ខេត្តណ្តាលសម្រេចកំណត់ពណ៌តំបន់ ក្រោយផ្ទុះកូវីដ១៩ខ្លាំងនៅក្នុងរោងចក្រ
បន្ទាប់ពីមានការផ្ទុះខ្លាំងនូវជំងឺកូវីដ១៩ក្នុងរោងចក្រកាត់ដេរ រដ្ឋបាលខេត្តកណ្តាលបានសម្រេចបិទខ្ទប់ភូមិសាស្ត្រមួយចំនួន និងកំណត់ជា «តំបន់ក្រហម» «តំបន់លឿងទុំ» និង «តំបន់លឿង» ចាប់ពីថ្ងៃទី១ឧសភានេះតទៅ។ ខេត្តកណ្តាល គឺជាខេត្តទី១ បន្ទាប់ពីរាជធានីភ្នំពេញ ដែលបានកំណត់ពណ៌នៃតំបន់បែបនេះ។ តាមរយៈយន្តការនេះ អភិបាលបាលខេត្តកណ្តាលមានសុទិដ្ឋិនិយមថានឹងអាចទប់ស្កាត់ការរាលដាលនៃជំងឺកូវីដ១៩បាន ប្រសិនបើមានការចូលរួមពីប្រជាពលរដ្ឋ។
ចុះផ្សាយនៅថ្ងៃ៖
ក្រោយពីរកឃើញមានការរាលដាលជំងឺកូវីដ១៩យ៉ាងលឿនក្នុងរោងចក្រកាត់ដេររហូតដល់មានការចម្លងដល់ទៅ១២០នាក់ គិតត្រឹមថ្ងៃទី១ឧសភា រដ្ឋបាលខេត្តកណ្តាល បានសម្រេចបិទខ្ទប់ឃុំចំនួន២ ក្នុងស្រុកអង្គស្នួលនៃខេត្តកណ្តាល និងត្រូវកំណត់ជា «តំបន់ក្រហម» «តំបន់លឿងទុំ» និង «តំបន់លឿង» រយៈពេល២សប្តាហ៍ ចាប់ពីថ្ងៃទី១ឧសភាតទៅ។
ខេត្តកណ្តាល គឺជាខេត្តទី១ បន្ទាប់ពីរាជធានីភ្នំពេញ ដែលបានកំណត់ភូមិសាស្ត្រឆ្លងរាលដាលកូវីដ១៩ជាពណ៌នៃតំបន់បែបនេះ បន្ទាប់ពីរកឃើញមានការផ្ទុះរាលដាលកូវីដ១៩នៅក្នុងស្រុកអង្គស្នួល ពាក់ព័ន្ធនឹងកម្មករនិយោជិតប្រមាណ៣០០០នាក់ ក្នុងរោងចក្រកាត់ដេរចំនួន ១០រោងចក្រ។
អភិបាលខេត្តកណ្តាល លោក គង់ សោភ័ណ្ឌ តាមរយៈវិទ្យុបារាំងអន្តរជាតិ RFI នៅថ្ងៃទី០១ឧសភានេះ បានលើកឡើងថា នាអំឡុងពេលនេះ អាជ្ញាធរខេត្ត កំពុងតែធ្វើការញាប់ដៃញាប់ជើង ប្រមូលសំណាក និងចាក់វ៉ាក់សាំងដល់ពលរដ្ឋ ដើម្បីបិទបញ្ចប់ការរាលដាលជំងឺកូវីដ១៩នៅក្នុងខេត្តកណ្តាល និងជាពិសេសនៅក្នុងភូមិសាស្ត្ររោងចក្រកាត់ដេរ ផ្ទះជួល និងកន្លែងប្រកបអាជីវកម្មច្រើនស្អេកស្កះនេះតែម្តង។
លោក គង់ សោភ័ណ្ឌ អភិបាលខេត្តកណ្តាល បានឲ្យដឹងទៀតថា នៅក្នុងថ្ងៃទី១នៃការអនុវត្តវិធានបិទខ្ទប់និងកំណត់ភូមិសាស្ត្រនេះ ពលរដ្ឋនៅក្នុងខេត្តកណ្តាល ដោយចំពោះពលរដ្ឋនៅក្នុងតំបន់បិទខ្ទប់ មានការចូលរួមនិងអនុវត្តខ្ជាប់ខ្ជួននិងដោយប្រុងប្រយ័ត្ន។ លោកអភិបាលខេត្តរូបនេះ បានបង្ហាញសុទិដ្ឋិនិយមថា មិនយូរនោះទេ ខេត្តកណ្តាលនឹងឈានទៅដល់ការកាត់ផ្តាច់ឫសគល់នៃការចម្លងជំងឺកូវីដ១៩បាន ប្រសិនបើមានការចូលរួមពីពលរដ្ឋបែបនេះនោះ។
គួរជម្រាបជូនថា រដ្ឋបាលខេត្តកណ្តាលបានដាក់ភូមិចំនួន៤ក្នុងស្រុកអង្គស្នួល ជាតំបន់ក្រហម ដែលក្នុងនោះមានភូមិស្វាយជ្រុំ ភូមិពងទឹក ភូមិអណ្តូង និងភូមិត្នោតម្តើម នៃឃុំបែកចាន។ រីឯតំបន់លឿងទុំវិញ គឺមានភូមិចក ភូមិព្រៃបឹង និងភូមិកម្ពោតស្បូវ នៃឃុំបែកចាន ស្រុកអង្គស្នួល។ ចំណែកតំបន់លឿង មានភូមិព្រៃពពេល នៃឃុំពើក ស្រុកអង្គស្នួល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ