លោកហ៊ុន សែន ប្រកាសឲ្យកូនៗ សាច់ញាតិ និងរដ្ឋមន្ត្រីទាំងអស់ ចាក់វ៉ាក់សាំងកូវីដរបស់ចិន
លោកនាយករដ្ឋមន្ត្រី ហ៊ុន សែន បានប្រកាសនៅល្ងាចថ្ងៃអាទិត្យ ទី ៧ខែកុម្ភៈនេះថា លោកនឹងលើកទឹកចិត្តឲ្យកូនៗទាំងអស់របស់លោក និងរដ្ឋមន្ត្រី ព្រមទាំងថ្នាក់ដឹកនាំឯទៀត ដែលគ្រប់លក្ខខណ្ឌ ទៅចាក់វ៉ាក់សាំងប្រឆាំងកូវីដ១៩ របស់ចិន។ បើតាមលោកហ៊ុន សែន ការណ៍នេះ ធ្វើឡើងដើម្បីបញ្ជាក់ពីប្រសិទ្ធភាពនៃវ៉ាក់សាំង ស៊ីណូហ្វាម “Sinopharm” របស់ចិន ខណៈដែលលោកមិនអាចចាក់បាន ព្រោះមានអាយុលើស ៦០ឆ្នាំទៅហើយ។
ចុះផ្សាយនៅថ្ងៃ៖
ស្តាប់ - ០២:២៥
ឆ្លើយតបនឹងសំណួររបស់អ្នកសារព័ត៌មាន ក្នុងអំឡុងសន្និសីទកាសែតស្តីពីការទទួលយកវ៉ាក់សាំងប្រឆាំងកូវីដ ១៩ ដែលជាជំនួយរបស់ប្រទេសចិន ចំនួន ៦០ម៉ឺនដូសដំបូង នៅល្ងាចថ្ងៃទី០៧ខែកុម្ភៈ លោកនាយករដ្ឋមន្ត្រីហ៊ុន សែន អះអាងថា លោកជឿជាក់លើប្រសិទ្ធភាពនៃវ៉ាក់សាំង Sinopharm របស់ចិននេះ។ ការជឿជាក់នេះ បើតាមលោកប្រមុខដឹកនាំរដ្ឋាភិបាលកម្ពុជា ព្រោះថាវ៉ាក់សាំងនេះ ត្រូវបានទទួលស្គាល់ និងប្រើប្រាស់ដោយប្រទេសចំនួន ១៦នៅលើពិភពលោករួចទៅហើយ។
លោកហ៊ុន សែន អះអាងថា ទោះជាលោកមិនអាចចាក់វ៉ាក់សាំងដើម្បីបង្ហាញទំនុកចិត្តដល់ប្រជាពលរដ្ឋបាន ដោយសារតែលោកមានវ័យលើស ៦០ឆ្នាំទៅហើយ ប៉ុន្តែលោកនឹងឲ្យក្រុមគ្រួសារ សាច់ញាតិ និងមន្ត្រីជាន់ខ្ពស់ រាប់ពីថ្នាក់រដ្ឋមន្ត្រី ប្រមុខដឹកនាំកងទ័ពទាំងអស់ ដែលមានសុខភាពស្របទៅតាមលក្ខខណ្ឌ ឲ្យទៅចាក់វ៉ាក់សាំងនេះគ្រប់ៗគ្នា។
ជាការកត់សម្គាល់ បន្ទាប់ពីទទួលបានជំនួយវ៉ាក់សាំងពីប្រទេសចិនចំនួន៦០ម៉ឺនដូសនាពេលនេះ ប្រមុខរដ្ឋាភិបាលកម្ពុជាបញ្ជាក់ថា កម្ពុជាមានមហិច្ឆតាស្វះស្វែងរកវ៉ាក់សាំងបង្ការកូវីដ១៩បន្ថែមទៀត ដើម្បីចាក់ឲ្យប្រជាពលរដ្ឋខ្មែរយ៉ាងហោចណាស់ឲ្យបាន៨០% ឬស្មើនឹងជាង១៣លាននាក់។
សូមជម្រាបជូនថា វ៉ាក់សាំងដែលជាជំនួយរបស់ចិន ឈ្មោះ Sinopharm អាចចាក់បានតែទៅលើមនុស្ស ដែលមានអាយុចន្លោះពី ១៨ ដល់ ៥៩ឆ្នាំតែប៉ុណ្ណោះ។ ហើយមនុស្ស ដែលមិនទាន់អាចចាក់វ៉ាក់សាំងនេះបាន រួមមាន អ្នកមានតិចជាង ១៨ឆ្នាំ ឬ អាយុលើសពី ៦០ឆ្នាំ។ អ្នកមានអាការៈជំងឺដូចជា ក្តៅខ្លួន មានជំងឺផ្លូវដង្ហើម ឬ ជំងឺហឺត មានជំងឺរុំារ៉ៃ អាឡាក់ស៊ី មានជំងឺថ្លើម តម្រង់នោមធ្ងន់ធ្ងរ ឬ លើសឈាម ស្ត្រីមានផ្ទៃពោះ និងស្ត្រីក្នុងរយៈពេលបំបៅដោះ ឬ ស្ត្រីមានផែនការពរពោះក្នុងរយៈពេល ៣ខែ។
ដោយឡែក អ្នកមានជំងឺ ប្រកាច់ ឆ្កួតជ្រូក សរសៃប្រសាទ ឬ រលាកស្រោមខួរ ឬ ក៏មានជំងឺតំណពូជជាដើម ក៏មិនត្រូវបានអនុញ្ញាតឲ្យចាក់។ ជាមួយគ្នា អ្នកដែលពិនិត្យឃើញមានជំងឺកង្វះភាពផ្សាំពីកំណើត ឬ ជំងឺឆ្លង HIV មហារីកកូនកណ្តុរ ឈាមស ជំងឺភាពសុំា មហារីកដុំសាច់ ឬ មានប្រវត្តិឆ្លងជំងឺកូវីដ ក៏មិនអាចចាក់វ៉ាក់សាំងនេះបានដែរ។
គួរកត់សម្គាល់ថា កម្ពុជា បានក្លាយជាប្រទេសទី ៣ ក្នុងតំបន់អាស៊ាន ដែលបានទទួលវ៉ាក់សាំងប្រឆាំងកូវីដ១៩។ សិង្ហបុរី ជាប្រទេសដំបូងនៅអាស៊ាន ដែលចេញយុទ្ធនាការចាក់វ៉ាក់សាំងមុនគេ ដោយទទួលយកពីក្រុមហ៊ុនរបស់ប្រទេសអង់គ្លេស ខណៈឥណ្ឌូនេស៊ី ជាប្រទេសទី ២ ដែលយកវ៉ាក់សាំងពីចិន និងទី ៣គឺកម្ពុជា ដែលទទួលចាក់វ៉ាក់សាំងរបស់ចិនដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ