ការចរចាកិច្ចព្រមព្រៀងពាណិជ្ជកម្មសេរីទ្វេភាគីរវាងកម្ពុជា-អឺរ៉ាស៊ាន មានភាពលំបាកជាងកិច្ចព្រមព្រៀងផ្សេង
ការចរចាកិច្ចព្រមព្រៀងពាណិជ្ជកម្មសេរីទ្វេភាគី FTA រវាងកម្ពុជា និងបណ្តាប្រទេសនៅក្នុងសហភាពសេដ្ឋកិច្ចអឺរ៉ាស៊ាន អាចមានភាពលំបាកជាងកិច្ចព្រមព្រៀងពាណិជ្ជកម្មសេរីទ្វេភាគី ដែលកម្ពុជាធ្លាប់បានសម្រេចជាមួយចិន និងកូរ៉េខាងត្បូង។ នេះជាការគូសបញ្ជាក់របស់លោក ថុល ណារ៉ា អគ្គនាយករងនៃអគ្គនាយកដ្ឋានពាណិជ្ជកម្មអន្តរជាតិ នៃក្រសួងពាណិជ្ជកម្ម ប្រាប់វិទ្យុបារាំងអន្តរជាតិនៅថ្ងៃអាទិត្យទី១៤មីនានេះ។
ចុះផ្សាយនៅថ្ងៃ៖
ស្តាប់ - ០២:៣២
ការចរចាជុំវិញកិច្ចព្រមព្រៀងពាណិជ្ជកម្មសេរីទេ្វភាគី FTA រវាងកម្ពុជា និងបណ្តាប្រទេសទាំង៥នៅក្នុងសហភាពសេដ្ឋកិច្ចអឺរ៉ាស៊ាន អាចនឹងជួបការលំបាកច្រើនសម្រាប់ភាគីទាំងសងខាង ព្រោះថាបណ្តាប្រទេសទាំង៥ រួមមាន រុស្ស៊ី បេឡារុស អាមេនី កាហ្សាក់ស្ថាន និងកៀហ្ស៊ីស៊ីស្ថាន មាននីតិពាណិជ្ជកម្មខុសៗគ្នា និងការវាយតម្លៃលើផលចំណេញខុសៗគ្នា។ ការចរចានេះ មានលក្ខណៈស្មុគស្មាញខុសពីការចរចាកិច្ចព្រមព្រៀងដែលកម្ពុជាធ្លាប់សម្រេចបានកន្លងមក ជាមួយភាគីចិន និងភាគីកូរ៉េខាងត្បូង ដែលជាកិច្ចព្រមព្រៀងទ្វេភាគីប៉ុណ្ណោះ។ ម្យ៉ាងវិញសម្រាប់ភាគីកម្ពុជា ក៏ត្រូវសិក្សាមើលថា អាចនាំចេញអ្វីបានខ្លះទៅបណ្តាប្រទេសទាំង៥នោះ។ នេះជាការគូសបញ្ជាក់របស់លោក ថុល ណារ៉ា អគ្គនាយករងនៃអគ្គនាយកដ្ឋានពាណិជ្ជកម្មអន្តរជាតិ ប្រាប់វិទ្យុបារាំងអន្តរជាតិ នៅថ្ងៃអាទិត្យ ទី១៤មីនានេះ។
បើតាមលោក ថុល ណារ៉ា ការរាលដាលនៃជំងឺកូវីដ១៩ជាការរាលដាលសកលដែលបង្អាក់ការជួបប្រជុំរវាងភាគីទាំងសងខាងនាពេលកន្លងមកជាបន្តបន្ទាប់ ក៏ប៉ុន្តែយ៉ាងណា ភាគីកម្ពុជាក៏បានបញ្ចប់នូវរបាយការណ៍សិក្សារបស់ខ្លួន និងរង់ចាំការវាយតម្លៃត្រលប់មកវិញពីភាគីសហភាពសេដ្ឋកិច្ចអឺរ៉ាស៊ាន មុននឹងឈានដល់ការបើកចរចាពីកិច្ចព្រមព្រៀងពាណិជ្ជកម្មសេរីទ្វេភាគីរវាងកម្ពុជា និងអឹរ៉ាស៊ាន។
គិតមកដល់ពេលនេះ កម្ពុជាបានជួបប្រជុំជាមួយគណៈកម្មាការសេដ្ឋកិច្ចអឺរ៉ុប-អាស៊ី ចំនួន៣លើករួចមកហើយ ដោយការពិភាក្សាចុងក្រោយបានធ្វើឡើងកាលពីថ្ងៃទី១០មីនា ក្នុងគោលបំណងពិនិត្យលើនីតិគយពាណិជ្ជកម្ម ប្រព័ន្ធអនុគ្រោះពន្ធរបស់អឺរ៉ាស៊ានដល់កម្ពុជា ព្រមទាំងនីតិចរចាជុំវិញកិច្ចព្រមព្រៀង FTA នេះផងដែរ ក៏ប៉ុន្តែលោក ថុល ណារ៉ា ថាកម្ពុជាមិនទាន់អាចសន្មតបានទេថា ភាគីទាំងពីរនឹងអាចបើកកិច្ចចរចា FTA នៅពេលណាបាននៅឡើយ។
បើតាមរបាយការណ៍ក្រសួងពាណិជ្ជកម្ម កាលពីឆ្នាំ២០២០ ទំហំពាណិជ្ជកម្មរវាងកម្ពុជានិងសហភាពសេដ្ឋកិច្ចអឺរ៉ុប-អាស៊ី សម្រេចបានបានក្នុងរង្វង់ទឹកប្រាក់ ៦៧លានដុល្លារអាមេរិក ដោយផលិតផលដែលកម្ពុជានាំចេញទៅកាន់ទីផ្សារអឺរ៉ាស៊ាន មានដូចជា សម្លៀកបំពាក់ ស្បែកជើង និងអង្ករ និងនាំចូលមកកម្ពុជាវិញ មានដូចជា ត្បូងមិនទាន់ច្នៃ ជីកសិកម្ម ចំណីសត្វ ត្រាក់ទ័រកសិកម្ម ក្រដាស និងឱសថ។
សូមបញ្ជាក់ថា មកដល់ពេលនេះ កម្ពុជាសម្រេចបានជោគជ័យលើការចរចាកិច្ចព្រៀងព្រមពាណិជ្ជកម្មសេរីជាមួយនឹងប្រទេសចំនួនពីររួចមកហើយ។ ក្នុងនោះមានកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា ចិន កាលពីថ្ងៃទី១២តុលា២០២០ និងកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា កូរ៉េខាងត្បូង ដែលនឹងត្រូវចុះហត្ថលេខានៅអំឡុងខែមិថុនាឆ្នាំ២០២១នេះ ក្រោយបញ្ចប់ការចរចាកាលពីថ្ងៃទី០៣កុម្ភៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ