កម្ពុជាបានចាក់វ៉ាក់សាំងដល់ពលរដ្ឋជាង១លាន៣០ម៉ឺននាក់ ជាប់ជាប្រទេសទី២នៅអាស៊ានបន្ទាប់ពីសិង្ហបុរី
គិតត្រឹមល្ងាចថ្ងៃទី២៩ ខែមេសា ក្រសួងសុខាភិបាល និងក្រសួងការពារជាតិកម្ពុជាបានចាក់វ៉ាក់សាំងបង្ការជំងឺកូវីដ១៩ដល់ជនស៊ីវិល មន្រ្តីរាជការ និងយោធាបានជាង១លាន៣០ម៉ឺននាក់។ ក្នុងនោះ ក្រសួងការពារជាតិចាក់បានជិត៣០ម៉ឺននាក់ និងក្រសួងសុខាភិបាលចាក់បានជាង១លាននាក់។ ចំនួននេះ ធ្វើឱ្យកម្ពុជាក្លាយជាប្រទេសទី២ក្នុងតំបន់អាស៊ាន បន្ទាប់ពីសិង្ហបុរីដែលបានចាក់វ៉ាក់សាំងច្រើនបំផុតដល់ពលរដ្ឋ។ ចំណែក នៅថ្ងៃស្អែកនេះ ក្រសួងការពារជាតិក៏នឹងបើកការចាក់វ៉ាក់សាំងទ្រង់ទ្រាយធំដល់ពលរដ្ឋនៅក្នុងតំបន់ក្រហមបន្ថែមទៀត។
ចុះផ្សាយនៅថ្ងៃ៖
ស្តាប់ - ០២:៥៤
ចាប់ពីថ្ងៃទី១ ដល់ថ្ងៃទី៣០ ខែឧសភា ក្រសួងការពារជាតិកម្ពុជានឹងបើកយុទ្ធនាការចាក់វ៉ាក់សាំងបង្ការជំងឺកូវីដ១៩ទ្រង់ទ្រាយធំដល់ពលរដ្ឋដែលស្ថិតនៅក្នុងតំបន់ក្រហមនៅក្នុងរាជធានីភ្នំពេញ និងក្រុងតាខ្មៅនៃខេត្តកណ្តាល។ សម្រាប់រាជធានីភ្នំពេញ ក្រុមគ្រូពេទ្យយោធានៃកងយុទ្ធពលខេមរភូមិន្ទនឹងបោះទីតាំងចាក់វ៉ាក់សាំងផ្សេងៗគ្នានៅក្នុងខណ្ឌចំនួន៤ គឺខណ្ឌដង្កោ ខណ្ឌមានជ័យ ខណ្ឌពោធិ៍សែនជ័យ និងខណ្ឌកំបូលដែលមានតំបន់ក្រហម និងមានកម្មករ-កម្មការិនីកំពុងស្នាក់នៅប្រមាណ៤៥ម៉ឺននាក់។ ការបញ្ចេញក្រុមគ្រូពេទ្យយោធានេះ គឺធ្វើឡើងតាមបទបញ្ជារបស់លោកនាយករដ្ឋមន្រ្តីហ៊ុន សែន ដែលឱ្យកំណត់ដៅតំបន់ក្រហមជាអាទិភាព និងត្រូវចាក់ឱ្យបានលឿនបំផុត ដើម្បីទប់ស្កាត់ការឆ្លងរាលដាលជំងឺកូវីដ១៩។
ចំណែក ក្រសួងសុខាភិបាលកម្ពុជាវិញតាមរយៈគណៈកម្មការចំពោះកិច្ចចាក់វ៉ាក់សាំងកូវីដ១៩ ក៏បានប្រកាសបើកយុទ្ធនាការចាក់វ៉ាក់សាំង AstraZeneca ដូសទី២ដល់ប្រជាពលរដ្ឋផងដែរចាប់ពីថ្ងៃទី០៦ ខែឧសភា រហូតដល់ថ្ងៃទី១៨ ខែមិថុនា ឆ្នាំ២០២១។ វ៉ាក់សាំង AstraZeneca ដូសទី២នេះ គឺនឹងចាក់ជូនប្រជាពលរដ្ឋដែលបានចាក់ដូសទី១រួចរាល់នៅក្នុងរាជធានីភ្នំពេញ ខេត្តកណ្តាល និងខេត្តព្រះសីហនុ។
សូមជម្រាបជូនថា គិតមកត្រឹមថ្ងៃទី២៩ ខែមេសា រដ្ឋាភិបាលកម្ពុជាបានចាក់វ៉ាក់សាំងបង្ការជំងឺកូវីដ១៩បានចំនួនជាង១លាន៣០ម៉ឺននាក់(១,៣២៩,៤៣៣នាក់)។ ជាមួយនឹងចំនួននេះ គឺកម្ពុជាបានក្លាយជាប្រទេសទី២នៅក្នុងតំបន់អាស៊ានបន្ទាប់ពីប្រទេសិង្ហបុរីដែលចាក់វ៉ាក់សាំងច្រើនបំផុតដល់ប្រជាពលរដ្ឋ។ កម្ពុជាមានភាគរយនៃការចាក់វ៉ាក់សាំងដល់ពលរដ្ឋប្រមាណ១២,៤០% ខណៈសិង្ហបុរីមាន៣៧,៤៨%។ បន្ទាប់ពីកម្ពុជា គឺប្រទេសឥណ្ឌូនេស៊ីដែលចាក់ឱ្យពលរដ្ឋបាន៦,៨៩%។ ដោយឡែក ចំពោះការចាក់បានទាំង២ដូសវិញ គឺសិង្ហបុរីធ្វើបានប្រមាណ១៥,១% ខណៈកម្ពុជាធ្វើបាន៥,១% និងប្រទេសឥណ្ឌនេស៊ីធ្វើបាន២,៨%។ រីឯ ប្រទេសក្បែរខាងកម្ពុជាវិញ គឺថៃធ្វើបាន០,៤% ឡាវ គឺ០,៩% ប៉ុន្តែប្រទេសវៀតណាមវិញ គឺពុំទាន់មានទិន្នន័យបញ្ជាក់នៅឡើយនោះទេ។
សម្រាប់កម្ពុជា ក្រសួងសុខាភិបាល និងក្រសួងការពារជាតិបានប្រើប្រាស់វ៉ាក់សាំង៣ប្រភេទ គឺ AstraZenecaរបស់អង់គ្លេសផលិតនៅឥណ្ឌា វ៉ាក់សាំងSinopharm និងSinovac របស់ចិន។ កម្ពុជាកំពុងចាក់ដល់ប្រជាពលរដ្ឋនូវវ៉ាក់សាំងAstraZenecaដែលចំនួនជាង៣២ម៉ឺនដូសជាជំនួយតាមយន្តការCOVAX និងវ៉ាក់សាំងSinopharm ជាជំនួយរបស់ចិនដែលសរុបចំនួន១លាន៧០ម៉ឺនដូស។ ក្រៅពីនេះ កម្ពុជាក៏មានវ៉ាក់សាំងSinovacកំពុងចាក់ឱ្យប្រជាពលរដ្ឋចំនួន១លាន៥សែនដូសដែលទិញពីចិនអស់១៥លានដុល្លារ ហើយវ៉ាក់សាំងនេះ កម្ពុជាក៏គ្រោងបញ្ជាទិញចំនួន៤លានដូសបន្ថែមទៀតនាពេលខាងមុខនេះ ដើម្បីចាក់ជូនប្រជាពលរដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ