លោកស្រីមួរ សុខហួរ៖ ការបង្កើតបក្សថ្មីមិនផ្តល់ប្រយោជន៍ដល់ប្រជាធិបតេយ្យ និងមិនចំណេញដល់ពលរដ្ឋឡើយ
អនុប្រធានអតីតគណបក្សសង្រ្គោះជាតិ លោកស្រីមួរ សុខហួរ បានអះអាងប្រាប់វិទ្យុបារាំងអន្តរជាតិនៅព្រឹកថ្ងៃព្រហស្បតិ៍នេះថា ការបង្កើតគណបក្សនយោបាយថ្មីរបស់លោកអ៊ូ ច័ន្ទរ័ត្ន និងមន្ត្រីអតីតបក្សប្រឆាំងផ្សេងទៀត គឺមិនបានផ្តល់ផលប្រយោជន៍ដល់ប្រជាធិបតេយ្យ និងមិនចំណេញទាល់តែសោះដល់ប្រជាពលរដ្ឋខ្មែរ។ ការលើកឡើងរបស់លោកស្រីមួរ សុខហួរនេះ គឺស្របពេលដែលគណបក្សថ្មី«កែទម្រង់កម្ពុជា»របស់លោកអ៊ូ ច័ន្ទរ័ត្ន កំពុងត្រូវបានរៀបចំឯកសារចុះបញ្ជីនៅក្រសួងមហាផ្ទៃ និងអាចប្រកាសជាផ្លូវការនៅខែក្រោយនេះ។
ចុះផ្សាយនៅថ្ងៃ៖
ស្តាប់ - ០២:០៦
«គ្មានផលប្រយោជន៍ដល់ប្រជាធិបតេយ្យ និងមិនចំណេញដល់ប្រជាពលរដ្ឋ» គឺជាការអះអាងរបស់លោកស្រីមួរ សុខហួរទៅកាន់អ្នកដែលបាន និងកំពុងរៀបចំបង្កើតបក្សនយោបាយថ្មី ដើម្បីចូលរួមការបោះឆ្នោតនៅក្នុងឆ្នាំ២០២២ និងឆ្នាំ២០២៣ខាងមុខ។ អនុប្រធានអតីតគណបក្សសង្រ្គោះជាតិដែលកំពុងស្នាក់នៅក្រៅប្រទេសរូបនេះ បានលើកឡើងថា ពួកគេគួរតែគិតដល់ប្រជាពលរដ្ឋ និងមិនត្រូវធ្វើអ្វីដែលជាការចង់បានរបស់លោកនាយករដ្ឋមន្រ្តីហ៊ុន សែន ប្រធានគណបក្សប្រជាជនកម្ពុជានោះទេ។ សម្រាប់លោកស្រីមួរ សុខហួរ បើទោះបីមានការបង្កើតបក្សនយោបាយថ្មីក្តី ប៉ុន្តែវាមិនអាចមកជំនួសអតីតបក្សសង្រ្គោះជាតិដែលកើតចេញពីការរួបរួមគ្នារវាងលោកសម រង្ស៊ី និងលោកកឹម សុខាបានឡើយ។
ផ្ទុយពីលោកស្រីមួរ សុខហួរ លោកសុខ ឥសាន អ្នកនាំពាក្យគណបក្សប្រជាជនកម្ពុជាវិញ បានលើកឡើងថា ការបង្កើតគណបក្សនយោបាយថ្មី គឺជាសិទ្ធិនយោបាយរបស់ប្រជាពលរដ្ឋ និង អ្នកនយោបាយ។ លោកបានគូសបញ្ជាក់ទៀតថា អ្នកបង្កើតគណបក្សនយោបាយ សុទ្ធតែមានសង្ឃឹមថាបានឈ្នះការបោះឆ្នោត ប៉ុន្តែវាអាស្រ័យទៅលើការសម្រេចចិត្តរបស់ប្រជាជនកម្ពុជាក្នុងពេលបោះឆ្នោត។
សូមកត់សម្គាល់ថា នាពេលចុងក្រោយនេះ លោកអ៊ូ ច័ន្ទរ័ត្ន អតីតអ្នកតំណាងរាស្រ្តនៃអតីតគណបក្សសង្រ្គោះជាតិបានរៀបចំបង្កើតគណបក្សនយោបាយថ្មីមួយឈ្មោះថា «កែទម្រង់កម្ពុជា»។ គណបក្សថ្មីនេះ កំពុងត្រូវបានរៀបចំឯកសារពាក់ព័ន្ធ ដើម្បីចុះបញ្ជីនៅក្រសួងមហាផ្ទៃ និងប្រកាសបើកគណបក្សជាផ្លូវការអាចនៅក្នុងដើមខែកុម្ភៈខាងមុខនេះ។ ថ្វីបើបង្កើតបក្សនយោបាយថ្មី ប៉ុន្តែលោកអ៊ូ ច័ន្ទរ័ត្ន បានអះអាងថា គ្មានបំណងប្រកួតប្រជែងនឹងអតីតគណបក្សសង្រ្កោះជាតិនោះឡើយ។ លោកបានគូសបញ្ជាក់ថា បើសិនលោកកឹម សុខា មានសិទ្ធិធ្វើនយោបាយឡើងវិញនៅពេលណា ហើយចង់មកដឹកនាំបក្សថ្មីរបស់លោក គឺលោកទទួលស្វាគមន៍ដោយដៃទាំងពីរ។
ប៉ុន្តែ បើទោះបីលោក កឹម សុខា មិនមកដឹកនាំ ក៏គណបក្សថ្មីនេះនឹងរលាយខ្លួនឯង ឈប់ធ្វើសកម្មភាពដែរ ដើម្បីស្នើសុំចូលរួមដើរលើវិថីនយោបាយជាមួយលោកកឹម សុខា ។ លោកអ៊ូ ច័ន្ទរ័ត្ន បានបញ្ជាក់ថា នេះក៏ព្រោះតែលោកមិនចង់ឱ្យបែកបាក់សំឡេងប្រឆាំង ដោយសារតែគោលបំណងរបស់លោក គឺប្រកួតប្រជែងជាមួយនឹងគណបក្សកាន់អំណាចតែមួយប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ