អ្នកនាំពាក្យក្រសួងសុខាភិបាល៖ ភ្នំពេញជាទីតាំងប្រឈមខ្ពស់នឹងការឆ្លងវីរុសកូវីដ១៩បម្លែងខ្លួនថ្មី
ទីក្រុងភ្នំពេញជាទីតាំងមួយត្រូវបានកំណត់សញ្ញាណថាមានហានិភ័យខ្ពស់ក្នុងការឆ្លងរាលដាលនូវវីរុសកូវីដ១៩បម្លែងខ្លួនថ្មី ដែលមានសភាពធ្ងន់ធ្ងរជាងវីរុសកូវីដ១៩ដែលធ្លាប់ឆ្លងនៅកម្ពុជានាពេលកន្លងមក។ នេះបើតាមលោកស្រី ឱ វណ្ណឌីន អ្នកនាំពាក្យក្រសួងសុខាភិបាល។ លោកស្រីបន្តថា វីរុសកូវីដ១៩បម្លែងថ្មីនេះ មានសភាពធ្ងន់ធ្ងរជាងវីរុសកូវីដ១៩ដែលធ្លាប់រកឃើញនៅកម្ពុជាពេលកន្លងមក។
ចុះផ្សាយនៅថ្ងៃ៖
ស្តាប់ - ០១:៥៩
វីរុសកូវីដ១៩បម្លែងថ្មី កំពុងចរាចរនៅក្នុងប្រទេសកម្ពុជា ជាពិសេសចរាចរយ៉ាងសកម្មនៅក្នុងរាជធានីភ្នំពេញ និងរាលដាលបន្តទៅបណ្តាខេត្តមួយចំនួនទៀត។ នេះជាការគូសបញ្ជាក់របស់លោកស្រីឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល ប្រាប់វិទ្យុបារាំងអន្តរជាតិនៅថ្ងៃនេះ។
បើតាមអ្នកនាំពាក្យ វីរុសកូវីដ១៩បម្លែងថ្មីនេះ មានសភាពធ្ងន់ធ្ងរជាងវីរុសកូវីដ១៩ដែលធ្លាប់រកឃើញនៅកម្ពុជាពេលកន្លងមក។ ដោយវីរុសកូវីដ១៩បម្លែងថ្មី មានលទ្ធភាពក្នុងការចម្លងពីបុគ្គលម្នាក់ទៅបុគ្គលម្នាក់ទៀតមានសភាពលឿន និងជាការកត់សម្គាល់នៅក្នុងព្រឹត្តិការណ៍សហគមន៍២០កុម្ភៈ មានការរកឃើញក្នុងចំនួនតួលេខអ្នកឆ្លងកូវីដ១៩ច្រើនជាប្រចាំថ្ងៃ និងមានករណីស្លាប់បុរសជនជាតិខ្មែរម្នាក់កាលពីថ្ងៃទី១១មីនា ក៏ដោយសារតែវីរុសបម្លែងខ្លួនថ្មីនេះដែរ។
ទន្ទឹមនឹងការរកឃើញអ្នកវិជ្ជមានកូវីដ១៩កាន់តែមានចំនួនច្រើន លោកនាយករដ្ឋមន្រ្តី ហ៊ុន សែន នៅថ្ងៃសៅរ៍ទី១៣មីនានេះ បានអំពាវនាវដល់ប្រជាពលរដ្ឋកុំឲ្យមានការចល័តចេញពីលំនៅឋានខ្លួន ប្រសិនបើមិនមានលក្ខខណ្ឌចាំបាច់ណាមួយ។ បើតាមសារជាសម្លេងរបស់លោកនាយករដ្ឋមន្រ្តី បញ្ហាដែលប្រឈមធំសម្រាប់កម្ពុជានៅពេលនេះ គឺការមិនទាន់រកឃើញថា វីរុសកូវីដ១៩កំពុងរាលដាលនៅទីតាំងណាខ្លះនៅឡើយ។
នៅថ្ងៃសៅរ៍ទី១៣មីនានេះដែរ ក្រសួងសុខាភិបាលក៏បានបង្ហាញពីចំនួនអ្នកវិជ្ជមានកូវីដ១៩បម្លែងខ្លួនថ្មីមានចំនួន១២នាក់ ដែលឆ្លងនៅក្នុងព្រឹត្តិការណ៍សហគមន៍២០កុម្ភៈ តាមរយៈការបំបែកបន្តនូវលទ្ធផលដោយវិទ្យាស្ថានប៉ាស្ទ័រកម្ពុជា។ លោកស្រី ឱ វណ្ណឌីន បានគូសបញ្ជាក់ដែរថា នៅក្នុងបរិបទនេះ ពិធីជួបជុំមួយចំនួន ដូចជាការរៀបចំពិធីអាពាហ៍ពិពាហ៍ និងពិធីបុណ្យផ្សេងគួរណាពន្យាពេលមួយរយៈ ដើម្បីធ្វើយ៉ាងកាត់ផ្តាច់ចរន្តឆ្លងជាបន្តបន្ទាប់ទៀត។
គួរជម្រាបថា រយៈពេល២២ថ្ងៃក្រោយមានផ្ទុះព្រឹត្តិការណ៍សហគមន៍២០កុម្ភៈ មកដល់ថ្ងៃទី១៣មីនានេះ កម្ពុជាបានរកឃើញអ្នកវិជ្ជមានកូវីដ១៩នៅក្នុងព្រឹត្តិការណ៍នេះ រហូតដល់៧៥១នាក់ និងមានអ្នកស្លាប់ម្នាក់។ ហើយជាតួលេខសរុបគិតដល់ពេលនេះ កម្ពុជាមានការរកឃើញអ្នកឆ្លងជំងកូវីដ១៩ទាំងអស់ចំនួន១២៦៤នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ