សហជីព៖ សុវត្ថិភាពចំណីអាហារមិនទាន់ស្របទៅតាមស្តង់ដារ ខណៈក្រសួងរៀបចំពីសេចក្តីព្រាងច្បាប់ស្តីពីសុវត្ថិភាពចំណីអាហារ
សុវត្ថិភាពចំណីអាហារនៅកម្ពុជា មិនទាន់ស្របទៅតាមស្តង់ដារសុវត្ថិភាព ទៅតាមការចង់បានរបស់ភ្ញៀវទេសចរណ៍នៅឡើយទេ និយាយជារួម និងនិយាយដោយឡែកសម្រាប់អ្នកធ្វើការក្នុងវិស័យទេសចរណ៍នៅកម្ពុជា។ នេះបើតាមការលើកឡើងរបស់លោក ម៉ម រិទ្ធី ប្រធានសហព័ន្ធសហជីពកម្មករនិយោជិកវិស័យទេសចរណ៍សេវាកម្មកម្ពុជា នៅថ្ងៃទី៧កុម្ភៈនេះ។
ចុះផ្សាយនៅថ្ងៃ៖
ស្តាប់ - ០២:២៣
ការលើកឡើងរបស់លោក លោក ម៉ម រិទ្ធី ប្រធានសហព័ន្ធសហជីពកម្មករនិយោជិកវិស័យទេសចរណ៍និងសេវាកម្មកម្ពុជា ខណៈដែលរដ្ឋាភិបាលកំពុងធ្វើសេចក្តីព្រាងច្បាប់ស្តីពី «សុវត្ថិភាពម្ហូបអាហារ»។ សេចក្ដីព្រាងច្បាប់ស្ដីពីសុវត្ថិភាពម្ហូបអាហារ ដែលគ្រោងនឹងបញ្ចប់នៅចុងឆ្នាំ២០២១។
បើតាមលោក ម៉ម រិទ្ធី សុវត្ថិភាពចំណីអាហារនៅកម្ពុជាមិនទាន់ស្របទៅតាមស្តង់ដារ ដោយសារការលក់ម្ហូបអាហាររបស់អាជីវករភាគច្រើនគឺគ្មានអនាម័យ។ ម្ហូបអាហារដែលមានអាម័យមានតែអូតែលលំដាប់ស្តង់ដារតែប៉ុណ្ណោះ។ បន្ថែមពីនេះ បច្ចេកទេសរៀបចំនិងរសជាតិនៅមានកម្រិតនៅឡើយ។ សំខាន់ជាងនេះទៀតនោះ ទីផ្សារតម្លៃម្ហូបគឺមានតម្លៃខ្ពស់។
លោកបញ្ជាក់ថា មួយផ្នែកនៃបញ្ហានេះ បានទាញទម្លាក់ចំនួនភ្ញៀវទេសចរណ៍មកកម្ពុជា និងមិនអាចប្រជែងជាមួយប្រទេសក្បែរខាងបាន។ ជាក់ស្តែងប្រទេសថៃត្រូវបានគេមើលឃើញថា ម្ហូបអាហារមានស្តង់ដារអនាម័យ គុណភាព និងតម្លៃសមរម្យ។
ដោយឡែក លោក ម៉ម រិទ្ធី ប្រធានសហព័ន្ធសហជីពកម្មករនិយោជិកវិស័យទេសចរណ៍សេវាកម្មកម្ពុជា លើកឡើងថា ការបង្កើតឡើងនូវច្បាប់នេះ គឺជារឿងល្អ ក៏ប៉ុន្តែរដ្ឋាភិបាលត្រូវជំរុញឲ្យមានការអនុវត្តច្បាប់នេះអោយបានត្រឹមត្រូវ និងមានតម្លារភាព។
សូមជម្រាបជូនថា សេចក្តីព្រាងច្បាប់សុវត្ថិភាពចំណីអាហារនេះ បានបញ្ញត្តិពីគោលបំណង បង្កើតប្រព័ន្ធសុវត្ថិភាពម្ហូបអាហារសម្រាប់ការពារសុខភាពមនុស្ស និងអ្នកប្រើប្រាស់ តាមរយៈការទប់ស្កាត់ ការគ្រប់គ្រង និងលុបបំបាត់ការបំពុល និងគ្រោះថ្នាក់ដែលបណ្តាលមកពីម្ហូបអាហារផងដែរ។
សេចក្តីព្រាងច្បាប់ស្តីពីសុវត្ថិភាពអាហារនេះ ត្រូវបានរៀបចំឡើងក្នុងឆ្នាំ២០១៥ ដោយមាន១១ជំពូក ៥៣មាត្រា គ្របដណ្តប់លើម្ហូបអាហារទាំងកែច្នៃ និងមិនកែច្នៃដែលមានកំណត់ក្នុងច្បាប់ ព្រមទាំងលើខ្សែចង្វាក់ផលិតកម្មម្ហូបអាហារទាំងមូល ស្របតាមគោលការណ៍សុវត្ថិភាពម្ហូបអាហារ ចាប់ពីកសិដ្ឋានដល់តុបរិភោគ។
ដើម្បីលើកស្ទួយវិស័យម្ហូបអាហារនេះដែរ ក្រសួងការបរទេសកម្ពុជាថ្មីៗនេះ បានប្រកាសដាក់ឲ្យអនុវត្តនូវ «យុទ្ធសាស្ត្រការទូតសេដ្ឋកិច្ចឆ្នាំ២០២១-២០២៣» ដោយមានបញ្ជូល «ម្ហូបខ្មែរ» ជាផ្នែកមួយនៃការអនុវត្តការទូតសេដ្ឋកិច្ច និងជាការលើកកម្ពស់វប្បធម៌ខ្មែរនៅលើឆាកអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ