អ្នកសេដ្ឋកិច្ចក្រៅប្រព័ន្ធត្រៀមខ្លួនចាក់វ៉ាក់សាំងការពារកូវីដ១៩
មួយថ្ងៃបន្ទាប់ពីរដ្ឋាភិបាលបើកភ្លើងខៀវ ឱ្យកម្មករប្រមូលសំរាម អ្នករត់តាក់ស៊ី ម៉ូតូកង់បី និងម៉ូតូឌុប ដែលជាក្រុមមានហានិភ័យខ្ពស់ក្នុងការឆ្លងជំងឺកូវីដ-១៩ ទទួលបានការចាក់វ៉ាក់សាំងការពារជំងឺកូវីដ-១៩ ដោយស្ម័គ្រចិត្តរួចមក អ្នកសេដ្ឋកិច្ចក្រៅប្រព័ន្ធបានត្រៀមខ្លួនទៅទទួលវ៉ាក់សាំង។ ប៉ុន្តែទន្ទឹមនឹងការស្មគ្រ័ចិត្តនេះ ពួកគេក៏រង់ចាំផងដែរ ការផ្តល់ព័ត៌មានពីអាជ្ញាធរមូលដ្ឋានអំពីនីតិវិធីនៃការចាក់វ៉ាក់សាំងនេះ។
ចុះផ្សាយនៅថ្ងៃ៖
ស្តាប់ - ០២:២៦
លោកវ៉ន ពៅ ប្រធានសមាគមប្រជាធិបតេយ្យឯករាជ្យសេដ្ឋកិច្ចក្រៅប្រព័ន្ធ បានសម្តែងការសាទរចំពោះចំណាត់ការ និងការយកចិត្តទុកដាក់ពីរដ្ឋាភិបាល លើអ្នកប្រកបមុខរបរសេដ្ឋកិច្ចក្រៅប្រព័ន្ធ ដែលជាក្រុមមានហានិភ័យខ្ពស់ក្នុងការឆ្លងជំងឺកូវីដ-១៩។
អ្នកប្រកបមុខរបរក្នុងសេដ្ឋកិច្ចក្រៅប្រព័ន្ធមួយចំនួនធំ បានត្រៀមខ្លួនរួចរាល់ហើយ ដើម្បីទៅទទួលវ៉ាក់សាំង ប៉ុន្តែទន្ទឹមនឹងនោះ ក៏មានការព្រួយបារម្ភផងដែរលើបំរាម និងលក្ខខណ្ឌចំនួន១៤ចំនុច មុននឹងទទួលបានការចាក់វ៉ាក់សាំងកូវីដ១៩ ព្រោះអាចនឹងមានអ្នកប្រកបរបរសេដ្ឋកិច្ចក្រៅប្រព័ន្ធមួយចំនួន បើទោះជាស្ម័គ្រចិត្តហើយ ក៏មិនអាចចាក់វ៉ាក់សាំងបានដែរ ព្រោះតែមានជំងឺប្រចាំកាយដូចជាជំងឺអាឡាក់ស៊ី ជំងឺរ៉ាំរៃ បញ្ហាតម្រងនោម ឬទឹកនោមផ្អែមជាដើម។
ជាការគូសបញ្ជាក់បន្ថែម លោកវ៉ន ពៅ មើលឃើញថា ការជូនដំណឹងរបស់ក្រសួងសុខាភិបាល ទើបតែបាន១ថ្ងៃ ដូចនេះ លោកមិនអាចបញ្ជាក់ពីចំនួនអ្នកទៅចាក់វ៉ាក់សាំងពិតប្រាកដ និងជាក់លាក់នោះទេ គឺត្រូវរង់ចាំការជូនដំណឹងជាក់លាក់បន្ថែមទៀតពីក្រសួង ដើម្បីឱ្យអ្នកប្រកបរបរសេដ្ឋកិច្ចក្រៅប្រព័ន្ធ បានទៅចាក់វ៉ាក់សាំងគ្រប់គ្នា គេចផុតពីការឆ្លងជំងឺកូវដ១៩។
សូមរម្លឹកជូនថា កាលពីថ្ងៃទី២៨ ខែកុម្ភៈម្សិលម៉ិញ ប្រមុខរដ្ឋាភិបាល លោក ហ៊ុន សែន បញ្ជាឱ្យរដ្ឋមន្ត្រីក្រសួងសុខាភិបាល រៀបចំកម្មវិធីដើម្បីចាក់វ៉ាក់សាំងការពារជំងឺកូវីដ-១៩ ជូនដល់កម្មករប្រមូលសំរាម អ្នករត់តាក់ស៊ី ម៉ូតូកង់បី និងម៉ូតូឌុប។
បន្ទាប់ពីកិច្ចប្រជុំនេះ ក្រសួងសុខាភិបាលបានចេញជូនដំណឹង និងបានណែនាំទៅគណៈអភិបាលខេត្ត គណៈអភិបាលក្រុង ស្រុក ខណ្ឌ គណៈកម្មការភូមិ ឃុំ សង្កាត់ រៀបចំចាត់ចែង ប្រមូលកម្មករប្រមូលសំរាមនៅរាជធានីភ្នំពេញ ដែលមានអាយុពី ១៨ឆ្នាំ ដល់ ៥៩ឆ្នាំ ទៅទទួលការចាក់វ៉ាក់សាំង ដោយឈរលើគោលការណ៍ស្ម័គ្រចិត្តចាប់ពីថ្ងៃនេះទៅ។ បន្ថែមលើនេះ កម្មករប្រមូលសំរាមអាចស្វែងរកការចាក់វ៉ាក់សាំងនេះខ្លួនឯងបាន នៅមន្ទីរពេទ្យ បង្អែករាជធានីភ្នំពេញ មន្ទីរពេទ្យបង្អែកព្រែកព្នៅ មន្ទីរពេទ្យបង្អែកច្បារអំពៅ មន្ទីរពេទ្យបង្អែកដង្កោ មន្ទីរពេទ្យបង្អែកមិត្តភាពកម្ពុជា-ចិន សែនសុខ មន្ទីរពេទ្យបង្អែកចតុមុខ មន្ទីរពេទ្យបង្អែកសម្ដេចឪ សម្ដេចម៉ែ មន្ទីរពេទ្យបង្អែកពោធិចិនតុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ