សន្តិសុខដែលដោះលែងស្រ្តីចិនពីកន្លែងធ្វើចត្តាឡីស័កកំពុងប្រឈមមុខនឹងជាប់ពន្ធនាគារពី១ខែទៅ១ឆ្នាំ
បុរសសន្តិសុខម្នាក់ដែលបានជួយឱ្យស្រ្តីជនជាតិចិនរត់ចេញពីការធ្វើចត្តាឡីស័កនៅសណ្ឋាគារសុខា កាលពីម្សិលមិញនេះ ត្រូវបានតុលាការសាលាដំបូងរាជធានីភ្នំពេញចោទប្រកាន់ពីបទចេតនាមិនគោរពបញ្ជារបស់រដ្ឋបាលនៅនឹងកន្លែងតាមច្បាប់ស្តីពីការគ្រប់គ្រងគ្រោះមហន្តរាយ។ បើតាមច្បាប់នេះ គឺបុរសសន្តិសុខរូបនេះអាចប្រឈមមុខនឹងការជាប់ពន្ធនាគារពី១ខែ ទៅ១ ឆ្នាំ និងរងពិន័យជាទឹកប្រាក់១សែនរៀល ទៅ២លានរៀល ។
ចុះផ្សាយនៅថ្ងៃ៖
ស្តាប់ - ០២:១៦
បុរសសន្តិសុខរូបនេះ គឺជាមនុស្សដំបូងគេនៅក្នុងប្រទេសកម្ពុជាដែលត្រូវបានអាជ្ញាធរប្រើប្រាស់វិធានការច្បាប់ ដោយសារតែបានជួយឱ្យស្រ្តីជនជាតិចិន៤នាក់រត់ចេញពីការធ្វើចត្តាឡីស័កនៅក្នុងសណ្ឋាគារសុខា រាជធានីភ្នំពេញ។ បន្តមកទៀត ស្រ្តីជនជាតិចិនទាំងនេះបាននាំជំងឺកូវីដ១៩ទៅចម្លងដល់ជនជាតិចិន វៀតណាម កម្ពុជា និងម៉ាឡេស៊ីជាដើម បង្កើតបានជាព្រឹត្តិការណ៍ចម្លងក្នុងសហគមន៍២០កុម្ភៈដែលកំពុងរាលដាលខ្លាំងនាពេលនេះ។ នៅពេលនេះ បុរសន្តិសុខរូបនេះ កំពុងត្រូវបានឃុំខ្លួនបណ្តោះអាសន្ននៅក្នុងពន្ធនាគាររង់ចាំការបើកសវនាការកាត់ក្តីនាពេលខាងមុខ។
លោកគុជ គឹមឡុង អ្នកនាំពាក្យតុលាការសាលាដំបូងរាជធានីភ្នំពេញ បានអះអាងប្រាប់វិទ្យុបារាំងអន្តរជាតិថា នៅពេលនេះ តុលាការបានចាត់ការតែលើសន្តិសុខម្នាក់សិន រីឯអ្នកពាក់ព័ន្ធដទៃទៀតនឹងចាត់ការជាបន្តបន្ទាប់តាមក្រោយ។ បុរសសន្តិសុខរូបនេះ ត្រូវបានកសាងសំណុំរឿងបញ្ជូនទៅកាន់តុលាការ បន្ទាប់ពីរូបគេបានបញ្ចប់ការធ្វើចត្តាឡីស័ក១៤ថ្ងៃ និងធ្វើតេស្តរកមិនឃើញឆ្លងជំងឺកូវីដ១៩។ រូបគេត្រូវបានតុលាការចោទប្រកាន់ពីបទចេតនាមិនគោរពបញ្ជារបស់រដ្ឋបាលនៅនឹងកន្លែងតាមមាត្រា៤២នៃច្បាប់ស្តីពីការគ្រប់គ្រងគ្រោះមហន្តរាយ។ តាមមាត្រានេះ សន្តិសុខរូបនេះអាចប្រឈមនឹងការផ្តន្ទាទោសដាក់ពន្ធនាគារពី១ខែ ទី១ឆ្នាំ និងពិន័យជាប្រាក់ពី ១សែនរៀល ទៅ២លានរៀល។
គួរបញ្ជាក់ថា ការអនុវត្តច្បាប់លើបុរសសន្តិសុខនេះ ធ្វើឡើងស្របពេលដែលក្រសួងសុខាភិបាល និងក្រសួងយុត្តិធម៌កំពុងបង្កើតច្បាប់ថ្មីសម្រាប់ដាក់ទោសទណ្ឌទៅលើអ្នកដែលបំពានវិធានការពារជំងឺកូវីដ១៩។ លោកនាយករដ្ឋមន្រ្តីហ៊ុន សែន កាលពីយប់ថ្ងៃចន្ទ បានជំរុញឱ្យធ្វើសេចក្តីព្រាងច្បាប់ស្តីវិធានការទប់ស្កាត់ការឆ្លងរាលដាលនៃជំងឺកូវីដ១៩នេះឱ្យបានលឿន និងជាបន្ទាន់ ដើម្បីគ្រប់គ្រប់ស្ថានការណ៍ការឆ្លងរីករាលដាលនៃជំងឺកូវីដ១៩នៅក្នុងប្រទេសកម្ពុជា។
សេចក្តីព្រាងច្បាប់ស្តីពី វិធានការទប់ស្កាត់ការឆ្លងរាលដាលនៃជំងឺកូវីដ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀតមានចំនួន៦ជំពូក និង១៧មាត្រា។ ច្បាប់នេះ នឹងដាក់ទោសអ្នកដែលបំពានវិធានការពារការចម្លងជំងឺកូវីដ១៩ចន្លោះពី៦ខែរហូតដល់២០ឆ្នាំទៅតាមទម្រង់នៃការប្រព្រឹត្តបទល្មើស។ ចំណែក ការពិន័យជាទឹកប្រាក់វិញ គឺចន្លោះពី១លានរៀលរហូតដល់ទៅ២០លានរៀលឯណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ