រយៈពេល៦ថ្ងៃ លោក សម រង្ស៊ី លក់ប័ណ្ណនាឡិកាដៃ បានជាង១០ម៉ឺនដុល្លារ
លទ្ធផលនៃការលក់ "ប័ណ្ណនាឡិកា សម រង្ស៊ី" មកដល់ថ្ងៃ ២១ ឧសភា ២០២១ គឺបណ្តាញអតីតគណបក្សសង្គ្រោះជាតិ ទូទាំងពិភពលោក លក់បានជាង ២ម៉ឺនសន្លឹកហើយ ត្រូវជាសាច់ប្រាក់ជាង១០ ម៉ឺនដុល្លារ។ នេះគឺជាការអះអាងរបស់លោក សម រង្ស៊ី តាមរយៈទំព័រលើហ្វេសប៊ុករបស់លោក។ បើតាមអតីតប្រមុខបក្សប្រឆាំងរូបនេះ លោកកំពុងតែចាត់ចែង ទិញស្បៀងអាហារជាបណ្តើរៗ ដើម្បីចែកជូនដល់ប្រជាពលរដ្ឋ ដែលកំពុងខ្វះស្បៀងអាហារនៅប្រទេសកម្ពុជា។
ចុះផ្សាយនៅថ្ងៃ៖
ស្តាប់ - ០១:៥១
លើសពីយុទ្ធនាការមនុស្សធម៌ ការលក់ប័ណ្ណនាឡិកាដៃ របស់ លោក សម រង្ស៊ី ត្រូវបានសារព័ត៌មានអន្តរជាតិមួយឈ្មោះ Time Tide ពិព័ណនាថាជាយុទ្ធសាស្ត្រនយោបាយ សំដៅឆ្ពោះទៅកាន់ លោក ហ៊ុន សែន ដោយសារតែនាឡិកាប្រណិតៗជាច្រើនគ្រឿងរបស់ប្រមុខរដ្ឋាភិបាលខ្មែរ មានតម្លៃសរុបរាប់លានដុល្លារ នៅពេលដែលប្រជាពលរដ្ឋខ្មែរកំពុងតែខ្វះស្បៀងអាហារ។ សារព័ត៌មានដដែលនេះ បានហៅយុទ្ធនាការរបស់លោក សម រង្ស៊ី ថាជាយុទ្ធនាការមួយផ្តល់រូបភាពនយោបាយដ៏ល្អសម្រាប់គណបក្សប្រឆាំង ដែលប្រមូលបានថវិការាប់ម៉ឺនដុល្លារ ដើម្បីយកទៅជួយប្រជាពលរដ្ឋខ្មែរ។
បើតាមអតីតប្រមុខបក្សប្រឆាំង ប័ណ្ណនាឡិកាដៃ តម្លៃ៥ដុល្លារ ក្នុងមួយសន្លឹកនេះ គឺដាក់លក់អត់មានកំណត់ទេ គឺលក់រហូតដល់ថ្ងៃចាប់ឆ្នោតផ្សងសំណាង សម្គាល់លេខប័ណ្ណ របស់អ្នកដែលនឹងទទួលបាននាឡិកាម៉ាក (Casio) របស់លោក សម រង្ស៊ី ជានិមិត្តរូប នៅថ្ងៃ ០៦ មិថុនា ២០២១។
លោក សម រង្ស៊ី ដែលបច្ចុប្បន្នកំពុងរស់នៅក្នុងប្រទេសបារាំង បានចាប់ផ្តើមធ្វើយុទ្ធនាការលក់បណ្ណនាឡិកាដៃរបស់ខ្លួន ចាប់តាំងពីថ្ងៃទី១៦ ខែឧសភា ឆ្នាំ២០២១។ គឺជាយុទ្ធនាការក្រោមរូបភាពប្រមូលប្រាក់ទៅទិញស្បៀងអាហារជូនដល់ប្រជាពលរដ្ឋខ្មែរដែលកំពុងខ្វះខាត ក្នុងគ្រារដ្ឋាភិបាលបានបិទខ្ទប់ភូមិរាជធានីភ្នំពេញ និងក្រុងតាខ្មៅ ខេត្តកណ្តាល នាពេលកន្លងមក និងចំពោះជនដែលរងផលប៉ះពាល់ពីជំងឺកូវីដ-១៩។
យុទ្ធនាការនេះ គឺមិនមែនជាចៃដន្យនោះឡើយ ពោលធ្វើឡើងក្រោយពីអភិបាលរងម្នាក់នៅរាជធានីភ្នំពេញ បានចំអកថា ក្រុមប្រឆាំងមិនបានជួយលុយសូម្បីតែមួយរៀល រួមទាំងកម្លាំង ដល់ប្រជាជន ខណៈរដ្ឋាភិបាលខំប្រឹងប្រែងទប់ស្កាត់ការឆ្លងជំងឺកូវីដ១៩ ក្នុងព្រឹត្តិការណ៍២០កុម្ភៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ