ក្រុមចោរចាប់ជំរិតបរទេស១៤នាក់ដែលបន្លំខ្លួនធ្វើជាគ្រូពេទ្យចុះយកសំណាក ត្រូវបានចាប់ខ្លួន
ជនបរទេសសរុប១៤នាក់ដែលបានបន្លំខ្លួនធ្វើជាក្រុមគ្រូពេទ្យចុះយកសំណាក ចាប់ជំរិតទារប្រាក់ពីជនជាតិចិននៅក្នុងទឹកដីកម្ពុជា ត្រូវបានចាប់ខ្លួន ដោយក្រុមកម្លាំងសមត្ថិកិច្ចចម្រុះនៅថ្ងៃទី២៥ ខែមីនា។ បើតាមស្នងការដ្ឋានគរបាលជាតិ បច្ចុប្បន្នជនសង្ស័យដែលជាជនបរទេសទាំង១៤នាក់នេះ កំពុងស្ថិតនៅក្នុងដំណាក់កាលសាកសួរ និងកសាងសំណុំរឿងតាមនិតិវិធី។
ចុះផ្សាយនៅថ្ងៃ៖
ស្តាប់ - ០១:៣៦
តាមរយៈគេហទំព័រផ្លូវការរបស់ស្នងការដ្ឋានគរបាលជាតិ លោកវរសេនីយ៍ឯក អេង សោភា ដែលជាប្រធានការិយាល័យនគរបាលព្រហ្មទណ្ឌកំរិតធ្ងន់ នៅថ្ងៃទី២៦មីនានេះ បានឲ្យដឹងថា សំណុំរឿងឧក្រិដ្ឋកម្មបន្លំចុះយកសំណាកមិនធ្លាប់មានបែបនេះ ត្រូវបានសមត្ថកិច្ចឃាត់ខ្លួនជនសង្ស័យបរទេសចំនួន ១៤នាក់ ក្នុងនោះមានជនជាតិចិន ០៧នាក់ និងជនជាតិវៀតណាម ០៧នាក់។
លោកវរសេនីយ៍ឯក បានឲ្យដឹងទៀតថា កាលពីយប់ថ្ងៃទី២០មីនា ក្រុមចោរចាប់ជំរិតខាងលើ បានចូលទៅចាប់ជនរងគ្រោះដែលជាជនជាតិចិន ស្នាក់នៅសណ្ឋាគារព្រីនស៍ ស្ថិតនៅក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ និងដោយបានប្រើល្បិចបន្លំធ្វើជាក្រុមគ្រូពេទ្យចុះមកយកសំណាកពីជនរងគ្រោះ។
ក្រោយមក ក្រុមចោរទាំងនោះ បាននាំជនរងគ្រោះទៅបង្ខាំងទុកនៅសណ្ឋាគារ SKAYLINE នៅក្នុងខណ្ឌ៧មករា រាជធានីភ្នំពេញ ដោយជម្រិតទារប្រាក់ចំនួន ៣ម៉ឺនដុល្លារអាមេរិក ជាថ្នូរទៅនឹងការដោះលែង។
លោកវរសេនីយ៍ឯក អេង សោភា បន្តថា ក្រុមកម្លាំងសមត្ថកិច្ចចម្រុះ បានស្រាវជ្រាវឈានទៅដល់ការឃាត់ជនសង្ស័យនៅសណ្ឋាគារប៉ូស៊ីកាណូប៊ូទិក សង្កាត់ផ្សារកណ្តាល១ ខណ្ឌដូនពេញ រាជធានីភ្នំពេញ អមដោយវត្ថុតាងមួយចំនួនដូចជា រថយន្តម៉ាកស្តារិកមួយគ្រឿង ដែលជារថយន្តធ្វើសកម្មភាព ខ្នោះដៃចំនួន០៣គូរ ដំបងឆក់០១ កាំបិតកៃ០៤ និងដំបងដែករលាស់ចំនួន០៤ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ