ក្រុមអង្គការសង្គមស៊ីវិល និងសហជីពនៅកម្ពុជា ដាក់ញត្តិនិងថ្កោលទោសចំពោះរដ្ឋប្រហារនៅភូមា
ក្រុមអង្គការសង្គមស៊ីវិល និងសហជីពចំនួន៦០នៅកម្ពុជា នៅថ្ងៃទី១២ ខែកុម្ភៈ នេះ បានជួបជុំគ្នានៅខាងមុខស្ថានទូតមីយ៉ាន់ម៉ា ក្នុងក្រុងភ្នំពេញ ដើម្បីដាក់ញ្ញត្តិបង្ហាញការមិនគាំទ្រចំពោះរដ្ឋប្រហារយោធា និងសំដែងនូវការគាំទ្រដល់ ពលរដ្ឋភូមា ដែលកំពុងទាមទារនូវសេរីភាព និងលំហរប្រជាធិបតេយ្យរបស់ពួកគេ។ អ្នកនាំពាក្យរដ្ឋាភិបាលថាក្រុមសង្គមស៊ីវិល មិនបានយល់ពីគោលការណ៍អាស៊ាន ដែលរក្សាជំហរមិនជ្រៀតជ្រែកកិច្ចការផ្ទៃក្នុងរបស់ប្រទេសជាសមាជិក។
ចុះផ្សាយនៅថ្ងៃ៖
ស្តាប់ - ០១:៥៦
លោកស្រី ចក់ សុភាព នាយិកាមជ្ឈមណ្ឌលសិទ្ធិមនុស្សកម្ពុជា ដែលបានចូលរួមដាក់ញ្ញត្តិដែរនោះ បានថ្លែងប្រាប់វិទ្យុបារាំងអន្តរជាតិនៅថ្ងៃទី១២ ខែកុម្ភៈ ថា ញ្ញត្តិ ដែលក្រុមអង្គការសង្គមស៊ីវិល និងសហជីពបានដាក់នាពេលនេះ មានគោលដៅទាមទារឲ្យមានការដោះលែង លោកស្រី អ៊ុង សាន ស៊ូជី ជាប្រមុខរដ្ឋភូមា, មន្ត្រី, និងសកម្មជនមួយចំនួន ដែលបង្ហាញជំហរប្រឆាំងនឹងរដ្ឋប្រហារក្នុងប្រទេសនេះ។
បើតាមលោកស្រី ចក់ សុភាព ញ្ញតិ្តខាងលើនេះ ក៏មានគោលដៅ បង្ហាញការគាំទ្រដល់ពលរដ្ឋភូមា ដែលកំពុង ប្រឆាំងទៅនឹងរដ្ឋប្រហារយោធានៅក្នុងប្រទេស និងចង់ឃើញលំហរប្រជាធិបតេយ្យត្រឡប់មកវិញ។
វិទ្យុបារាំងអន្តរជាតិមិនអាចទាក់ទងក្រសួងការបរទេសកម្ពុជា នៅថ្ងៃទី១២ ខែកុម្ភៈនេះ បានទេ។ ប៉ុន្តែ
លោក ផៃ ស៊ីផាន ដែលជាអ្នកនាំពាក្យរដ្ឋាភិបាលកម្ពុជា បានថ្លែងថា រដ្ឋធម្មនុញ្ញកម្ពុជាបានបញ្ជាក់យ៉ាងច្បាស់ថា កម្ពុជាមិនជ្រៀតជ្រែកកិច្ចការផ្ទៃក្នុងរបស់ប្រទេសណាមួយនោះទេ។ ម្យ៉ាងទៀត លោកបន្ថែមថា ក្រុមអង្គការសង្គមស៊ីវិលនឹងមិនធ្វើបែបនេះទេ ប្រសិនបើពួកគេបានយល់ពីគោលការណ៍របស់អាស៊ាន ដែលមិនលូកលាន់កិច្ចការផ្ទៃក្នុងរបស់ប្រទេសជាសមាជិក។
លោក ផៃ ស៊ីផាន ក៏បញ្ជាក់ដែរថា អ្វីដែលក្រុមអង្គការសង្គមស៊ីវិលចែងនៅក្នុងលក្ខន្តិកៈរបស់ខ្លួន ដែលថាមិនលូកលាន់កិច្ចការនយោបាយនោះ ពេលនេះពួកគាត់បានរំលោភលើលក្ខន្តិកៈ នេះរួចទៅហើយ។ លោកចាត់ទុកថានេះជារឿងគួរឲ្យអាម៉ាស់។
សូមជម្រាបជូនថា បន្ទាប់ពីរដ្ឋប្រហារទម្លាក់រដ្ឋាភិបាលស៊ីវីល កាលពីថ្ងៃទី០១ ខែកុម្ភៈ តុលាការភូមាបានប្រកាសឃុំឃាំងលោកស្រី អតីតទីប្រឹក្សារដ្ឋ អ៊ុង សាន ស៊ូជី ជាបណ្តោះអាសន្ន។ អាជ្ញាធរភូមាថ្មី បានចោទប្រកាន់លោកស្រី អ៊ុងសានស៊ូជី ពីបទរំលោភច្បាប់ពាណិជ្ជកម្ម។ នេះបើតាមការអះអាងរបស់អ្នកនាំពាក្យ គណបក្សសម្ព័ន្ធជាតិដើម្បីប្រជាធិបតេយ្យ នៅថ្ងៃពុធទី ៣កុម្ភៈ២០២១។ ក្រោយរដ្ឋប្រហារទម្លាក់រដ្ឋាភិបាលស៊ីវិលនេះដែរ សហគមន៍អន្តរជាតិបានធ្វើការថ្កោលទោស និងដាក់ទណ្ឌកម្មប្រទេសនេះ ខណៈដែលប្រជាជនបានងើបឡើងតវ៉ាប្រឆាំងនឹងរបបសឹក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ