អាជ្ញាធរក្រុងភ្នំពេញត្រៀមដើមឈើ១០ម៉ឺនដើមសម្រាប់ដាំបង្កើតជាឧទ្យានធម្មជាតិទំហំ៧៥ហិកតានៅបឹងតាមោក
សាលារាជធានីភ្នំពេញបានត្រៀមកូនឈើប្រមាណជា១០ម៉ឺនដើមរួចរាល់ហើយ ដើម្បីយកទៅដាំលើផ្ទៃទំហំ៧៥ហិកតាបង្កើតជាសួន និងឧទ្យានជាតិបែបធម្មជាតិនៅបឹងតាមោក។ កូនឈើទាំងនេះ ត្រូវបានលោកឃួង ស្រេង អភិបាលរាជធានីភ្នំពេញបង្ហាញជាសាធារណៈតាមបណ្តាញសង្គមហ្វេសប៊ុកកាលពីថ្ងៃសៅរ៍ ម្សិលមិញនេះ។ តាមគម្រោង ឧទ្យាននេះនឹងត្រូវសាងសង់ឱ្យចេញជារូបរាងឡើងនៅក្នុងឆ្នាំ២០២៣ ប៉ុន្តែការរីករាលដាលនៃជំងឺកូវីដ១៩បានធ្វើឱ្យគម្រោងនេះស្ថិតក្នុងភាពមិនច្បាស់លាស់ទៅវិញ។
ចុះផ្សាយនៅថ្ងៃ៖
ស្តាប់ - ០២:០៩
លោកឃួង ស្រេង អភិបាលរាជធានីភ្នំពេញ បានអះអាងប្រាប់វិទ្យុបារាំងអន្តរជាតិនៅព្រឹកថ្ងៃអាទិត្យនេះថា ភាពមិនច្បាស់លាស់នៃកាលបរិច្ឆេទលេចចេញជារូបរាងនៃសួន និងឧទ្យានជាតិបែបធម្មជាតិនៅបឹងតាមោកនេះ គឺដោយសារការបន្តរីករាលដាលឥតឈប់ឈរនៃជំងឺកូវីដ១៩នៅកម្ពុជា។ លោកថា រដ្ឋាភិបាលកម្ពុជាបានបង្វែរកញ្ចប់ថវិកាដែលគ្រោងចំណាយទៅលើការបង្កើតសួន និងឧទ្យានធម្មជាតិនៅបឹងតាមោកនេះទៅប្រើប្រាស់លើភាពចាំបាច់នានា ដើម្បីបង្ការ និងទប់ស្កាត់ការឆ្លងរាលដាលនៃជំងឺកូវីដ១៩នៅក្នុងប្រទេសកម្ពុជា។
ទោះជាបែបនេះក្តី លោកអភិបាលរាជធានីភ្នំពេញ បានលើកឡើងថា លោកបានព័ទ្ធ និងចាក់ដីបានជិតគ្រប់ទំហំផ្ទៃដីសម្រាប់សាងសង់សួន និងឧទ្យានធម្មជាតិហើយ ពោល គឺនៅក្នុងអំឡុងចុងខែមេសា ខាងមុខនេះ អាចនឹងព័ទ្ធបានគ្រប់ចំនួនផ្ទៃដី៧៥ហិកតានៅលើបឹងតាមោក។ មិនតែប៉ុណ្ណោះ បើតាមលោកឃួង ស្រេង អាជ្ញាធររាជធានីភ្នំពេញក៏បានត្រៀមកូនឈើដល់ទៅ១០ម៉ឺនដើមរួចរាល់ហើយដែរសម្រាប់ដាំបង្កើតជាសួន និងឧទ្យានជាតិបែបធម្មជាតិនេះ។
សូមបញ្ជាក់ថា រដ្ឋាភិបាលកម្ពុជាកាលពីខែមីនា ឆ្នាំ២០២០កន្លងទៅ បានសម្រេចយល់ព្រមផ្តល់ផ្ទៃបឹងតាមោកទំហំ ៧៥ ហិកតាស្ថិតនៅខណ្ឌព្រែកព្នៅ រាជធានីភ្នំពេញ ប្រគល់ឱ្យសាលារាជធានីភ្នំពេញ ដើម្បីរៀបចំបង្កើតជាសួន និងឧទ្យានធម្មជាតិសាធារណៈនៅក្នុងរាជធានីភ្នំពេញ។ ការកាត់ផ្ទៃដីនេះ ធ្វើឡើងបន្ទាប់ពីរដ្ឋាភិបាលកម្ពុជាបានកាត់ផ្ទៃដីមួយចំនួនរួចទៅហើយប្រគល់ទៅឱ្យស្ថាប័នរដ្ឋ និងក្រុមហ៊ុនឯកជននាពេលកន្លងមក។
ការកាត់ផ្ទៃដីបឹងតាមោកជាបន្តបន្ទាប់នេះ បានរងនូវការរិះគន់យ៉ាងខ្លាំងពីសំណាក់អង្គការសង្គមស៊ីវិលមួយចំនួននៅកម្ពុជា។ ពួកគេមើលឃើញថា ការលុបបឹងតាមោកនេះ នឹងបង្កើតឱ្យមានទឹកជំនន់ជន់លិចទីក្រុងភ្នំពេញជាមិនខាន។ ប៉ុន្តែ រដ្ឋាភិបាលកម្ពុជាបានអះអាងថា ការកាត់ផ្ទៃដីបឹងតាមោកនេះ គឺជារឿងចាំបាច់ និងក៏បានគិតគូរច្បាស់លាស់ហើយដែរ។ បឹងតាមោកមានទំហំសរុបចំនួន ៣.២ពាន់ហិកតា លាតសន្ធឹងលើខណ្ឌចំនួន ២ សង្កាត់ចំនួន ៦ និងភូមិចំនួន ២៥។ បច្ចុប្បន្ននេះផ្ទៃបឹងទំហំជាង៥រយហិកតាហើយ ត្រូវបានកាត់ទៅឲ្យស្ថាប័នរដ្ឋ និងឯកជនធ្វើជាកម្មសិទ្ធិ
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ