដែលជាជំនួយថវិកាពីសហរដ្ឋអាមេរិកនៅរាម ដោយគ្មានការជូនដំណឹង ឬការពន្យល់ជាមុន។ មន្ត្រីការទូតជាន់ខ្ពស់អាមេរិករូបនេះ បញ្ជាក់ថា មូលដ្ឋានយោធារបស់ចិនណាមួយនៅកម្ពុជា អាចនឹងបំផ្លាញអធិបតេយ្យភាពរបស់កម្ពុជា គំរាមកំហែងសន្តិសុខតំបន់ និងប៉ះពាល់ជាអវិជ្ជមានដល់ទំនាក់ទំនងរវាងសហរដ្ឋអាមេរិក និងប្រទេសកម្ពុជា។
វិទ្យុបារាំងអន្តរជាតិ RFI មិនទាន់មានការបញ្ជាក់បន្ថែមពីលោករដ្ឋមន្ត្រីការពារជាតិ ទៀ បាញ់ យ៉ាងណានៅឡើយទេ ថាតើការអនុញ្ញាតឲ្យអនុព័ន្ធយោធាអាមេរិកទៅពិនិត្យមើលកំពង់ផែរាម នឹងត្រូវធ្វើឡើងនៅពេលណា ហើយបើកឲ្យពិនិត្យមើលកំរិតណា។
ក៏ប៉ុន្តែថ្លែងប្រាប់ប្រព័ន្ធផ្សព្វផ្សាយក្នុងស្រុកដដែល លោក ទៀ បាញ់ បញ្ជាក់ថា កម្ពុជាគ្រាន់តែទទួលបានជំនួយពីចិន ដែលជាមិត្តដែកថែប ក្នុងការជួយសាងសង់កំពង់ផែតំបន់រាម ឱ្យមានលក្ខណៈធំទូលាយ និងទំនើបជាងមុនប៉ុណ្ណោះ ហើយជំនួយនេះមិនមានលក្ខខណ្ឌដូចមហាអំណាចដទៃឡើយ។
សូមរំលឹកថា ក្រោយសន្និសីទកាសែត ច្រានចោលការចុះផ្សាយរបស់កាសែត The Wall Street Journal កាលពីឆ្នាំកន្លងទៅ ដែលចោទថា កម្ពុជាបើកដៃឱ្យប្រទេសចិនដាក់មូលដ្ឋានទ័ពនៅសមុទ្ររាម ក្រសួងការពារជាតិកម្ពុជាបានអញ្ជើញអ្នកសារព័ត៌មានក្នុងស្រុក ទៅធ្វើទស្សនកិច្ចនៅមូលដ្ឋានកងទ័ពជើងទឹកដ៏ចំណាស់នេះម្តងហើយ។
ក៏ប៉ុន្តែសំណុំរឿងនេះ នៅតែមិនអាចរលត់បានដោយងាយៗ ដោយសារសហរដ្ឋអាមេរិក នៅតែមានសំណួរមិនដកថយជុំវិញការសង្ស័យថាប្រទេសចិន បានដាក់មូលដ្ឋានកងទ័ពរបស់ខ្លួននៅកំពង់ផែរាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ