អាជ្ញាធរភ្នំពេញបង្ហាញអត្តសញ្ញាណអ្នកផ្ទុកកូវីដ១៩ ដើម្បីឲ្យអ្នកពាក់ព័ន្ធទៅធ្វើតេស្ត
អាជ្ញាធររាជធានីភ្នំពេញនៅថ្ងៃសៅរ៍ទី០៣មេសានេះ បានប្រកាសឲ្យអ្នកដែលពាក់ព័ន្ធនឹងអ្នករកឃើញថ្មីវិជ្ជមានកូវីដ១៩ទៅធ្វើតេស្តរកវីរុសកូវីដ១៩ ក៏ដូចជាតម្រូវឲ្យធ្វើចត្តាឡីស័កចំនួន១៤ថ្ងៃ។ នេះបើតាមសេចក្តីជូនដំណឹងរបស់រដ្ឋបាលរាជធានីភ្នំពេញ។ ជាមួយគ្នានេះ អាជ្ញាធរភ្នំពេញក៏បានសម្រេចបង្ហាញអត្តសញ្ញាណអ្នកដែលវិជ្ជមានកូវីដ១៩ទាំង៣៣នាក់នៅរាជធានីភ្នំពេញ ដែលជាអ្នករកឃើញថ្មីគិតត្រឹមថ្ងៃទី០២មេសាម្សិលមិញ។
ចុះផ្សាយនៅថ្ងៃ៖
ស្តាប់ - ០២:២៥
ខុសពីលើករាល់ដង នៅថ្ងៃនេះរដ្ឋបាលរាជធានីភ្នំពេញបានចេញនូវសេចក្តីប្រកាសបង្ហាញពីអត្តសញ្ញាណអ្នកដែលឆ្លងថ្មីនៃវីរុសកូវីដ១៩ពីព្រឹត្តិការណ៍សហគមន៍២០កុម្ភៈ។ អត្តសញ្ញាណប្រកាសរួមមាន ឈ្មោះ ភេទ អាយុ និងអាស័យដ្ឋានរស់នៅរបស់អ្នកវិជ្ជមានកូវីដ១៩ថ្មីចំនួន៣៣នាក់ នៅរាជធានីភ្នំពេញ ដែលរកឃើញគិតត្រឹមថ្ងៃទី០២ខែមេសា។
ជាមួយគ្នានេះ រដ្ឋបាលរាជធានីភ្នំពេញក៏បានប្រកាសឲ្យអ្នកដែលពាក់ព័ន្ធនឹងអ្នកដែលរកវិជ្ជមានថ្មីចំនួន៣៣នាក់នោះ មានភាពរហ័សក្នុងការទៅយកសំណាករកវីរុសកូវីដ១៩ទៅតាមទីតាំងក្នុងភូមិសាស្រ្តរាជធានីភ្នំពេញរួមមាន មន្ទីរពេទ្យមិត្តភាពខ្មែរ-សូវៀត មណ្ឌលសុខភាពចាក់អង្រែ វិទ្យាល័យបាក់ទូក វិទ្យាល័យបឹងត្របែក និងសាលាបឋមសិក្សាសុភមង្គល។
អ្នកនាំពាក្យរដ្ឋបាលរាជធានីភ្នំពេញ លោកម៉េត មាសភក្តី បានប្រាប់វិទ្យុបារាំងអន្តរជាតិ នៅថ្ងៃនេះថា ការបង្ហាញអត្តសញ្ញាណនេះ គឺជាយន្តការថ្មីមួយទៀត ដែលសមស្របទៅនឹងស្ថានភាពជំងឺកូវីដ១៩នៅរាជធានីភ្នំពេញបច្ចុប្បន្ន។ បើតាមអ្នកនាំពាក្យ ការបង្ហាញអត្តសញ្ញាណនឹងធ្វើឲ្យអ្នកដែលបានពាក់ព័ន្ធនឹងអ្នកវិជ្ជមានកូវីដ១៩ទទួលបានព័ត៌មានលឿន និងដើម្បីទប់ស្កាត់ការចម្លងបានរហ័ស។
អ្នកដែលរកឃើញវិជ្ជមានកូវីដ១៩ចំនួន៣៣នាក់នៅរាជធានីភ្នំពេញនេះ ជាចំនួនក្នុងចំណោមអ្នកដែលរកឃើញវិជ្ជមានកូវីដ១៩សរុបចំនួន៩៩នាក់នៅថ្ងៃទី០២ខែមេសា។ នេះបើតាមក្រសួងសុខាភិបាលនៅថ្ងៃនេះ។ ក្នុងនោះអ្នកឆ្លងនៅរាជធានីភ្នំពេញមាន ៣៣នាក់ ស្វាយរៀង ៤៤នាក់ កោះកុង ៨នាក់ កណ្តាល ៥នាក់ ព្រះសីហនុ ៤នាក់ ត្បូងឃ្មុំ ៤នាក់ និងខេត្តតាកែវ ១នាក់។ អ្នកដែលរកឃើញទាំង៩៩នាក់នេះ សុទ្ធតែជាអ្នកឆ្លងក្នុងព្រឹត្តិការណ៍សហគមន៍២០កុម្ភៈ។
តែយ៉ាងណា ទន្ទឹមនេះ ក្រសួងសុខាភិបាលក៏បានប្រកាសពីចំនួនអ្នកជាសះស្បើយពីជំងឺកូវីដ១៩ មានរហូតដល់៣២៩នាក់ ក្នុងនោះពីរនាក់ជាអ្នកដំណើរ និង៣២៧នាក់ជាអ្នកជាពីព្រឹត្តិការណ៍សហគមន៍២០កុម្ភៈ។ នេះជាតួលេខចំនួនអ្នកជាក្នុងចំនួនច្រើនរាប់ចាប់តាំងពីមានព្រឹត្តិការណ៍សហគមន៍២០កុម្ភៈមក។
ដូច្នេះ ជាតួលេខចុងក្រោយ កម្ពុជារកឃើញអ្នកវិជ្ជមានកូវីដ១៩សរុបចំនួន២៦៤៥នាក់ ព្យាបាលជាសះស្បើយ១៥៨៥នាក់ និងស្លាប់ចំនួន១៩នាក់។ ក្នុងចំណោមអ្នកស្លាប់១៩នាក់ មានបីនាក់ជាអ្នកស្លាប់ថ្មី ដោយពីរនាក់ត្រូវបានប្រកាសកាលពីម្សិលមិញ និងម្នាក់ទៀតត្រូវបានប្រកាសនៅព្រឹកថ្ងៃទី០៣មេសានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ