អង្គការសិទ្ធិមនុស្ស៖ការបោះឆ្នោតនៅឆ្នាំក្រោយ គួរតែបើកចំហរឱ្យមានការចូលរួមពីគ្រប់ភាគីនយោបាយ
អង្គការការពារសិទ្ធិមនុស្សនៅកម្ពុជានៅព្រឹកថ្ងៃចន្ទនេះ បានអះអាងថា ការបោះឆ្នោតឆ្នាំ២០២២ ក៏ដូចជាការបោះឆ្នោតឆ្នាំ ២០២៣ ខាងមុខ គួរតែជាការបោះឆ្នោត ដែលទទួលស្គាល់ថាប្រព្រឹត្តទៅដោយរលូន តម្លាភាព និងយុត្តិធម៌។ ការបោះឆ្នោតបែបនេះអាចកើតឡើង គឺលុះត្រាតែមានការចូលរួមពីគ្រប់ភាគីនយោបាយ ជាពិសេស គឺអតីតគណបក្សសង្រ្គោះជាតិ។ ការអះអាងរបស់អង្គការការពារសិទ្ធិមនុស្សនេះ ធ្វើឡើងបន្ទាប់ពីរដ្ឋាភិបាលកម្ពុជាបានកំណត់យកថ្ងៃទី៥ ខែមិថុនា ឆ្នាំ២០២២ ជាកាលបរិច្ឆេទនៃការបោះឆ្នោតជ្រើសរើសក្រុមប្រឹក្សា ឃុំ-សង្កាត់ អាណត្តិទី៥។
ចុះផ្សាយនៅថ្ងៃ៖
ស្តាប់ - ០២:៣០
លោកស្រី ចក់ សុភាព នាយិកាមជ្ឈមណ្ឌសិទ្ធិមនុស្សកម្ពុជា បានលើកឡើងថា ការបោះឆ្នោតនៅពេលខាងមុខ គឺគេមិនអាចទាយទុកមុនបានឡើយថា មានហេតុការណ៍អ្វីនឹងកើតឡើងនោះ។ នេះ ក៏ព្រោះថា ការកំណត់យកថ្ងៃទី៥ ខែមិថុនា ឆ្នាំ២០២២ ជាកាលបរិច្ឆេទការបោះឆ្នោតក្រុមប្រឹក្សាឃុំ-សង្កាត់ គឺស្របពេលដែលបញ្ហានយោបាយនៅកម្ពុជាមិនទាន់បញ្ចប់ និងចំពេលដែលជំងឺកូវីដ១៩នៅតែបន្តរីករាលដាលនៅក្នុងប្រទេសកម្ពុជា។
ទោះជាបែបនេះក្តី លោកស្រីអះអាងថា ការបោះឆ្នោត គឺគួរតែផ្តល់ភាពអំណោយផលដល់គ្រប់ភាគីនយោបាយ ជាពិសេស អតីតបក្សប្រឆាំង អាចចូលរួមបាន ដើម្បីឱ្យមានការបោះឆ្នោតប្រព្រឹត្តទៅដោយរលូន យុត្តិធម៌ និងទទួលបានការទទួលស្គាល់។
ចំណែក លោកអំ សំអាត នាយករងផ្នែកឃ្លាំមើល និងការពារសិទ្ធិមនុស្សនៃអង្គការលីកាដូវិញ បានវាយតម្លៃថាការបោះឆ្នោតតាមកាលកំណត់នាពេលខាងមុខនេះ គឺអតីតគណបក្សសង្រ្គោះជាតិប្រហែលជាមិនអាចចូលរួមបានទេដោយសារតែសំណុំរឿងថ្នាក់ដឹកនាំកំពូលនៃអតីតបក្សនេះមិនទាន់បានបញ្ចប់ ខណៈថ្នាក់ដឹកនាំដទៃទៀតត្រូវបានចោទប្រកាន់ និងកាត់ទោសជាបន្តបន្ទាប់។
បើតាមលោកអំ សំអាត បើសំណុំរឿងលោក កឹម សុខា ប្រធានអតីតបក្សប្រឆាំងមិនទាន់បញ្ចប់ ហើយការបោះឆ្នោតនៅតែធ្វើតាមការគ្រោងទុកនោះ គឺនឹងរងការរិះគន់ពីសំណាក់សហគមន៍អន្តរជាតិមិនខាន។ សម្រាប់លោកអំ សំអាត ដដែល បញ្ហាដែលត្រូវដោះស្រាយនៅចំពោះមុខ គឺការពន្លឿនសវនាការកាត់ក្តីសំណុំរឿងលោកកឹម សុខា និង ការចរចាផ្សះផ្សាផ្នែកនយោបាយ។
រដ្ឋាភិបាលកម្ពុជាបានសម្រេចកំណត់យកថ្ងៃទី៥ ខែមិថុនា ឆ្នាំ២០២២ ជាកាលបរិច្ឆេទសម្រាប់ការបោះឆ្នោតជ្រើសរើសក្រុមប្រឹក្សា ឃុំ-សង្កាត់ អាណត្តិទី៥។ ការកំណត់នេះ ធ្វើឡើងបន្ទាប់ពីតុលាការកម្ពុជាកាត់ទោសកំបាំងមុខលោក សម រង្ស៊ី និងមន្រ្តីជាន់ខ្ពស់ដទៃទៀតនៃអតីតគណបក្សសង្រ្គោះជាតិ ឱ្យជាប់ពន្ធនាគារពី២០ ទៅ២៥ឆ្នាំ ពីបទប៉ុនប៉ងធ្វើរដ្ឋប្រហារ ផ្ដួលរំលំរាជរដ្ឋាភិបាលស្របច្បាប់ ឬឧបឃាត។ ជាមួយគ្នានេះ តុលាការកម្ពុជាក៏បានសម្រេចដកហូតសិទ្ធិបោះឆ្នោត និងសិទ្ធិឈរឈ្មោះឲ្យគេបោះឆ្នោតថែមទៀតផង។
ការកំណត់យកថ្ងៃទី៥ ខែមិថុនា ឆ្នាំ២០២២ ក៏ធ្វើឡើងចំពេលដែលសវនាការសំណុំរឿងលោកកឹម សុខា កំពុងត្រូវបានផ្អាកដោយមិនកំណត់ពេលព្រោះតែជំងឺកូវីដ១៩។ ចំពោះបញ្ហានេះ លោកកឹម សុខា មិនទាន់មានប្រតិកម្មយ៉ាងណានៅឡើយទេតាមរយៈក្រុមមេធាវី។ ប៉ុន្តែ កូនស្រីលោកកឹម សុខា គឺកញ្ញា កឹម មនោវិទ្យា ធ្លាប់បានអះអាងពីគោលជំហររបស់លោក កឹម សុខា ថា រូបលោកនឹងមិនទៅណាឡើយ ហើយលោកមានបំណងចង់ចូលរួមប្រកួតប្រជែងការបោះឆ្នោតនៅក្នុងឆ្នាំ២០២២ និង ឆ្នាំ២០២៣ខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ