ការឆ្លងកូវីដ១៩ក្នុងសហគមន៍បានរាលដាលដល់ខេត្តព្រះសីហនុហើយតាមរយៈស្រ្តីចិន២នាក់ទៅពីភ្នំពេញ
ក្រសួងសុខាភិបាលនៅថ្ងៃពុធនេះបានប្រកាសឱ្យដឹងពីការរកឃើញអ្នកឆ្លងជំងឺកូវីដ១៩ថ្មី៤០នាក់បន្ថែមទៀតនៅកម្ពុជា។ ក្នុងនោះ ៣៨នាក់ គឺបានឆ្លងក្នុងព្រឹត្តិការណ៍សហគមន៍២០កុម្ភៈ និង២នាក់ទៀត ជាករណីនាំចូល។ ក្នុងចំណោមអ្នកឆ្លងថ្មីទាំងនេះ គឺ២នាក់ជាស្រ្តីជនជាតិចិននៅក្នុងខេត្តព្រះសីហនុ។ ភា្លមៗ រដ្ឋបាលខេត្តព្រះសីហនុបានបញ្ជាឱ្យបិទជាបណ្តោះអាសន្ននូវសណ្ឋាគារ២ដែលជនជាតិចិនទាំង២នេះបានស្នាក់នៅ និង បានអំពាវនាវឱ្យអ្នកជាប់ពាក់ព័ន្ធដោយផ្ទាល់ និងដោយប្រយោលទាំងអស់មកធ្វើតេស្តរកជំងឺកូវីដ១៩។
ចុះផ្សាយនៅថ្ងៃ៖
ស្តាប់ - ០២:២៥
នៅពេលនេះ ព្រឹត្តិការណ៍២០កុម្ភៈបានរាលដាលទៅដល់ខេត្តព្រះសីហនុហើយ គឺជនជាតិចិន២នាក់ត្រូវបានអាជ្ញាធរសុខាភិបាលខេត្តនេះរកឃើញថា បានឆ្លងជំងឺកូវីដ១៩។ រដ្ឋបាលខេត្តព្រះសីហនុនៅព្រឹកថ្ងៃពុធនេះ បានបង្ហាញឱ្យដឹងថា ជនជាតិចិនជាស្រ្តីទាំង២នាក់នេះ គឺម្នាក់មានអាយុ៣៥ឆ្នាំ និងម្នាក់ទៀតអាយុ២២ឆ្នាំ។ ពួកគេបានធ្វើដំណើរពីរាជធានីភ្នំពេញទៅកាន់ខេត្តព្រះសីហនុនៅថ្ងៃទី១៦ និង ថ្ងៃទី២០ ខែកុម្ភៈ។ បច្ចុប្បន្ននេះ ពួកគេទាំង២ត្រូវបានដាក់ឱ្យនៅសម្រាកព្យាបាលនៅក្នុងមន្ទីរពេទ្យបង្អែកខេត្តព្រះសីហនុ។
ប្រឈមមុខនឹងបញ្ហាឆ្លងរាលដាលនេះ លោកគួច ចំរើន អភិបាលខេត្តព្រះសីហនុបានបញ្ជាឱ្យបិទសណ្ឋាគារ២ គឺសណា្ឋគារហ័ងហ្គ័នជាយឺ និងសណ្ឋាគារជីនប៉ីទាំង៣សាខា រួមទាំងអាគារស្នាក់នៅរួមរបស់បុគ្គលិករបស់ក្រុមហ៊ុនជីនប៉ីជាបណ្តោះអាសន្ន។ ការឈានទៅបិទនេះ គឺដោយសារជនជាតិចិនដែលឆ្លងជំងឺកូវីដ១៩បានទៅស្នាក់នៅក្នុងសណ្ឋាគារទាំង២នេះ។ ជាមួយនឹងការបិទបណ្តោះអាសន្ន លោកគួច ចំរើន ក៏បានបញ្ជាមិនឱ្យអ្នកដែលស្នាក់នៅក្នុងទីតាំងទាំងនេះចាកចេញទៅក្រៅ និងមិនឱ្យអ្នកក្រៅចូលទៅក្នុងនោះឡើយ។ លោកបានប្រាប់ឱ្យពួកគេទាំងអស់ ត្រូវយកសំណាកទៅធ្វើតេស្តរកជំងឺកូវីដ១៩ឱ្យបានគ្រប់គ្នា និង ធ្វើចត្តាឡីស័កឱ្យបានត្រឹមត្រូវតាមវិធានសុខាភិបាល។
បន្ថែមលើនេះ រដ្ឋបាលខេត្តព្រះសីហនុ ក៏បានអំពាវនាវដល់អ្នកធ្លាប់ចេញចូលសណ្ឋាគារជីនប៉ីទាំង៣សាខា និងអាគារស្នាក់នៅរួមរបស់បុគ្គលិកចាប់ពីយប់ថ្ងៃទី១៦ ខែកុម្ភៈ និងសណា្ឋគារហ័ងហ្គ័នជាយឺចាប់ពីយប់ថ្ងៃទី២០ ខែកុម្ភៈឱ្យមកជួបក្រុមគ្រូពេទ្យប្រចាំការនៅសាលាបឋមសិក្សា និងអនុវិទ្យាល័យតេជោសែនកម្មករ ដើម្បីយកសំណាកទៅធ្វើតេស្តរកជំងឺកូវីដ១៩។ លើសពីនេះ រដ្ឋបាលខេត្តព្រះសីហនុក៏បានអំពាវនាវដល់ប្រជាពលរដ្ឋផ្សេងទៀតដែលបានទាក់ទង និងប៉ះពាល់ជាមួយជនជាតិចិនទាំង២ឱ្យធ្វើមកតេស្តរកជំងឺកូវីដ១៩ដូចគ្នាផងដែរ។
សូមកត់សម្គាល់ថា ខេត្តព្រះសីហនុ គឺជាខេត្តមួយបន្ថែមទៀតដែលចាប់ផ្តើមទទួលរងនូវការឆ្លងរាលដាលក្នុងសហគមន៍នៃជំងឺកូវីដ១៩ បន្តពីរាជធានីភ្នំពេញ និងខេត្តកណ្តាល។ នៅក្នុងកាលៈទេសៈនេះ លោកឃាង ភារម្យ អ្នកនាំពាក្យសាលាខេត្តព្រះសីហនុបានចេញមកអំពាវនាវឱ្យសាធារណជនទាំងអស់ត្រូវស្វែងរកព័ត៌មានពីប្រភពផ្លូវការ ដើម្បីជៀវាងការទទួលបាននូវព័ត៌មានមិនពិតពាក់ព័ន្ធនឹងបញ្ហាជំងឺកូវីដ១៩នេះនៅក្នុងខេត្តព្រះសីហនុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ