លោកហ៊ុន សែន បញ្ជាឱ្យសម្រុកចាក់វ៉ាក់សាំងដល់ពលរដ្ឋទាំងអស់នៅក្នុងតំបន់ក្រហមដោយកុំបារម្ភរឿងខ្វះវ៉ាក់សាំង
លោកនាយករដ្ឋមន្រ្តីហ៊ុន សែន នៅព្រឹកថ្ងៃពុធនេះ បានបញ្ជាឱ្យក្រុមគ្រូពេទ្យយោធានៃក្រសួងការពារជាតិបន្តសម្រុកចាក់វ៉ាក់សាំងបង្ការជំងឺកូវីដ១៩រហូតអស់ប្រជាពលរដ្ឋនៅក្នុងតំបន់ក្រហម។ មកដល់ពេលនេះ ក្រុមគ្រូពេទ្យយោធាបានចាក់វ៉ាក់សាំងដល់ពលរដ្ឋនៅក្នុងតំបន់ក្រហមបានជាង១៥ម៉ឺននាក់ហើយ។ លោកប្រមុខរដ្ឋាភិបាលកម្ពុជាបានគូសបញ្ជាក់ថា ការចាក់នេះមិនអាចបន្ធូរដៃ ឬដកថយបានឡើយ ពោល គឺត្រូវចាក់ឱ្យទាល់តែអស់ ដោយកុំបារម្ភពីបញ្ហាខ្វះវ៉ាក់សាំង ព្រោះវ៉ាក់សាំង១លានដូសទៀតនឹងមកដល់កម្ពុជានៅសប្តាហ៍ក្រោយនេះ។
ចុះផ្សាយនៅថ្ងៃ៖
ស្តាប់ - ០២:២៣
គឺតាមរយៈសារជាសំឡេងក្នុងបណ្តាញសង្គមតេឡេក្រាម លោកនាយរកដ្ឋមន្រ្តីហ៊ុន សែន បានគូសបញ្ជាក់ដូច្នេះថា ការចាក់វ៉ាក់សាំងនៅក្នុងតំបន់ក្រហម គឺត្រូវចាក់ឱ្យអស់ប្រជាពលរដ្ឋ ហើយបើមិនទាន់អស់ទេ គឺមិនត្រូវដើរចេញចោលប្រជាជនណាម្នាក់នោះឡើយ។ លោកនាយករដ្ឋមន្រ្តី បានអះអាងថា នៅក្នុងតំបន់ក្រហមនេះ គឺមានប្រជាពលរដ្ឋដែលត្រូវចាក់វ៉ាក់សាំងប្រមាណជាង៥២ម៉ឺននាក់ ហើយពួកគេទាំងនេះ គឺជាអ្នករងគ្រោះធ្ងន់ធ្ងរណាស់ដែលត្រូវតែឱ្យពួកគេទទួលបាននូវការវ៉ាក់សាំងបង្ការជំងឺកូវីដ១៩គ្រប់ៗគ្នា។ បើតាមលោកនាយករដ្ឋមន្រ្តីហ៊ុន សែន កម្ពុជាមានវ៉ាក់សាំងគ្រប់គ្រាន់សម្រាប់ចាក់ជូនប្រជាពលរដ្ឋទាំងនេះ ដោយនៅថ្ងៃទី១១ និងទី១៥ ឧសភា វ៉ាក់សាំងនឹងមកដល់កម្ពុជាជាបន្តបន្ទាប់ចំនួន១លានដូសបន្ថែមទៀត។
រដ្ឋាភិបាលកម្ពុជាបានបញ្ជាឱ្យក្រុមគ្រូពេទ្យយោធានៃក្រសួងការពារជាតិចាប់ផ្តើមសម្រុកចាក់វ៉ាក់សាំងបង្ការជំងឺកូវីដ១៩ដល់ប្រជាពលរដ្ឋនៅក្នុងតំបន់ក្រហមចាប់ពីថ្ងៃទី០១ ឧសភាដោយគ្រោងចាក់រយៈពេលពេញ១ខែតែម្តង ដើម្បីទប់ស្កាត់ និងកាត់ផ្តាច់ការឆ្លងរាលដាលនៃជំងឺកូវីដ១៩។ នៅក្នុងរយៈពេល៤ថ្ងៃទៅនេះ ក្រុមគ្រូយោធាបានចាក់វ៉ាក់សាំងដល់ប្រជាពលរដ្ឋនៅក្នុងតំបន់ក្រហមបានជាង១៥ម៉ឺននាក់ហើយ។ ដោយឡែក នៅក្របខណ្ឌទូទាំងប្រទេសវិញ ក្រសួងសុខាភិបាល និងក្រសួងការពារជាតិ បានចាក់វ៉ាក់សាំងជូនមន្រ្តីរាជការ ប្រជាពលរដ្ឋ និងកងកម្លាំងប្រដាប់អាវុធសរុបចំនួន ជាង១លាន៥សែននាក់(១,៥១៥,៤៤៧នាក់)គិតត្រឹមថ្ងៃទី០៤ ខែឧសភា ឆ្នាំ២០២១។
ជាការកត់សម្គាល់ ការចាក់វ៉ាក់សាំងបង្ការជំងឺកូវីដ១៩ដល់ពលរដ្ឋ ជាពិសេស នៅក្នុងតំបន់ក្រហម គឺធ្វើបានលឿន។ ប៉ុន្តែ បញ្ហាមួយដែលនៅតែមានកើតមានឡើងជារើយៗ និងរងការរិះគន់នោះ គឺការទៅប្រជ្រៀតគ្នានៃប្រជាពលរដ្ឋដែលទៅចាក់វ៉ាក់សាំង បើទោះបីអាជ្ញាធរសុខាភិបាលតែងតែចេញមកអំពាវនាវដល់ប្រជាពលរដ្ឋឱ្យរក្សាគម្លាតក៏ដោយ។
ចំពោះបញ្ហានេះ លោកស្រីចក់ សុភាព នាយិកាមជ្ឈមណ្ឌលសិទ្ធិមនុស្សកម្ពុជាបានលើកឡើងថា អាជ្ញាធរពាក់ព័ន្ធគួរពិនិត្យលើការរៀបចំចាក់វ៉ាក់សាំងឡើងវិញ ដូចជា ត្រូវកំណត់ថ្ងៃចាក់តាមភូមិជាដើម ដោយចេញប័ណ្ណតាមភូមិ ឬរៀបចំជាកូតាភូមិនិមួយៗធ្វើយ៉ាងណាធានាគម្លាត និងចំនួនអាចគ្រប់គ្រងបាន។ តាមលោកស្រីចក់ សុភាព គឺធ្វើដូចនេះអាចជួយសម្រួលដល់ទាំងអាជ្ញាធរចាត់ចែងការងារចាក់វ៉ាក់សាំង ហើយប្រជាពលរដ្ឋនឹងមិនត្រូវខកខានម្តងជាពីរដង និងបង្កជាការកកស្ទះនៅកន្លែងចាក់វ៉ាក់សាំងឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ