កូវីដ-១៩៖ មនុស្ស៧នាក់ បានស្លាប់ក្រោយព្រឹត្តិការណ៍ឆ្លងសហគមន៍២០កុម្ភៈ
ប្រទេសកម្ពុជានៅថ្ងៃព្រហស្បតិ៍នេះ បានបន្ថែមតួលេខអ្នកស្លាប់ថ្មី២នាក់ទៀតហើយ ដោយសារជំងឺកូវីដ-១៩ ស្របពេលដែលព្រឹត្តិការណ៍ឆ្លងសហគមន៍២០កុម្ភៈ នៅមិនទាន់អាចគ្រប់គ្រងបាននៅឡើយ។ ការស្លាប់ដោយសារកូវីដ-១៩ថ្មី នៅថ្ងៃនេះចំនួន២ករណីបន្ថែមទៀត បានធ្វើឲ្យចំនួនអ្នកស្លាប់សរុបកើនដល់ ៧នាក់ ក្នុងនោះម្នាក់ជាជនជាតិចិន និង៦នាក់ផ្សេងទៀតជាពលរដ្ឋខ្មែរ។ នេះបើតាមសេចក្តីប្រកាសរបស់ក្រសួងសុខាភិបាល។
ចុះផ្សាយនៅថ្ងៃ៖
ស្តាប់ - ០២:២៥
បុរស២នាក់ ដែលបានបាត់បង់ជីវិតដោយសារជំងឺកូវីដ-១៩ នៅថ្ងៃនេះ គឺម្នាក់ជាជនជាតិខ្មែរ និងម្នាក់ទៀតជាជនជាតិចិន។ បុរសជនជាតិខ្មែរ វ័យ៣៨ឆ្នាំ គឺជាពលរដ្ឋរស់នៅក្នុងខណ្ឌពោធិ៍សែនជ័យ រាជធានីភ្នំពេញ គឺជាពិធីករសិល្បៈ ដែលធ្លាប់មានប្រវត្តិជំងឺលើសឈាម និងមានជំងឺធាត់កំរិត១ ហើយលទ្ធផលវេជ្ជសាស្ត្របង្ហាញថាបុរសរូបនេះ បានរលាកសួតធ្ងន់ធ្ងរទាំងសងខាង និងខ្សោយសួតខ្លាំង។ អ្នកស្លាប់រូបនេះ ត្រូវបានរកឃើញថាឆ្លងមេរោគកូវីដ-១៩ នៅថ្ងៃទី១៦ ខែមីនា កន្លងទៅនេះ។
ដោយឡែកជនជាតិចិនដែលស្លាប់ដោយសារជំងឺកូវីដដំបូងនៅក្នុងប្រទេសកម្ពុជា ត្រូវគេដឹងថាជាបុគ្គលិកបំរើការងារនៅក្នុងកាស៊ីណូ ស្ថិតនៅក្នុងស្រុកកោះធំ ខេត្តកណ្តាល វ័យ៤៣ឆ្នាំ។ ក្រុមគ្រូពេទ្យបាន រកឃើញថា អ្នកជំងឺមានការរលាកសួតធ្ងន់ធ្ងរខ្លាំងទាំងសងខាង និងខ្សោយសួតខ្លាំងរហូតដល់ប្រើម៉ាស៊ីនជំនួយដង្ហើម ដោយសារមេរោគកូវី-១៩ វាយលុក។ អ្នកជំងឺជនជាតិចិនរូបនេះ ត្រូវបានធ្វើតេស្ត និងរកឃើញថាមានមេរោគកូវីដ-១៩ នៅថ្ងៃទី១២ខែមីនា។
មន្ត្រីក្រសួងសុខាភិបាលកម្ពុជា បានថ្លែងប្រាប់វិទ្យុបារាំងអន្តរជាតិ RFI កន្លងទៅនេះថា ក្នុងចំណោមអ្នកជំងឺកូវីដ-១៩ ដែលកំពុងសម្រាកព្យាបាល មានអ្នកជំងឺមួយចំនួន បានស្ថិតនៅក្នុងស្ថានភាពធ្ងន់ធ្ងរ ដែលតាមរយៈនេះ មន្ត្រីតែងរំលឹកឲ្យពលរដ្ឋខ្មែរ មានការប្រុងប្រយ័ត្ន ប្រកាន់ខ្ជាប់នូវវិធានការសុខាភិបាលឲ្យបានជាក់លាក់។
សូមរំលឹកថា ដោយសារព្រឹត្តិការណ៍ផ្ទុះការឆ្លងរាលដាលកូវីដ-១៩ សហគមន៍ ២០កុម្ភៈ នៅមិនទាន់អាចគ្រប់គ្រងបាននៅឡើយ ក្រសួងសុខាភិបាលកាលពីថ្ងៃម្សិលមិញ បានប្រកាសដាក់រាជធានីភ្នំពេញ និងខេត្តចំនួន៤ ដែលមានហានិភ័យខ្ពស់ នៃការឆ្លងជំងឺកូវីដ-១៩ ឲ្យជាប់កាតព្វកិច្ចពាក់ម៉ាស និងគម្លាតសុវត្ថិភាពសង្គម។ សូមរំលឹកថា ចាប់តាំងពីថ្ងៃទី១១ ខែមីនា មកទល់ថ្ងៃនេះ មានអ្នកជំងឺស្លាប់ដោយកូវីដ-១៩ សរុបចំនួន៧នាក់ ក្នុងនោះ ៥នាក់ជាបុរស និងមានជនជាតិចិនម្នាក់ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ