ទំហំពាណិជ្ជកម្មកម្ពុជា អាមេរិក បន្តរក្សាកំណើននាដើមឆ្នាំ២០២១
ពាណិជ្ជកម្មទ្វេភាគីកម្ពុជា-អាមេរិក កាលពីខែមករា មានទំហំ៦១៥លានដុល្លារ ដែលបានកើនឡើងជិត៥%ធៀបនឹងរយៈពេលដូចគ្នាកាលពីឆ្នាំមុន។ និន្នាការកើនឡើងនៃទំហំពាណិជ្ជកម្ម ត្រូវបានអ្នកជំនាញមើលឃើញថាជាឱកាសសម្រាប់ជំរុញកំណើនវិនិយោគមកកាន់កម្ពុជាឲ្យកាន់តែច្រើន ដើម្បីផលិតនាំចេញទៅសហរដ្ឋអាមេរិក។
ចុះផ្សាយនៅថ្ងៃ៖
ស្តាប់ - ០២:៣៩
គិតត្រឹមខែមករា កន្លងទៅ ទំហំពាណិជ្ជកម្មរវាងកម្ពុជា និងសហរដ្ឋអាមេរិក មានជាង ៦១៥.៥លានដុល្លារអាមេរិក ដែលកើនឡើងជិត ៥% ធៀបនឹង ខែមករាឆ្នាំ២០២០ ដែលមានតែជាង ៥៨៥.៨លានដុល្លារប៉ុណ្ណោះ។ សម្រាប់ខែមករាឆ្នាំ២០២០នេះ ការនាំចេញទៅសហរដ្ឋអាមេរិក មានទំហំជាទឹកប្រាក់ ៥៨០.៦លានដុល្លារ និងការនាំទំនិញពីអាមេរិកមកកម្ពុជាវិញ មានទំហំប្រមាណ៣៣.៩លានដុល្លារ។ នេះបើតាមទិន្នន័យពីការិយាល័យជំរឿនរបស់សហរដ្ឋអាមេរិក ចេញផ្សាយកាលពីពេលថ្មីៗនេះ។
លោក លឹម ហេង អនុប្រធានសភាពាណិជ្ជកម្មកម្ពុជាបានបញ្ជាក់ប្រាប់វិទ្យុបារាំងអន្តរជាតិនៅថ្ងៃទី០៧ ខែមីនាថា ការនាំចេញទៅសហរដ្ឋអាមេរិកនៅដើមឆ្នាំនេះ មានការកើនឡើង ហើយការនាំចូលពីអាមេរិកមកវិញក៏មានការកើនឡើង ដែលខុសពីខែមករា ឆ្នាំ២០២០។ ដើមឆ្នាំ២០២០ ដែលការនាំទំនិញអាមេរិកមកកម្ពុជាមានការថយចុះ។
លោក លឹម ហេង បន្តថា ការចាក់វ៉ាក់សាំងបង្ការកូវីដ១៩ នោះនឹងធ្វើឲ្យសេដ្ឋកិច្ចសកលលោកនឹងប្រសើរឡើងវិញ ដែលក្នុងនោះមានទាំងកម្ពុជា និងអាមេរិកផង។ លោកបន្ថែមថានេះ គឺជាឱកាសសម្រាប់ជំរុញកំណើនវិនិយោគមកកាន់កម្ពុជាឲ្យកាន់តែច្រើន ដើម្បីផលិតនាំចេញទៅសហរដ្ឋអាមេរិក។
បើទោះបីជាប្រទេសក្នុងពិភពលោក ដែលរួមទាំងកម្ពុជា និងសហរដ្ឋអាមេរិកផង បានរងគ្រោះពីវិបត្តិកូវីដ១៩ក្តី ប៉ុន្តែទំហំពាណិជ្ជកម្មរវាងប្រទេសទាំងពីរ កាលពីឆ្នាំ២០២០ មានទំហំជាទឹកប្រាក់ប្រមាណ ៦.៩ពាន់លានដុល្លារ កើនឡើងប្រមាណជិត១៨% បើប្រៀបធៀបនឹងឆ្នាំ២០១៩ ដែលមានទំហំជាទឹកប្រាក់ប្រមាណ ៥.៨ពាន់លានដុល្លារអាមេរិក។ នេះបើតាមទិន្នន័យពីការិយាល័យជំរឿនរបស់សហរដ្ឋអាមេរិក។
ទំនិញដែលកម្ពុជានាំទៅសហរដ្ឋអាមេរិក ភាគច្រើនគឺជាទំនិញពីវិស័យកាត់ដេរកម្ពុជា។ លោក អាត ធន់ ប្រធានសហភាពការងារកម្ពុជា បានថ្លែងថា កម្មករក្នុងវិស័យកាត់ដេរមានការងារធ្វើជាធម្មតា បើពិនិត្យមើលក្នុងចុងឆ្នាំ២០២០ និងដើមឆ្នាំ២០២១ ក៏ប៉ុន្តែនៅខែមីនា ចំនួនការងារបែរជាមានការថយចុះបន្តិច ដោយសារតែរោងចក្រមួយចំនួនត្រូវព្យូរការងារ និងមិនសូវមានវត្ថុធាតុដើម។
លោក អាត ធន់ ក៏បានឲ្យដឹងដែរថា រហូតមកដល់ពេលនេះកម្ពុជាមិនទទួលបានកម្មវិធីអនុគ្រោះពន្ធទូទៅរបស់សហរដ្ឋអាមេរិក(Generalized System of Preferences -GSP)ជាថ្មីនៅឡើយទេ។ GSP ដែលបានផុតរលត់សុពលភាពរបស់ខ្លួន នៅក្នុងប្រទេសកម្ពុជា ក៏ដូចជាប្រទេស និងដែនដី១១៩ទៀតកាលពីថ្ងៃទី៣១ ខែធ្នូ ឆ្នាំ២០២០ កន្លងទៅ។
សូមរំលឹកជូនដែរថា សមាគមរោងចក្រកាត់ដេរនៅកម្ពុជា ធ្លាប់បានលើកឡើងថាការប៉ះពាល់ដោយផ្ទាល់ ពីការផុតសុពលភាព GSP គឺកើតទៅលើអ្នកនាំចូលទំនិញទៅសហរដ្ឋអាមេរិក ដែលត្រូវបង់ពន្ធនាំចូលសិននៅក្នុងពេលអន្តរកាល ពោលគឺ នៅមុនពេលកម្មវិធីនេះ ត្រូវសភាអាមេរិកផ្តល់សុពលភាពជាថ្មីឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ