ប្រមុខរដ្ឋាភិបាលអនុញ្ញាតឲ្យមានការឈប់សម្រាប់ពិធីបុណ្យចូលឆ្នាំខ្មែរ តែការជួបជុំត្រូវធ្វើក្នុងលក្ខខ័ណ្ឌសុវត្ថិភាព
ប្រមុខរដ្ឋាភិបាលកម្ពុជា លោកនាយករដ្ឋមន្រ្តីហ៊ុន សែន បានសម្រេចអនុញ្ញាតឲ្យប្រជាពលរដ្ឋឈប់សម្រាកនៅពិធីបុណ្យចូលឆ្នាំប្រពៃណីជាតិខ្មែរ នាថ្ងៃទី១៤ ១៥ និង១៦ ខែមេសាខាងមុខនេះ។ តែយ៉ាងការឈប់សម្រាកនេះ ពលរដ្ឋគ្រប់រូបត្រូវប្រកាន់ខ្ជាប់នូវវិធានសុខាភិបាលដែលធ្លាប់មានមក ព្រោះថាកម្ពុជាក៏កំពុងស្ថិតនៅក្នុងបរិបទនៃការឆ្លងជំងឺកូវីដ១៩ជាសហគមន៍។
ចុះផ្សាយនៅថ្ងៃ៖
ស្តាប់ - ០១:៤៤
តាមរយៈសារាចរណែនាំរបស់ប្រមុខរដ្ឋាភិបាល លោកនាយករដ្ឋមន្រ្តី ហ៊ុន សែន ចុះនៅថ្ងៃអាទិត្យទី២១នេះ មន្រ្តីរាជការទាំងអស់នឹងអនុញ្ញាតឲ្យឈប់សម្រាកចំនួន៣ថ្ងៃ នៅក្នុងពិធីបុណ្យចូលឆ្នាំប្រពៃណីជាតិខាងមុខនេះ។
ដោយឡែកបើតាមសារាចរដដែរ ចំពោះបុគ្គលិក កម្មករ និងនិយោជិត ដែលបម្រើការងារក្នុងវិស័យឯកជនវិញ អាចមានជម្រើសពីរយ៉ាងសម្រាប់ការឈប់សម្រាកនេះ។ ដោយអ្នកដែលកំពុងបម្រើការងារក្នុងវិស័យឯកជនទាំងអស់ អាចធ្វើការជ្រើសរើសយកការឈប់សម្រាកនៅចំថ្ងៃនៃពិធីបុណ្យចូលឆ្នាំប្រពៃណីខ្មែរដូចនឹងមន្រ្តីរាជការដែរ។
រីមួយជម្រើសទៀត អ្នកធ្វើការក្នុងវិស័យឯកជនអាចពិភាក្សាជាមួយថៅកែខ្លួន ដោយលើកការឈប់សម្រាកទៅពេលណាមួយខាងមុខ ឬរហូតដល់ពិធីបុណ្យភ្ជុំបិណ្ឌតែម្តង។ នេះបើតាមសារាចរណែនាំ។ ក៏ប៉ុន្តែការព្រៀមព្រៀងនេះ គឺតម្រូវឲ្យស្របទៅតាមលក្ខខ័ណ្ឌនៃច្បាប់ការងារកម្ពុជា។
យ៉ាងណាមិញ ការអនុញ្ញាតឲ្យមានការឈប់សម្រាកសម្រាប់ពិធីបុណ្យចូលឆ្នាំខ្មែរនាពេលខាងមុខនេះ បានធ្វើឡើងស្របពេលដែលកម្ពុជាកំពុងទប់ទល់នឹងការឆ្លងជំងឺកូវីដ១៩ជាសហគមន៍ជាលើកទី៣ ឬព្រឹត្តិការណ៍សហគមន៍២០កុម្ភៈ។ នៅទន្ទឹមនេះ ប្រមុខរដ្ឋាភិបាលកម្ពុជាក៏បានណែនាំឲ្យអាជ្ញាធរគ្រប់ថ្នាក់ធ្វើយ៉ាងណា ធានាបាននូវសុវត្ថិភាព សណ្តាប់សាធារណៈ និងទប់ស្កាត់ការចម្លងជំងឺកូវីដ១៩ ឲ្យបានម៉ឺងម៉ាត់នៅតាមទីវត្តអារាម រមណីយដ្ឋាន និងទីតាំងណា ដែលមានការជួបជុំអ៊ូអរ។
ម្យ៉ាងទៀត សម្រាប់ពលរដ្ឋ រដ្ឋាភិបាលក៏បានក្រើនរំឮកពីការចូលរួមទប់ស្កាត់ការចម្លងជំងឺកូវីដ១៩ ដោយព្យាយាមកាត់បន្ថយការដើរហើរណាដែលមិនចាំបាច់ ចៀសវាងការរៀបចំពិធីសាសនា និងការជួបជុំ ដែលមានសភាពអ៊ូអរ និងអនុវត្តតាមវិធានការរបស់ក្រសួងសុខាភិបាល នៅអំឡុងពេលពិធីបុណ្យចូលឆ្នាំប្រពៃណីខ្មែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ