អង្គការព័ត៌មាន និងសង្គមស៊ីវិល១៣រួមគ្នាធ្វើយុទ្ធនាការតាមបណ្ដាញសង្គមលើកកម្ពស់សេរីភាពសារព័ត៌មាននៅកម្ពុជា
អង្គការ សមាគមអ្នកសារព័ត៌មាន និងអង្គការសង្គមស៊ីវិលចំនួន១៣ នៅថ្ងៃទី២៦ ខែមេសានេះ បានប្រកាសរួមគ្នារៀបចំយុទ្ធនាការនៅតាមបណ្តាញទំនាក់ទំនងសង្គមរយៈពេល២សប្តាហ៍ ដើម្បីឆ្លុះបញ្ចាំងពីសារៈសំខាន់ និងជំរុញឱ្យមានការចូលរួមពីសាធារណជនក្នុងការលើកកម្ពស់សេរីភាពសារព័ត៌មាននៅក្នុងប្រទេសកម្ពុជា។ យុទ្ធនាការនេះ ធ្វើឡើងបន្ទាប់ពីសេរីភាពសារព័ត៌មាននៅកម្ពុជាត្រូវបានអង្គការការពារអ្នកកាសែតអន្តរជាតិបន្តមើលឃើញថា ពុំទាន់មានភាពប្រសើរនៅឡើយនៅក្នុងឆ្នាំ២០២១នេះ។
ចុះផ្សាយនៅថ្ងៃ៖
ស្តាប់ - ០២:៥៧
ក្រោមប្រធានបទ«ព័ត៌មានដែលជាប្រយោជន៍សាធារណៈ» យុទ្ធនាការផ្សព្វផ្សាយតាមបណ្តាញសង្គមនេះ គឺចាប់ផ្តើមពីថ្ងៃទី២៦ ខែមេសានេះ រហូតដល់ថ្ងៃទី១០ ខែឧសភា ឆ្នាំ២០២១ ដើម្បីចូលរួមប្រារព្ធទិវាសេរីភាពសារព័ត៌មានពិភពលោកឆ្នាំ២០២១។ យុទ្ធនាការ រយៈពេល២សប្តាហ៍នេះ គឺដឹកនាំដោយអង្គការ សមាគមអ្នកសារព័ត៌មាន និងអង្គការសង្គមស៊ីវិលចំនួន១៣មានជាអាទិ៍ មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) សមាគមសម្ព័ន្ធអ្នកសារព័ត៌មានកម្ពុជា(CamboJa) មជ្ឈមណ្ឌលសិទ្ធិមនុស្សកម្ពុជា សមាគមអាដហុក អង្គការខុមហ្វ្រែល មជ្ឈមណ្ឌលប្រជាពលរដ្ឋ ដើម្បីការអភិវឌ្ឍ និងសន្តិភាព និងមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស(សង់ត្រាល់)ជាដើម។
បើតាមសេចក្តីប្រកាសព័ត៌មានរួមនៅថ្ងៃចន្ទនេះ សកម្មភាពនៃយុទ្ធនាការនេះ គឺជាការបង្ហោះសារខ្លីៗអំពីសារៈសំខាន់នៃព័ត៌មានចំពោះប្រយោជន៍សាធារណៈ ការបង្ហោះវីដេអូស្តីពីសារៈសំខាន់នៃតួនាទីអ្នកសារព័ត៌មាន និងប្រព័ន្ធផ្សព្វផ្សាយ ការប្តូរ Facebook profile photo frame កិច្ចពិភាក្សាតាមវិទ្យុ និងបណ្តាញសង្គមលើប្រធានបទពាក់ព័ន្ធនឹងអ្នកសារព័ត៌មាន។
លោកណុប វី នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជាហៅកាត់ថា CamboJA បានអះអាងថា អ្នកសារព័ត៌មាន មានតួនាទីសំខាន់ណាស់នៅក្នុងសង្គមប្រជាធិបតេយ្យ ជាពិសេសនៅក្នុងស្ថានភាពដែលប្រទេសកម្ពុជាកំពុងមានការឆ្លងរាលដាលនៃជំងឺកូវីដ-១៩។ បញ្ហានេះ គឺចាំបាច់ណាស់ ត្រូវការអ្នកសារព័ត៌មាន រាយការណ៍ព័ត៌មានពិត និងទាន់ពេលវេលាជូនដល់ប្រជាពលរដ្ឋ។
សូមបញ្ជាក់ថា សម្រាប់ឆ្នាំ២០២១នេះ អង្គការការពារអ្នកកាសែតគ្មានព្រំដែនបានចាត់ចំណាត់ថ្នាក់សេរីភាពសារព័ត៌មាននៅកម្ពុជានៅលេខរៀងទី១៤៤ គឺដូចកាលពីឆ្នាំ២០២០ដែរ។ នៅក្នុងរបាយការណ៍សន្ទស្សន៍សេរីភាពសារព័ត៌មានពិភពលោកឆ្នាំ២០២១ អង្គការការពារអ្នកសែតគ្មានព្រំដែនបានគូសបញ្ជាក់ថា ការរាតត្បាតជំងឺកូវីដ-១៩ និងវិធានការរារាំងទាំងស្រុងនូវការផ្សព្វផ្សាយព័ត៌មានមិនពិតរបស់អាជ្ញាធររដ្ឋាភិបាល បាននាំឱ្យមានការបិទខ្ទប់លំហូរសេរីភាពអ្នកសារព័ត៌មាន។
ក៏ប៉ុន្តែ លោកជិន ម៉ាលីន អនុប្រធាន និងជាអ្នកនាំពាក្យគណៈកម្មាធិការសិទ្ធិមនុស្សកម្ពុជាបានឆ្លើយតបថា របាយការណ៍របស់អង្គការការពារអ្នកកាសែតគ្មានព្រំដែននេះ គឺមិនមានអ្វីថ្មីសោះ។ លោកថា របាយការណ៍នេះ មើលតែមួយជ្រុងនៃការអនុវត្តវិធានការច្បាប់របស់សមត្ថកិច្ចទៅលើបុគ្គល ដែលប្រព្រឹត្តល្មើសច្បាប់តែប៉ុណ្ណោះ ពោលគឺឱ្យតែសមត្ថកិច្ចអនុវត្តច្បាប់ទៅលើអ្នកសារព័ត៌មាន អង្គការនេះចាត់ទុកថា ជាការរឹតត្បិតសិទ្ធិសេរីភាពសារព័ត៌មាន។
ជាងនេះទៀតសោត លោកជិន ម៉ាលីន អះអាងថា អង្គការនេះ ពុំបានពិនិត្យមើលលើទិដ្ឋភាពមួយជ្រុងទៀត ដែលទាក់ទងនឹងវិជ្ជាជីវៈរបស់អ្នកសារព័ត៌មាននោះទេ ជាពិសេសទាក់ទងទៅនឹងការអនុវត្តសិទ្ធិសេរីភាពអ្នកសារព័ត៌មាន។ សម្រាប់លោក ជិន ម៉ាលីន វិធីសាស្រ្តវាយតម្លៃរបស់អង្គការការពារអ្នកកាសែតគ្មានព្រំដែន គឺមិនត្រឹមត្រូវ ហើយមិនគ្រប់ជ្រុងជ្រោយ និងមិនមានលក្ខណៈជាវិទ្យាសាស្រ្ដនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ