លោកសម រង្ស៊ី សុំអាមេរិកជួយឱ្យបានចូលរួមការបោះឆ្នោតខាងមុខ តែបក្សកាន់អំណាចចំអកថា ជាក្តីស្រមៃក្នុងសុបិន
ប្រធានស្តីទីអតីតគណបក្សសង្រ្គោះជាតិ លោកសម រង្ស៊ី កាលថ្ងៃទី២៩ ខែមករា សប្តាហ៍មុន បានសរសរលិខិតមួយទៅកាន់រដ្ឋមន្រ្តីការបរទេសថ្មីនៃរដ្ឋការលោកចូ បៃដិន ដោយសម្តែងការអបអរសាទរផង និង ស្នើសុំឱ្យជួយដល់ក្រុមរបស់ខ្លួនផង។ លោកសម រង្ស៊ី បានស្នើសុំឱ្យរដ្ឋមន្រ្តីអាមេរិកថ្មីនេះ ជួយឱ្យក្រុមមន្រ្តីអតីតគណបក្សប្រឆាំងអាចចូលប្រទេសកម្ពុជាវិញ ដើម្បីចូលរួមការបោះឆ្នោតខាងមុខ។ ប៉ុន្តែ គណបក្សកាន់អំណាច បានចំអកថា ការចង់បានរបស់លោក សម រង្ស៊ី នេះ គឺគ្រាន់តែជាការស្រមើស្រមៃនៅក្នុងសុបិនតែប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:១៤
តាមរយៈបណ្តាញសង្គមតេឡេក្រាម លោកសុខ ឥសាន អ្នកនាំពាក្យគណក្សប្រជាជនកម្ពុជា បានអះអាងថា ការសរសេរលិខិតទៅកាន់រដ្ឋមន្ត្រីការបរទេសអាមេរិក សុំជួយឱ្យបានចូលរួមបោះឆ្នោតនាពេលខាងមុខរបស់លោក សម រង្ស៊ី គឺចេះតែសរសេរទៅរកគេ អត់ចេះខ្មាស់អៀន ព្រោះគ្មាននរណាទទួលស្គាល់សោះឡើយ។ លោក សុខ ឥសាន ថែមទាំងចំអកទៀតថា លោក សម រង្ស៊ី និងក្រុមមន្រ្តីដទៃទៀតរបស់អតីតបក្សប្រឆាំង ដែលគិតថាបរទេសអាចជួយខ្លួនបានចូលរួមការបោះឆ្នោតនោះ គឺជាក្តីស្រមៃនៅក្នុងសុបិនតតែប៉ុណ្ណោះ។
លោក សម រង្ស៊ី ក្នុងនាមប្រធានស្តីទីអតីតគណបក្សសង្រ្គោះជាតិ កាលពីថ្ងៃទី២៩ ខែមករា បានផ្ញើលិខិតអបអរសាទរមួយទៅកាន់លោក អេនតូនី ប្លីនខេន(Antony Blinken)ដែលត្រូវបានតែងតាំងជារដ្ឋមន្រ្តីការបរទេសថ្មីនៃរដ្ឋបាលលោកចូ បៃដិន។ មិនត្រឹមតែអបអរសាទរទេ លោកសម រង្ស៊ី បានប្រាប់លោករដ្ឋមន្រ្តីការបរទេសថ្មីអាមេរិកពីបំណងចង់ឱ្យមានការជំនុំជម្រះដោយភាពយុត្តិធម៌លើក្រុមមន្រ្តីអតីតបក្សប្រឆាំង ដែលការធ្វើបែបនេះ គឺអាចឱ្យពួកគេវិលត្រឡប់ចូលប្រទេសកម្ពុជាវិញដោយសុវត្ថិភាព ដើម្បីប្រឈមមុខនឹងការចោទប្រកាន់នានា និងស្វែងរកដំណោះស្រាយ និងរៀបចំខ្លួនសម្រាប់ចូលរួមការបោះឆ្នោតដោយសេរីភាព និងយុត្តិធម៌នាពេលខាងមុខនេះ។
ក៏ប៉ុន្តែ លោក សុខ ឥសាន បានប្រាប់ទៅក្រុមលោកសម រង្ស៊ី ថា កុំសង្ឃឹមថាបានចូលរួមការបោះឆ្នោតនាឆ្នាំ២០២២- ២០២៣ឱ្យសោះ និងថា អាមេរិកអត់មានដាក់ទូតជាមួយក្រុមមន្រ្តីអតីតបក្សប្រឆាំងឡើយ។ ដូច្នេះហើយ សំណើររបស់ពួកគេ នឹងត្រូវបោះចូលក្នុងធុងសម្រាម។ សម្រាប់លោក សុខ ឥសាន លំហរសិទ្ធិមនុស្ស និងប្រជាធិបតេយ្យនៅកម្ពុជា គឺ មានយ៉ាងទូលំទូលាយសម្រាប់គណបក្សនយោបាយ និង ពលរដ្ឋគ្រប់រូប លើកលែងតែក្រុមមន្រ្តីអតីតបក្សប្រឆាំង ដែលលោកចាត់ទុកថា ក្រុមឧទ្ទាមក្រៅច្បាប់តែប៉ុណ្ណោះ។
សូមបញ្ជាក់ថា មុនលិខិតលោក សម រង្ស៊ី ២ថ្ងៃ ពោលគឺកាលពីថ្ងៃទី២៧ ខែមករា រដ្ឋមន្រ្តីការបរទេសកម្ពុជា លោកប្រាក់ សុខុន ក៏បានសរសេរលិខិតអបអរសាទររដ្ឋមន្រ្តីការបរទេសថ្មីអាមេរិកផងដែរ។ ក្រៅពីនិយាយពីការប្តេជ្ញាចិត្តពង្រឹងទំនាក់ទំនងឱ្យល្អប្រសើរជាមួយអាមេរិក លោកប្រាក់ សុខុន ក៏បានប្រាប់លោករដ្ឋមន្រ្តីការបរទេសអាមេរិកពីគោលជំហររបស់កម្ពុជាក្នុងការរក្សាសន្តិភាព ស្ថិរភាពនយោបាយ និង ប្រកាន់នូវគោលការណ៍លទ្ធិប្រជាធិបតេយ្យសេរីពហុបក្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ