អនុគណៈកម្មការគ្រប់គ្រងសន្ដិសុខត្រូវបានបង្កើតឡើង បន្ទាប់ពីមានករណីរត់គេចពីកន្លែងចត្តាឡីស័ក
ក្រសួងសុខាភិបាល កាលពីម្សិលមិញ បានសម្រេចបង្កើតអនុគណៈកម្មការគ្រប់គ្រងសន្ដិសុខ និងសណ្ដាប់ធ្នាប់នៅតាមគោលដៅ និងតំបន់ចត្តាឡីស័ក ដើម្បីប្រយុទ្ធនឹងជំងឺកូវីដ១៩។ ការបង្កើតអនុគណៈកម្មការនេះគឺបន្ទាប់ពីមានមនុស្សមួយចំនួនរត់គេចចេញពីកន្លែងចត្តាឡីស័ក ដូចជា នៅរាជធានីភ្នំពេញ ខេត្តបន្ទាយមានជ័យ និងខេត្តឧត្តរមានជ័យជាដើម កាលពីពេលកន្លងទៅ។
ចុះផ្សាយនៅថ្ងៃ៖
ស្តាប់ - ០២:១៨
យោងតាមសេចក្ដីសម្រេចរបស់លោក ម៉ម ប៊ុនហេង រដ្ឋមន្ដ្រីក្រសួងសុខាភិបាល ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង និងជាមេបញ្ជាការកងទ័ពជើងគោក គឺជាប្រធាននៃអនុគណៈកម្មការគ្រប់គ្រងសន្ដិសុខ និងសណ្ដាប់ធ្នាប់ នៅតាមគោលដៅ និងតំបន់ចត្តាឡីស័ក ដើម្បីប្រយុទ្ធនឹងជំងឺកូវីដ១៩។
អនុគណៈកម្មការនេះ ត្រូវអមដោយអនុប្រធានអចិន្ដ្រៃយ៍១រូប គឺនាយឧត្តមសេនីយ៍ គីម ប៊ុនថាន អគ្គមេបញ្ជាការរងកងយុទ្ធពលខេមរភូមិន្ទ។ ជាមួយគ្នានោះក៏មានអនុប្រធាន៤រូបទៀត រួមមាន នាយឧត្តមសេនីយ៍ កែវ វណ្ណថន អគ្គនាយករងនៃអគ្គនាយកដ្ឋានអន្តោប្រវេសន៍ ឧត្តមសេនីយ៍ឯក ឡោ សុខឡេង អគ្គស្នងការរងនគបាលជាតិ លោក ហ៊ុន ចំរើន រដ្ឋលេខាធិការក្រសួងសុខាភិបាល និង លោក ចាន់ សុធី រដ្ឋលេខាធិការក្រសួងសេដ្ឋកិច្ច។
ចំណែក សមាជិក៨រូបទៀតគឺ មានម្នាក់ជាមេបញ្ជាការរងកងរាជអាវុធហត្ថលើផ្ទៃប្រទេស ម្នាក់ជាអភិបាលរងរាជធានីភ្នំពេញ ម្នាក់ជាអភិបាលរងខេត្តព្រះសីហនុ ម្នាក់ជាអភិបាលរងខេត្តសៀមរាប ម្នាក់ជាអភិបាលរងខេត្តបាត់ដំបង ម្នាក់ជាអភិបាលរងខេត្តបន្ទាយមានជ័យ និងម្នាក់ជាអភិបាលរងខេត្តឧត្តរមានជ័យ។
សម្រាប់តួនាទី និងភារកិច្ច របស់អនុគណៈកម្មការនេះ គឺគ្រប់គ្រងការងារសន្ដិសុខ និងសណ្ដាប់ធ្នាប់នៅតំបន់ចត្តាឡីស័ក ត្រៀមបម្រុងកម្លាំងអន្ដរាគមន៍ ករណីមានតម្រូវការចាំបាច់ ដោយសហការជាមួយអាជ្ញាធពាក់ព័ន្ធ និងគ្រប់គ្រងទិន្នន័យអ្នកធ្វើចត្តាឡីស័កជាដើម។
ជាការកត់សំគាល់ ការបង្កើតអនុគណៈកម្មការនេះគឺធ្វើឡើងបន្ទាប់ពីមានមនុស្សមួយចំនួនរត់គេចចេញពីកន្លែងចត្តាឡីស័ក។
កាលពីថ្ងៃទី១៥ ខែកុម្ភៈ ឆ្នាំ២០២១ នារីវ័យក្មេងម្នាក់ បានរត់តាមសង្សាររបស់ខ្លួនចេញពីមណ្ឌលចត្តាឡីស័កមួយកន្លែងនៅស្រុកត្រពាំងប្រាសាទ ខេត្តឧត្តរមានជ័យ ហើយនៅថ្ងៃទី១៨ ខែកុម្ភៈ ឆ្នាំ២០២១ក៏មានបុរសវ័យ៣០ឆ្នាំម្នាក់ទៀតបានរត់ចេញពីមណ្ឌលចត្តាឡីស័កក្នុងក្រុងសិរីសោភ័ណ្ឌ ខេត្តបន្ទាយមានជ័យ ខណៈនៅភ្នំពេញក៏មានករណីសន្តិសុខសណ្ឋាគារមួយបានជួយសម្រួលឲ្យស្ត្រីជនជាតិចិនជាច្រើននាក់ចាកចេញពីកន្លែងចត្តាឡីស័ក នៅមុនពេលកើតមានព្រឹត្តិការណ៍សហគមន៍២០កុម្ភៈ។
បើតាមរដ្ឋាភិបាលកម្ពុជា សម្រាប់ជនបរទេសដែលគេចវេះពីការធ្វើចត្តាឡីស័ក ឬមិនសហការ គឺត្រូវបណ្តេញចេញពីប្រទេសហើយមិនអនុញ្ញាតឲ្យចូលកម្ពុជាវិញឡើយ ខណៈជនជាតិខ្មែរនឹងត្រូវពិន័យជាប្រាក់រហូតដល់៥០លានរៀល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ