បណ្ឌិត មាស នី៖ការបន្តបិទផ្សារគឺត្រឹមត្រូវតាមបច្ចេកទេសតែរដ្ឋត្រូវគិតពីជីវភាពអ្នកសេដ្ឋកិច្ចក្រៅប្រព័ន្ធ
អ្នកស្រាវជ្រាវពីការអភិវឌ្ឍសង្គម បានគាំទ្រចំពោះចំណាត់ការរបស់អាជ្ញាធរក្រុងភ្នំពេញជុំវិញការទប់ស្កាត់ការឆ្លងកូវីដ១៩ តាមរយៈការបន្តបិទខ្ទប់តំបន់មួយចំនួន និងការបន្តបិទផ្សារមិនរៀបរយមួយសប្តាហ៍ទៅមុខទៀត។ ប៉ុន្តែទន្ទឹមនឹងនេះ អ្នកវិភាគលើកឡើងថា រដ្ឋត្រូវបន្តគិតគូរអំពីសេដ្ឋកិច្ចរបស់ពលរដ្ឋខ្មែរដែលរស់នៅពឹងផ្អែកតែលើមុខរបរប្រចាំថ្ងៃនៅតាមទីផ្សារទាំងនោះផង។
ចុះផ្សាយនៅថ្ងៃ៖
ស្តាប់ - ០១:២៥
លោកបណ្ឌិត មាស នី អ្នកស្រាវជ្រាវពីការអភិវឌ្ឍសង្គម បានកត់សំគាល់ថា នៅពេលដែលរដ្ឋធ្វើការបិទខ្ទប់ទីផ្សាររយៈពេលយូរ គឺបានធ្វើឲ្យប៉ះពាល់ខ្លាំងដល់សេដ្ឋកិច្ចពលរដ្ឋ ពិសេសពលរដ្ឋជាអ្នកប្រកបមុខរបរសេដ្ឋកិច្ចក្រៅប្រព័ន្ធ ខណៈពួកគេមួយចំនួន រកចំណូលមួយថ្ងៃសម្រាប់រស់បានតែមួយថ្ងៃប៉ុណ្ណោះ។
បើតាមអ្នកវិភាគរូបនេះ ជាគោលការណ៍របស់អង្គការសហប្រជាជាតិ គឺរដ្ឋនីមួយៗមានតួនាទីសំខាន់ក្នុងការជួយធានាឲ្យពលរដ្ឋអាចរស់នៅបាន នៅក្នុងអំឡុងពេលបិទខ្ទប់ ឬអំឡុងពេលបិទទីផ្សារនេះ តាមរយៈការចែកថវិកា ឬចែកស្បៀងអាហារ។
លោក មាស នី ទទួលបានស្គាល់ថា ការចែកស្បៀងរបស់រដ្ឋាភិបាលកម្ពុជា នៅអំឡុងពេលមានការបិទខ្ទប់កន្លងនេះគឺត្រឹមត្រូវតាមបច្ចេកទេស ប៉ុន្តែលោកលើកឡើងថា រដ្ឋត្រូវមានផែនការច្បាស់លាស់ជាងនេះសម្រាប់រយៈវែង។
សូមបញ្ជាក់ថា សាលារាជធានីភ្នំពេញបានប្រកាសថា ត្រូវបន្តបិទផ្សារមិនរៀបរយរយៈពេល១សប្តាហ៍ទៅមុខទៀតរហូតដល់ថ្ងៃទី២១ ខែឧសភា ឆ្នាំ២០២១ ពោលការបិទផ្សារមិនរៀបរយនេះ គឺមានរយៈជាង១ខែមកហើយ។
ជំនួសឲ្យការបិទផ្សារមិនរៀបរយនេះ អាជ្ញាធរបានអនុញ្ញាតឲ្យមានការលក់ដូរ ជាធម្មតានៅតាមផ្សារទំនើបៗ ខណៈអាជីវករមួយចំនួន បានផ្លាស់ប្តូរពីការលក់នៅតាមផ្សារសាធារណៈ មកលក់តាមរ៉ឺម៉កចល័ត។ តែនេះមិនអាចដោះស្រាយបញ្ហាសេដ្ឋកិច្ចរបស់អាជីវករ ដែលបាត់បង់មុខរបរទាំងអស់នោះបានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ