លោកនាយករដ្ឋមន្ដ្រី ហ៊ុន សែន ប្រកាសចាប់ផ្ដើមដំណើរការចាក់វ៉ាក់សាំងបង្ការកូវីដ១៩ នៅថ្ងៃទី១០ខែកុម្ភៈ
ដំណើរការចាក់វ៉ាក់សាំងបង្ការជំងឺកូវីដ១៩នៅកម្ពុជា នឹងចាប់ផ្ដើមនៅថ្ងៃទី១០ខែកុម្ភៈខាងមុខ។ នេះគឺជាការប្រកាសរបស់លោកនាយករដ្ឋមន្ដ្រី ហ៊ុន សែន នៅថ្ងៃសុក្រទី០៥ខែកុម្ភៈ តាមរយៈទំព័រហ្វេសប៊ុកផ្លូវការរបស់លោក។ ការប្រកាសរបស់ប្រមុខរដ្ឋាភិបាលកម្ពុជាដូច្នេះ ធ្វើឡើងតែពីរថ្ងៃប៉ុណ្ណោះ មុនពេលដែលវ៉ាក់សាំងបង្ការជំងឺកូវីដ១៩ ដែលជាជំនួយរបស់ប្រទេសចិន ចំនួន៦០ម៉ឺនដូស នឹងដឹកមកដល់កម្ពុជានៅល្ងាចថ្ងៃអាទិត្យទី០៧ខែកុម្ភៈចុងសប្ដាហ៍នេះ។
ចុះផ្សាយនៅថ្ងៃ៖
ស្តាប់ - ០២:១៨
ជាងមួយឆ្នាំក្រោយរងការលុកលុយពីជំងឺកូវីដ១៩ នៅទីបំផុតទៅ កម្ពុជានឹងមានវ៉ាក់សាំងបង្ការកូវីដ១៩ចាក់ឲ្យប្រជាពលរដ្ឋ ក្នុងដំណាក់កាលដំបូងចំនួន៦០ម៉ឺនដូស ដែលវ៉ាក់សាំងទាំងនេះជាជំនួយពីប្រទេសចិន។ លោកនាយករដ្ឋមន្ដ្រី ហ៊ុន សែន បានគូសបញ្ជាក់នៅថ្ងៃទី០៥ខែកុម្ភៈនេះថា បន្ទាប់ពីបានទទួលវ៉ាក់សាំងរួច កម្ពុជានឹងចាប់ផ្ដើមដំណើរការចាក់វ៉ាក់សាំងជាផ្លូវការនៅថ្ងៃពុធទី១០ខែកុម្ភៈ នៅមន្ទីរពេទ្យកាល់ម៉ែត ដោយលោកនិងមន្ដ្រីជាន់ខ្ពស់នៃកម្ពុជាដទៃទៀតនឹងចាក់វ៉ាក់សាំងនេះមុនគេ លើកលែងតែរដ្ឋមន្ដ្រីក្រសួងការពារជាតិ លោក ទៀ បាញ់ ដែលបានចាក់វ៉ាក់សាំងនេះរួចរាល់ហើយ។
គួររំឭកជូនបន្តិចថា វ៉ាក់សាំងដែលប្រទេសចិនផ្ដល់ជាជំនួយមកដល់កម្ពុជានាពេលនេះ មានឈ្មោះថា ស៊ីណូហ្វាម Sinopharm។ ក្រសួងសុខាភិបាលកម្ពុជា នៅថ្ងៃទី០៤ខែកុម្ភៈ បានចេញលិខិតប្រកាសអនុញ្ញាតឲ្យប្រើប្រាស់វ៉ាក់សាំង Sinopharm Covid-19 ដែលផលិតដោយវិទ្យាស្ថាន Beijing Institute of Biological Products Co.,Ltd នៃប្រទេសចិន ក្នុងលក្ខខណ្ឌនៃការប្រើប្រាស់បន្ទាន់ ដោយអនុវត្តតាមពិធីសារស្ដីពីយុទ្ធនាការចាក់វ៉ាក់សាំងកូវីដ១៩របស់រាជរដ្ឋាភិបាល។
ចំពោះវ៉ាក់សាំងនេះទៀតសោត កម្ពុជាបានរៀបចំទីតាំងចំនួនពីរដើម្បីរក្សាទុកឲ្យបានត្រឹមត្រូវតាមបច្ចេកទេស គឺមួយនៅមន្ទីរពេទ្យព្រះកេតុមាលា ជាទីតាំងរបស់ក្រសួងការពារជាតិ និងមួយទៀតនៅឃ្លាំងឱសថកណ្ដាលចោមចៅដែលជាទីតាំងរបស់ក្រសួងសុខាភិបាល។
ជាការកត់សម្គាល់ កម្ពុជាគឺជាប្រទេសដំបូងគេទី៣នៅក្នុងតំបន់អាស៊ានដែលចាក់វ៉ាក់សាំងកូវីដ១៩ដល់ប្រជាពលរដ្ឋរបស់ខ្លួន បន្ទាប់ពីប្រទេសសិង្ហបុរី និងប្រទេសឥណ្ឌូនេស៊ី។ សម្រាប់រដ្ឋាភិបាលកម្ពុជា វ៉ាក់សាំងបង្ការជំងឺកូវីដ១៩ គឺជាទំនិញយុទ្ធសាស្ត្រ ហើយការចាក់វ៉ាក់សាំងនេះ នឹងអាចផ្ដល់ជំនឿចិត្តដល់អ្នកវិនិយោគ ដោយមិនចាត់ទុកកម្ពុជា ជាប្រទេសគ្រោះថ្នាក់ដោយសារជំងឺកូវីដ១៩។ ការចាក់វ៉ាក់សាំងបង្ការជំងឺកូវីដ១៩នៅកម្ពុជា នឹងត្រូវធ្វើឡើងតាមគោលការណ៍ស្ម័គ្រចិត្ត និងមិនតម្រូវឲ្យបង់ប្រាក់កាសទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ