ក្រសួងការពារជាតិបញ្ចេញពេទ្យយោធា៣០០នាក់ជួយពេទ្យស៊ីវិលព្យាបាលអ្នកជំងឺកូវីដ១៩ដែលកើនឡើងឥតឈប់ឈរ
នៅថ្ងៃព្រហស្បតិ៍នេះ កម្ពុជាបានបន្តរកឃើញអ្នកឆ្លងជំងឺកូវីដ១៩ថ្មីចំនួន៣៩នាក់ថែមទៀត ដោយនៅភ្នំពេញចំនួន២២នាក់ ខេត្តកណ្តាល៩នាក់ ខេត្តព្រះសីហនុម្នាក់ ខេត្តព្រៃវែង៦នាក់ និងខេត្តបាត់ដំបងម្នាក់។ ប៉ុន្តែ ក៏បានព្យាបាលជាសះស្បើយបន្ថែមចំនួន៤៨នាក់ទៀតផងដែរ។ ប្រឈមនឹងការកើនឡើងនៃអ្នកឆ្លងជំងឺកូវីដ១៩ឥតឈប់ឈរនេះ ក្រសួងការពារជាតិកម្ពុជាបានសម្រេចបញ្ចេញក្រុមគ្រូពេទ្យយោធាចំនួន៣០០នាក់ឱ្យមកចូលរួមជាមួយក្រុមគ្រូពេទ្យស៊ីវិល ដើម្បីព្យាបាលអ្នកជំងឺកូវីដ១៩។
ចុះផ្សាយនៅថ្ងៃ៖
ស្តាប់ - ០២:០៧
ក្រសួងការពារជាតិកម្ពុជាបានបញ្ចេញក្រុមគ្រូយោធា៣០ក្រុមដែលមានចំនួន៣០០នាក់ឱ្យចាប់ដៃគ្នាជាមួយក្រុមគ្រូពេទ្យស៊ីវិល ដើម្បីព្យាបាល និងទប់ស្កាត់ការចម្លងជំងឺកូវីដ១៩។ ការបញ្ចេញពេទ្យយោធានេះ ធ្វើឡើងតាមបញ្ជាឱ្យរបស់លោកនាយករដ្ឋមន្រ្តីហ៊ុន សែន បន្ទាប់ពីអ្នកឆ្លងជំងឺកូវីដ១៩បានកើនឡើងយ៉ាងគំហុកទាំងនៅរាជធានីភ្នំពេញ និងបណ្តាខេត្តមួយចំនួនទៀតរបស់កម្ពុជា។ លោកនាយករដ្ឋមន្រ្តីហ៊ុន សែន បានអះអាងថា ការបញ្ចេញពេទ្យយោធានេះ គឺដោយសារតែក្រុមគ្រូពេទ្យស៊ីវិលមានការនឿយហត់នឹងការប្រយុទ្ធប្រឆាំងនឹងជំងឺកូវីដ១៩ និងមួយផ្នែកទៀត ពួកគេ គឺគ្រូពេទ្យសម្រាប់ព្យាបាលជំងឺផ្សេងៗដែលមិនឆ្លើយតបទៅនឹងការកើនឡើងនៃអ្នកជំងឺកូវីដ១៩។
បើតាមលោកនាយករដ្ឋមន្រ្តីហ៊ុន សែន ពេទ្យយោធាទាំង៣០០នាក់ គឺត្រូវគ្រប់គ្រង និងចាត់ចែងដោយមេបញ្ជាការកងទ័ពជើងគោក ប៉ុន្តែ ពួកគេចាំបាច់ត្រូវបំពាក់ឧបករណ៍បរិក្ខារផ្សេងៗសម្រាប់ការងារព្យាបាលអ្នកជំងឺកូវីដ១៩ឱ្យបានគ្រប់គ្រាន់ពីសំណាក់ក្រសួងសុខាភិបាលកម្ពុជា។ ជាមួយគ្នានេះ លោកហ៊ុន សែន ក៏បានបញ្ជាឱ្យក្រសួងសេដ្ឋកិច្ចផ្តល់ប្រាក់ឧបត្ថម្ភដល់ពួកគេឱ្យដូចទៅនឹងការទទួលបានរបស់ក្រុមគ្រូពេទ្យស៊ីវិលផងដែរ។
ក្រៅពីការបញ្ចេញពេទ្យយោធា៣០០នាក់នេះ លោកនាយករដ្ឋមន្រ្តីហ៊ុន សែន ក៏បានបញ្ជាឱ្យរដ្ឋមន្រ្តីក្រសួងការពារជាតិ រដ្ឋមន្រ្តីក្រសួងសុខាភិបាល អគ្គបញ្ជាការកងយោធពលខេមរភូមិន្ទ និងមេបញ្ជាការកងទ័ពជើងគោករកសណ្ឋាគារ២ទៀត ដើម្បីត្រៀមធ្វើជាកន្លែងព្យាបាលបន្ថែមទៀតសម្រាប់ទប់ទល់នឹងការកើនឡើងនៃអ្នកជំងឺកូវីដ១៩។ លោកនាយករដ្ឋមន្រ្តីចង់បានសណ្ឋាគារដែលមានបន្ទប់២០០បន្ទប់ ឬលើសពីនេះ។
បច្ចុប្បន្ន នៅរាជធានីភ្នំពេញមានកន្លែងព្យាបាលអ្នកជំងឺកូវីដ១៩ចំនួន៤កន្លែង គឺមជ្ឈមណ្ឌលជាតិកម្ចាត់រោគរបេង និងហង់សិន មន្ទីរពេទ្យមិត្តភាពខ្មែរ-សូវៀតហៅ ពេទ្យរុស្ស៊ី មណ្ឌលសុខភាពចាក់អង្រែ និងសណ្ឋាគារក្រេតឌុករាជធានីភ្នំពេញ។ សណ្ឋាគារក្រេតឌុករាជធានីភ្នំពេញ ឬអតីតកុងទីណុងតាល់នេះ គឺរៀបចំជាកន្លែងព្យាបាលដោយផ្ទេរអ្នកជំងឺកូវីដ១៩ពីមណ្ឌលចត្តាឡីស័ករាជធានីភ្នំពេញ។ បន្ថែមលើនេះ ក្រសួងសុខាភិបាលកម្ពុជាក៏បានបន្ថែមកន្លែងព្យាបាលចំនួន២បន្ថែមទៀត គឺសណ្ឋាគារសុខាភ្នំពេញ និង វិទ្យាល័យបុរី១០០ខ្នង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ