១សប្តាហ៍ចុងក្រោយ៖អ្នកស្លាប់ដោយកូវីដកើនខ្ពស់ ខណៈអ្នកឆ្លងថ្មីមិនសូវថមថយ និងអ្នកជាសះស្បើយកើនតិច
គិតមកដល់ថ្ងៃព្រហស្បតិ៍នេះ គឺជាថ្ងៃទី៨ហើយនៃការបិទខ្ទប់រាជធានីភ្នំពេញ និងក្រុងតាខ្មៅនៃខេត្តកណ្តាល ដើម្បីទប់ស្កាត់ការឆ្លងរាលដាលនៃជំងឺកូវីដ១៩។ ចំណែក នៅថ្ងៃនេះដែរ ក្រសួងសុខាភិបាលកម្ពុជាវិញបានបន្តរកឃើញអ្នកឆ្លងជំងឺកូវីដ១៩ថ្មីចំនួន៤៤៦នាក់បន្ថែមទៀតដែលច្រើនជាងកាលពីម្សិលមិញ។ បើរាប់ទាំងតួលេខថ្មីនេះ គឺនៅក្នុងរយៈពេល១សប្តាហ៍មកនេះ គេសង្កេតឃើញថា ស្ថានភាពនៃឆ្លងរាលដាលជំងឺកូវីដ១៩នៅកម្ពុជាមិនទាន់ស្រាកស្រាន្តនោះឡើយ ហើយអ្នកស្លាប់ថ្មីវិញនោះ គឺកើនឡើងខ្ពស់ខ្លាំងណាស់ដល់៥៩នាក់ហើយ។
ចុះផ្សាយនៅថ្ងៃ៖
ស្តាប់ - ០២:៣៦
១សប្តាហ៍មកនេះ ពោល គឺចាប់ពីថ្ងៃទី១៦ ខែមេសា ដល់ថ្ងៃទី២២ ខែមេសានេះ ស្ថានភាពនៃការឆ្លងរាលដាលនៃជំងឺកូវីដ១៩នៅក្នុងប្រទេសកម្ពុជា និយាយជារួម និងនៅទីក្រុងភ្នំពេញ និយាយដោយឡែក ហាក់មិនទាន់មានសញ្ញាថមថយដែលគួរកត់សម្គាល់នៅឡើយទេ។ នេះ គឺដោយសារតែអ្នកឆ្លងថ្មីស្ថិតក្នុងខ្ទង់រយជារៀងរាល់ថ្ងៃ ហើយថែមទាំងឡើងចុះនៃតួលេខមិនទៀតទាត់ថែមទៀតផង។ ជាក់ស្តែង នៅថ្ងៃទី២២ ខែមេសានេះ កម្ពុជាបានរកឃើញអ្នកឆ្លងជំងឺកូវីដ១៩ ចំនួន ៤៤៦នាក់បន្ថែមទៀត និងមានអ្នកជំងឺជាសះស្បើយចំនួន១៣០នាក់។ ប៉ុន្តែក៏មានស្លាប់៣នាក់បន្ថែមទៀតដែរ។
ចំនួននេះ គឺកើនឡើងជាងកាលពីថ្ងៃទី២១ មេសាម្សិលមិញនេះ។ កាលពីថ្ងៃពុធ កម្ពុជាបានរកបានរកឃើញអ្នកឆ្លងជំងឺកូវីដ១៩ថ្មីចំនួន ៣០៣នាក់ និងមានអ្នកជាសះស្បើយ ២៣៩នាក់ ។ ប៉ុន្តែ អ្នកស្លាប់ថ្មីវិញ គឺមានដល់ទៅ៧នាក់ឯណោះ។ កាលពីថ្ងៃទី២០ ខែមេសា មានអ្នកឆ្លងថ្មីចំនួន ៤៣១នាក់ និងអ្នកជាសះស្បើយ ៣១នាក់ ខណៈអ្នកស្លាប់ថ្មី មាន៤នាក់ ហើយកាលពីថ្ងៃទី ១៩ ខែមេសាវិញ មានអ្នកឆ្លងថ្មីចំនួន ៦២៤នាក់ និងជាសះស្បើយ ៤៨នាក់ និងអ្នកស្លាប់ថ្មីមានចំនួន២នាក់។
ចំណែក កាលពីថ្ងៃទី១៨ ខែមេសា ឆ្នាំ២០២១ កម្ពុជាបានរកឃើញអ្នកឆ្លងជំងឺកូវីដ១៩ថ្មីចំនួន ៦១៨នាក់ ហើយមានជាសះស្បើយ ៦០នាក់ និងមានអ្នកស្លាប់ថ្មី៤នាក់ ខណៈនៅថ្ងៃទី ១៧ ខែមេសា អ្នកឆ្លងថ្មីមានចំនួន ២៩១នាក់ ហើយមានអ្នកជាសះស្បើយ ២៣នាក់ និងអ្នកស្លាប់ថ្មី ១នាក់។ ចំនួននេះ គឺច្រើនជាងកាលពីថ្ងៃទី១៦ ខែមេសា ដែលមានអ្នកឆ្លងថ្មីចំនួន ២៦២នាក់ និងមានជាសះស្បើយ ៧៤នាក់ ហើយអ្នកស្លាប់ថ្មី មាន២នាក់។
សរុបក្នុងរយៈពេល១សប្តាហ៍មកនេះ កម្ពុជាមានករណីឆ្លងថ្មីច្រើន ខណៈអ្នកស្លាប់មានជារៀងរាល់ថ្ងៃហើយកើនឡើងយ៉ាងគំហុកថែមទៀត។ ចំពោះ អ្នកជាសះស្បើយវិញ ក៏មានជារៀងរាល់ថ្ងៃដែរ តែមិនសមាមាត្រនឹងគ្នាសោះជាមួយនឹងចំនួនអ្នកឆ្លងជំងឺកូវីដ១៩ថ្មី។ គិតដល់ពេលនេះ កម្ពុជាមានអ្នកឆ្លងជំងឺកូវីដ១៩សរុបចំនួន៨ ១៩៣នាក់ ក្នុងនោះកំពុងសម្រាកព្យាបាលមានចំនួន៥ ២០៤នាក់ អ្នកជាសះស្បើយមានចំនួន២៩២៤នាក់ និងអ្នកស្លាប់ថ្មីបានកើនឡើងយ៉ាងរហ័សមែនទែនដល់ទៅចំនួន ៥៩នាក់ឯណោះ។ ទាំងអ្នកឆ្លងថ្មី អ្នកជាសះស្បើយ និងអ្នកស្លាប់ថ្មីដោយសារតែជំងឺកូវីដ១៩ទាំងនេះ គឺភាគច្រើនលើសលប់នៅក្នុងរាជធានីភ្នំពេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ