តុលាការលើកសវនាការសកម្មជនអតីតបក្សប្រឆាំងទៅបន្តធ្វើនៅសប្តាហ៍ក្រោយ តែមេធាវីថានឹងប៉ះពាល់ដល់សិទ្ធិកូនក្តី
សាលាដំបូងរាជធានីភ្នំពេញនៅព្រឹកថ្ងៃព្រហស្បតិ៍ នេះ បានបន្តបើកសវនាការសំណុំរឿងរួមគំនិតក្បត់ និង ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គមលើសកម្មជនអតីតគណបក្សសង្គ្រោះជាតិ។ សវនាការពេញមួយព្រឹកនេះ មិនមានការសម្រេចជាផ្លូវការអ្វីនៅឡើយទេ ដោយតុលាការប្រកាសបន្តសវនាការនេះនៅថ្ងៃទី២៥ ខែកុម្ភៈខាងមុខ។ ចំពោះបញ្ហានេះ មេធាវីការពារក្តីបានអះអាងថា ការបន្លាយពេលបន្តទៀតរបស់តុលាការនេះ គឺប៉ះពាល់ដល់សិទ្ធិទទួលបានការកាត់ក្តីដោយយុត្តិធម៌របស់ជនជាប់ចោទ។
ចុះផ្សាយនៅថ្ងៃ៖
ស្តាប់ - ០២:៣៤
លោកសំ សុគង់ មេធាវីការពារក្តីសកម្មជនអតីតគណបក្សសង្រ្គោះជាតិ បានអះអាងប្រាប់វិទ្យុបារាំងអន្តរជាតិនៅក្រោយសវនាការនៅព្រឹកនេះថា ការបន្លាយពេលវេលាបន្ថែមទៀតរបស់តុលាការនៅក្នុងសំណុំរឿងនេះ គឺពិតជាប៉ះពាល់ដល់សកម្មជនអតីតបក្សប្រឆាំងជាប្រាកដ។ ការប៉ះពាល់នេះ គឺមាន២សណ្ឋាន ទី១ ប៉ះពាល់ជនជាប់ចោទដែលកំពុងឃុំនៅក្នុងពន្ធនាគារដែលជាការបំពានសិទ្ធិទទួលបានការជំនុំជម្រះដោយយុត្តិធម៌របស់ពួកគេ។ ទី២ គឺប៉ះពាល់ផងដែរដល់អ្នកដែលនៅខាងក្រៅឃុំ ដោយពួកគេមិនស្រឡះអារម្មណ៍ ព្រោះនៅមិនទាន់ដឹងថាមានទោស ឬយ៉ាងណា ។ ម្យ៉ាងវិញទៀត ក៏ប៉ះពាល់ដល់ការប្រកបរបររកស៊ីរបស់ពួកគេផងដែរ។ នេះបើតាមការបញ្ជាក់របស់លោកមេធាវី សំ សុគង់។ ដូច្នេះហើយលោកមេធាវីចង់ឱ្យតុលាការបើកការជំនុំជម្រះឱ្យបានលឿនលើសំណុំរឿងនេះ។
តាមគម្រោងសវនាការសាលាដំបូងរាជធានីភ្នំពេញនៅថ្ងៃនេះ គឺតុលាការត្រូវសួរនាំទៅលើសកម្មជនអតីតបក្សសង្រ្គោះជាតិចំនួន៤រូបបន្ថែមទៀត ប៉ុន្តែសួរបានតែ២រូបប៉ុណ្ណោះ ខណៈ២រូបទៀតបានអវត្តមានដោយសារមានបញ្ហាសុខភាព។ តុលាការបានសួរនាំអ្នកទាំង២ពីសកម្មភាពរបស់ពួកគេដែលបានទៅចូលរួមវគ្គបណ្តុះបណ្តាលមួយនៅក្នុងប្រទេសម៉ាឡេស៊ីដែលនៅទីនោះ គឺពួកគេបានជួបជាមួយថ្នាក់ដឹកនាំនៃអតីតគណបក្សសង្រ្គោះជាតិ។ សំណួររបស់ចៅក្រមជំនុំជម្រះក៏បានផ្តោតលើគម្រោងរបស់ពួកគេទៅទទួលមាតុភូមិនិវត្តន៍របស់លោកសម រង្ស៊ី កាលពីថ្ងៃទី០៩ ខែវិច្ឆិកា ឆ្នាំ២០១៩ និងពាក់ព័ន្ធនឹងការប្រមូលកម្លាំងទៅទទួលលោកសម រង្ស៊ីនេះ។
សូមបញ្ជាក់ថា សវនាការនៅថ្ងៃនេះ គឺបន្តពីសវនាការកាលពីថ្ងៃទី២៨ មករា ដែលបន្តរដឹកគ្នាពីសវនាការថ្ងៃទី០៤ មករា ឆ្នាំ២០២១ និងបន្តពីថ្ងៃទី២៦ ខែវិច្ឆិកា ឆ្នាំ២០២០។ សកម្មជនអតីតបក្សប្រឆាំងចំនួន៥៩នាក់បានជាប់ពាក់ព័ន្ធនឹងសំណុំរឿងរួមគំនិតក្បត់ និងញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម។ ក្នុងចំណោមសកម្មជនទាំងនេះ មាន២នាក់កំពុងជាប់ឃុំនៅក្នុងពន្ធនាគារ។ លោកមេធាវីសំ សុគង់ បានបង្ហាញឱ្យដឹងថា សកម្មជនទាំង៥៩នាក់នេះ គឺភាគច្រើនពួកគេកំពុងស្នាក់នៅក្រៅប្រទេស ហើយតុលាការគ្រោងនឹងសួរនាំពួកគេឱ្យបានទាំងអស់គ្នា។
សូមជម្រាបជូនដែរថា ក្រៅពីសកម្មជនទាំង៥៩នាក់នេះ ថ្នាក់ដឹកនាំកំពូល មន្រ្តី និងថ្នាក់ដឹកនាំនៅតាមមូលដ្ឋានរបស់អតីតគណបក្សសង្រ្គោះជាតិជាច្រើននាក់ទៀតក៏រងនូវការចោទប្រកាន់ពីបទរួមគំនិតក្បត់ និងញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គមនេះផងដែរ។ ប៉ុន្តែ ពួកគេទាំងអស់នេះ នឹងត្រូវតុលាការសាលាដំបូងរាជធានីភ្នំពេញបើកសវនាការដាច់ឡែកមួយទៀតនៅថ្ងៃទី០៤ ខែមីនាខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ