គណៈកម្មការស៊ីហ្គេមកំពុងដាក់ស្នើសុំការផ្តល់វ៉ាក់សាំងកូវីដ១៩ដល់ក្រុមកីឡាករប្រមាណ១០០០នាក់
គណៈកម្មការរៀបចំការប្រកួតស៊ីហ្គេមកំពុងដាក់ស្នើសុំវ៉ាក់សាំងប្រឆាំងកូវីដ១៩ដល់ក្រុមកីឡាករ ដែលត្រៀមខ្លួនសម្រាប់ការប្រកួតស៊ីហ្គេមនៅចុងឆ្នាំ២០២១។ នេះបើតាមការគូសបញ្ជាក់របស់អគ្គលេខាធិការគណៈកម្មាធិការរៀបចំការប្រកួតកីឡាអាស៊ីអាគ្នេយ៍។ ជាជំហានដំបូង គណៈកម្មាធិការថា ពួកគេកំពុងដាក់ស្នើសុំវ៉ាក់សាំង ដើម្បីចាក់ជូនក្រុមកីឡាករប្រមាណជាង១០០០នាក់។
ចុះផ្សាយនៅថ្ងៃ៖
ស្តាប់ - ០១:៤៧
លោក វ៉ាត់ ចំរើន អគ្គលេខាធិការគណៈកម្មាធិការរៀបចំការប្រកួតកីឡាអាស៊ីអាគ្នេយ៍ បានថ្លែងប្រាប់វិទ្យុបារាំងអន្តរជាតិRFIថា គណៈកម្មាការបាននឹងកំពុងដាក់លិខិតស្នើដល់លោកនាយករដ្ឋមន្រ្តី ហ៊ុន សែន សុំផ្តល់អាទិភាពវ៉ាក់សាំងប្រឆាំងកូវីដ១៩ដល់ក្រុមកីឡាករ និងអត្តពលិក ដែលត្រៀមខ្លួនសម្រាប់ចូលរួមការប្រកួតស៊ីហ្គេមនៅចុងឆ្នាំ២០២១នេះ និងការប្រកួតស៊ីហ្គេមដែលកម្ពុជាធ្វើជាម្ចាស់ផ្ទះនៅឆ្នាំ២០២៣ខាងមុខ។
បើតាមលោក វ៉ាត់ ចំរើន គណៈកម្មាធិការបានដាក់ស្នើសុំវ៉ាក់សាំងដើម្បីចាក់ជូនក្រុមកីឡាករប្រមាណ១០៥១នាក់ បូករួមក្រុមកីឡាជម្រើសជាតិ គ្រូបង្វឹកផ្ទាល់ និងក្រុមមន្រ្តីបច្ចេកទេសដែលចាំបាច់។ ការចាក់វ៉ាក់សាំងកូវីដ១៩ដល់ក្រុមកីឡាករនៅពេលនេះ នឹងអាចធ្វើឲ្យពួកគេមានស្មារតី និងចិត្តសាស្រ្តល្អក្នុងការហ្វឹកហាត់ត្រៀមសម្រាប់ការប្រកួតមកដល់ ព្រោះថាការហ្វឹកហាត់មួយចំនួនទាមទារឲ្យចេញទៅហ្វឹកហាត់នៅក្រៅប្រទេស ដែលជាហានិភ័យមួយសម្រាប់ក្រុមកីឡាករប្រឈមនឹងការឆ្លងជំងឺកូវីដ១៩។ នេះបើតាមលោក វ៉ាត់ ចំរើន។
យ៉ាងណាមិញ នៅក្នុងបរិបទនៃជំងឺកូវីដ១៩នេះ លោក វ៉ាត់ ចំរើន ក៏បានលើកឡើងថា ស្ថានភាពសុខភាព ព្រមទាំងការហ្វឹកហាត់របស់ក្រុមកីឡាករនៅតែបន្តជាប្រក្រតី។ ជាប្រក្រតីដើម្បីត្រៀមខ្លួនឲ្យបានរួចរាល់ចំពោះការប្រកួតស៊ីហ្គេមនៅចុងឆ្នាំ២០២១នេះ។ បន្ថែមពីនេះ លោកថា ការត្រៀមខ្លួនសម្រាប់ឆ្នាំ២០២១នេះគឺពិតជាសំខាន់សម្រាប់កម្ពុជា ព្រោះថាការត្រៀមខ្លួនបានល្អនឹងមិនធ្វើឲ្យកម្ពុជាជួបបញ្ហាច្រើនសម្រាប់ការធ្វើជាម្ចាស់ផ្ទះនៅឆ្នាំ២០២៣។
គួរបញ្ជាក់ថា ការរៀបចំការប្រកួតស៊ីហ្គេមនេះត្រូវធ្វើឡើងជារៀងរាល់ពីរឆ្នាំម្តង។ នៅឆ្នាំ២០២១នេះ ការប្រកួតស៊ីហ្គេមនឹងធ្វើឡើងនៅប្រទេសវៀតណាម ចាប់ពីថ្ងៃទី២១វិច្ឆិកាដល់ថ្ងៃទី២ធ្នូ ហើយនៅឆ្នាំ២០២៣ខាងមុខ កម្ពុជានឹងធ្វើជាម្ចាស់ផ្ទះរៀបចំការប្រកួតកីឡាជាលក្ខណៈអាស៊ាននេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ