អាជ្ញាធរកំពុងស្រាវជ្រាវ និងអាចអនុវត្តច្បាប់លើបុគ្គល២នាក់ ដែលរកឃើញកូវីដ១៩ ក្រោយទៅចូលរួមពិធីការនៅខេត្ត
នៅយប់មិញនេះ បុគ្គល២នាក់ ដែលជាអ្នករស់នៅរាជធានីភ្នំពេញបានធ្វើឱ្យមានការភ្ញាក់ផ្អើល និងរន្ធត់យ៉ាងខ្លាំងដោយសារតែពួកគេត្រូវបានរកឃើញវិជ្ជមានជំងឺកូវីដ១៩ បន្ទាប់ពីបានវិលត្រឡប់មកពីចូលរួមមង្គលការ២កន្លែង នៅក្នុងខេត្តតាកែវ និងខេត្តកំពត។ ពួកគេទាំង២នាក់ត្រូវបានបញ្ជូនទៅមន្ទីរពេទ្យ ហើយអ្នកពាក់ព័ន្ធផ្សេងទៀតកំពុងត្រូវបានស្រាវជ្រាវយកសំណាកទៅធ្វើតេស្តរកជំងឺកូវីដ១៩។ ចំពោះបញ្ហានេះ រដ្ឋមន្រ្តីក្រសួងយុត្តិធម៌កម្ពុជា បានអះអាងឱ្យដឹងថា នៅពេលនេះ អាជ្ញាធរមានសមត្ថកិច្ចកំពុងស្រាវជ្រាវលើករណីបុគ្គលទាំង២នាក់នេះហើយ។
ចុះផ្សាយនៅថ្ងៃ៖
ស្តាប់ - ០២:៤៩
គឺនៅក្នុងសន្និសីទសារព័ត៌មាននាព្រឹកថ្ងៃចន្ទនេះ លោកកើត រិទ្ធ រដ្ឋមន្រ្តីក្រសួងយុត្តិធម៌កម្ពុជាបានអះអាងថា ករណីបុគ្គល២នាក់ ដែលបានទៅចូលរួមមង្គលការគេនៅឯខេត្ត ហើយក្រោយមកបានរកឃើញមានផ្ទុកជំងឺកូវីដ១៩នោះ គឺកំពុងត្រូវបានស្រាវជ្រាវពីការប្រព្រឹត្តរបស់ពួកគេហើយ។ លោកបានគូសបញ្ជាក់ខ្លីថា ករណីនេះទុកលទ្ធភាពឱ្យអាជ្ញាធរ មានសមត្ថកិច្ច និងទុកឱ្យផ្លូវច្បាប់ពិចារណាទៅតាមលក្ខខណ្ឌនៃការល្មើសរបស់ពួកគេនីមួយៗ។
ប៉ុន្តែ លោក កើត រិទ្ធ បានឆ្លៀតសង្កត់ធ្ងន់ថា ច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ១៩ ដែលកំណត់ដាក់ពិន័យ និងដាក់ទោសទណ្ឌក្នុងពន្ធនាគារនោះ គឺបានចូលធរមាន និងអនុវត្តបានហើយតាំងពីថ្ងៃទី១២ ខែមីនា មក។
កាលពីយប់ថ្ងៃអាទិត្យ បុគ្គលពីរនាក់ ដែលរស់នៅរាជធានីភ្នំពេញ បានបង្កឱ្យមានការភ្ញាក់ផ្អើល និងរន្ធត់មែនទែនតែម្តង នៅតាមបណ្តាញសង្គមហ្វេសប៊ុកដោយសារតែពួកគេត្រូវបានរកឃើញមានផ្ទុកជំងឺកូវីដ១៩។ បុគ្គលម្នាក់ឈ្មោះ កក្កដា សុភ័ណ្ឌ អតីតសង្ឃ បានប្រកាសខ្លួនឯងថា រូបគេមានផ្ទុកជំងឺកូវីដ១៩ តែមុនរកឃើញនេះ រូបគេបានទៅចូលរួមមង្គលការគេនៅខេត្តតាកែវ ហើយតាមរូបភាព និងវីដេអូតាមហ្វេសប៊ុក គឺបុគ្គលម្នាក់នេះមិនបានពាក់ម៉ាសការពារនោះទេ។ អ្នកជាប់ពាក់ព័ន្ធនឹងបុគ្គលរូបនេះ ត្រូវបានបង្ហាញឱ្យដឹងថា មានប្រហែល៤០០នាក់។
ចំណែក បុគ្គលម្នាក់ទៀត គឺជាអ្នករស់នៅក្នុងខណ្ឌបឹងកេងកង ក៏ត្រូវបានរកឃើញវិជ្ជមានកូវីដ១៩ កាលពីយប់ថ្ងៃអាទិត្យដូចគ្នាដែរ។ ប៉ុន្តែ នៅពេលក្រុមគ្រូពេទ្យទៅយករូបគេទៅព្យាបាលនៅមន្ទីរពេទ្យ តែបែរជាមិនឃើញ ដោយបុគ្គលម្នាក់នេះបានធ្វើដំណើរទៅចូលរួមមង្គលការគេ នៅឯស្រុកឈូក ក្នុងខេត្តកំពតកាលពីរសៀលថ្ងៃអាទិត្យ។ លុះវិលត្រឡប់មកវិញ បុគ្គលម្នាក់នេះ បានរួមដំណើរជាមួយមនុស្ស៥នាក់ ផ្សេងទៀត តាមរថយន្តឈ្នួលមួយគ្រឿង។ មនុស្ស៥នាក់ និងអ្នកបើករថយន្តឈ្នួលផង សុទ្ធតែត្រូវបានក្រុមគ្រូពេទ្យយកសំណាកទៅធ្វើតេស្តរកជំងឺកូវីដ១៩ និងឱ្យធ្វើចត្តាឡីស័ក។
ច្បាប់ថ្មីស្តីពីវិធានការទប់ស្កាត់ការឆ្លងរាលដាលនៃជំងឺកូវីដ១៩ និងជំងឺឆ្លងកាចសាហាវ និងប្រកដោយគ្រោះថ្នាក់ធ្ងន់ធ្ងរផ្សេងទៀត បានកំណត់ថា អ្នកគេចវេះពីការធ្វើចត្តាឡីស័ក ឬគេចចេញពីទីកន្លែងធ្វើចត្តាឡីស័ក ក្នុងអំឡុងពេលធ្វើចត្តាឡីស័ក ដែលកំណត់ដោយក្រសួងសុខាភិបាល ឬអាជ្ញាធរមានសមត្ថកិច្ច គឺត្រូវទទួលពិន័យអន្តរការណ៍តាមការកំណត់នៅក្នុងអនុក្រឹត្យ។
ប៉ុន្តែ ពួកគេនឹងត្រូវផ្តន្ទាទោសដាក់ពន្ធនាគារពី៦ខែ ទៅ ៣ឆ្នាំ និងពិន័យជាប្រាក់ពី ២លានរៀល ទៅ ១០លានរៀល កាលបើអំពើខាងលើនេះបានបណ្តាលឱ្យមានការចម្លងជំងឺកូវីដ១៩ ដល់អ្នកដទៃ។ ប៉ុន្តែច្បាប់នេះ ក៏បើកផ្លូវឱ្យពួកគេទទួលបានការសម្រាល ឬលើកលែងការទទួលខុសត្រូវព្រហ្មទណ្ឌផងដែរ បើសិនពួកគេសហការជាមួយអាជ្ញាធរ ដើម្បីទប់ស្កាត់ការឆ្លងរាលដាលនៃជំងឺកូវីដ១៩ បានទាន់ពេលវេលានោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ