កម្ពុជាបានរកឃើញកងទ័ពម្នាក់ឆ្លងកូវីដ១៩ ក្រោយចាក់វ៉ាក់សាំងការពារ២លើករួចមក
កងទ័ពម្នាក់កម្ពុជាត្រូវបានរកឃើញឆ្លងជំងឺកូវីដ១៩ បើទោះបីរូបគេបានចាក់វ៉ាក់សាំងបង្ការជំងឺកូវីដ១៩របស់ចិនដល់ទៅ២ដងរួចទៅហើយក្តី។ នេះបើតាមលោកហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោកដែលបានបញ្ជាក់ឱ្យដឹងកាលពីយប់ថ្ងៃពុធ។ ការឃើញឆ្លងជាថ្មីនេះ គឺបន្ទាប់ពីកងទ័ពកម្ពុជាម្នាក់កំពុងសម្រាកព្យាបាលជំងឺកូវីដ១៩នៅក្នុងមន្ទីរពេទ្យ ក្រោយពីឆ្លងជំងឺដ៏កាចសាហាវនេះក្នុងខណៈដែលរូបគេបានចាក់វ៉ាក់សាំងលើកទី១រួចរាល់។
ចុះផ្សាយនៅថ្ងៃ៖
ស្តាប់ - ០២:២៥
នេះ អាចចាត់ទុកថាជាករណីទី១ហើយដែលកម្ពុជារកឃើញមានអ្នកឆ្លងជំងឺកូវីដ១៩ បន្ទាប់ពីបានចាក់វ៉ាក់សាំងការពារ២ដងរួចរាល់ទៅតាមការណែនាំរបស់ក្រុមគ្រូពេទ្យ។ ករណីឆ្លងថ្មីនេះ គឺកើតឡើងលើទាហានម្នាក់នៅអគ្គបញ្ជាការដ្ឋានកងយោធពលខេមរភូមិន្ទដែលជាសិក្ខាកាមនៅសាកលវិទ្យាល័យការពារជាតិ ។ លោកហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោក និងជាកូនប្រុសច្បងរបស់លោនាយរកដ្ឋមន្រ្តីហ៊ុន សែន មិនបានលម្អិតឱ្យដឹងពីមូលហេតុដែលអាចឆ្លងដល់អ្នកចាក់វ៉ាក់សាំង២ដងរួចមកហើយនេះទេ។
ក៏ប៉ុន្តែ ប្រឈមនឹងការឆ្លងកូវីដ១៩ថ្មីនេះ លោកហ៊ុន ម៉ាណែត បានដាស់តឿនដល់កងទ័ពទាំងអស់ឱ្យបន្តការប្រុងប្រយ័ត្នឱ្យបានខ្ពស់ និងអនុវត្តវិធានការពារកូវីដ១៩ឱ្យបានខ្ជាប់ខ្ជួន។ ជាមួយគ្នានេះ លោកក៏បានបញ្ជាឱ្យមានការរៀបចំកន្លែងធ្វើចត្តាឡីស័កដាច់ដោយឡែកនៅក្នុងបន្ទាយកងទ័ពសម្រាប់កងទ័ពណាដែលពាក់ព័ន្ធជាមួយអ្នកឆ្លងកូវីដ១៩។ លោកក៏បានបញ្ជាឱ្យរៀបចំក្រុមគ្រូពេទ្យយោធាសម្រាប់តាមដាន និងពិនិត្យពិច័យលើអ្នកត្រូវធ្វើចត្តាឡីស័កផងដែរ។
បន្ថែមពីលើលោកហ៊ុន ម៉ាណែតនេះ លោកទៀ បាញ់ ដែលជារដ្ឋមន្រ្តីក្រសួងការពារជាតិកម្ពុជាវិញ ក៏បានចេញមកប្រាប់ឱ្យកងទ័ពកម្ពុជាទាំងអស់បង្កើនការការពារខ្លួនឱ្យបានខ្ពស់ថែមទៀត។ លោកទៀ បាញ់ បានសង្កត់ធ្ងន់ទៅលើក្រុមការងារចាក់វ៉ាក់សាំងរបស់ក្រសួងការពារជាតិដោយប្រាប់ឱ្យត្រូវបង្កើនការការពារពេលជួបសម្ភាសន៍ និងពេលផ្តល់ការចាក់វ៉ាក់សាំង។ ជាថ្មីម្តងទៀត លោកប្រមុខការពារជាតិកម្ពុជាក៏បានដាស់តឿនជារួមឱ្យមានការពាក់ម៉ាសឱ្យ១០០% ធ្វើអនាម័យឱ្យបានទៀតទាត់ និងរក្សាគម្លាត បើទោះបីបានចាក់វ៉ាក់សាំងរួចហើយក៏ដោយ។
គិតមកដល់ថ្ងៃទី១៧ ខែមីនា ក្រសួងការពារជាតិកម្ពុជាបានចាក់វ៉ាក់សាំងបង្ការជំងឺកូវីដ១៩ Sinopharm របស់ចិនលើកទី១ដល់កងកម្លាំងកម្ពុជាចំនួន១០៩,៥២៦នាក់ ខណៈចាក់លើកទី២ បានចំនួន៧១,៦១៤នាក់។ នៅពេលនេះ កម្ពុជាកំពុងរង់ចាំវ៉ាក់សាំងជំនួយចិនចំនួន៤០ម៉ឺនដូសបន្ថែមទៀតដែលនឹងមកដល់នៅខែក្រោយនេះ។ ប្រមុខរដ្ឋាភិបាលកម្ពុជាក៏បានអះអាងឱ្យដឹងកាលពីដើមសប្តាហ៍នេះដែរថា នៅពេលខាងមុខ កម្ពុជាក៏អាចនឹងមានលទ្ធភាពទទួលបានវ៉ាក់សាំងបង្ការជំងឺកូវីដ-១៩ ប្រមាណ ១.៥លានដូសបន្ថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ