រយៈពេល១ឆ្នាំ៖ កម្ពុជាមានអ្នកឆ្លងកូវីដ១៩ ៤៦០នាក់ និងមិនមានអ្នកស្លាប់
ថ្ងៃទី២៧ ខែមករា ឆ្នាំ២០២១នេះ គឺគម្រប់មួយឆ្នាំដែលកម្ពុជា ចាប់ផ្តើមរកឃើញអ្នកវិជ្ជមានវីរុសផ្លូវដង្ហើម ឬកូវីដ១៩ ទៅលើបុរសជនជាតិចិនម្នាក់នៅខេត្តព្រះសីហនុ មកពីក្រុងវូហាន ប្រទេសចិន។ រាប់ចាប់តាំងពីករណីនោះមក កម្ពុជាបានរកឃើញអ្នកវិជ្ជមានកូវីដ១៩ ជាបន្តបន្ទាប់ រហូតឈានដល់ការផ្ទុះចូលទៅក្នុងសហគមន៍ផងដែរ។ តែយ៉ាងណាមិញ រយៈពេលមួយឆ្នាំនេះ កម្ពុជាមិនមានកំណត់ត្រាមានអ្នកស្លាប់ដោយសារជំងឺកូវីដ១៩នោះទេ។
ចុះផ្សាយនៅថ្ងៃ៖
ស្តាប់ - ០៣:៥៤
ផ្តើមចេញពីករណីវិជ្ជមានជំងឺកូវីដ១៩ ទៅលើបុរសជនជាតិចិនម្នាក់នៅខេត្តព្រះសីហនុ ក្រោយពីបុរសវ័យ៦០ឆ្នាំរូបនោះ បានធ្វើដំណើរមកពីក្រុងវូហាន ប្រទេសចិន ជាទីតាំងនៃការផ្ទុះចេញនូវជំងឺកូវីដ១៩ជាសកលលោក កម្ពុជាក៏បានកត់ត្រាជាប្រទេសរកឃើញមានអ្នកផ្ទុកជំងឺកូវីដ១៩ ចាប់តាំងពីថ្ងៃទី២៧ មករា ឆ្នាំ២០២០នោះមក។ ជាបន្តបន្ទាប់ បើទោះបីកម្ពុជាកំពុងប្រឈមនឹងការឆ្លងជំងឺកូវីដ១៩ក្តី តែកម្ពុជាបានអនុញ្ញាតឲ្យនាវាកម្សាន្តអាមេរិក Westerdam ផ្ទុកអ្នកដំណើ២២៥៧នាក់ ចូលចុះចតនៅខេត្តព្រះសីហនុ កាលពីថ្ងៃទី១៤កុម្ភៈ ក្រោយតែពីនាវា Westerdam ត្រូវបានបដិសេធចូលចតពីប្រទេសថៃ និងប្រទេសវៀតណាម ។
រហូតដល់ថ្ងៃទី៧មីនា កម្ពុជាបានរកឃើញករណីវិជ្ជមានកូវីដ១៩ ជាលើកទី២ ដែលកើតឡើងលើបុរសជនជាតិខ្មែរ រស់នៅខេត្តសៀមរាប បន្ទាប់ពីបុរសរូបនោះមានទំនាក់ទំនងដោយផ្ទាល់ជាមួយបុរសជនជាតិជប៉ុនដែលមានផ្ទុកមេរោគកូវីដ១៩ស្រាប់។ ទន្ទឹមនឹងការឃើញករណីកូវីដ១៩ ទី២នៅកម្ពុជា ជនជាតិខ្មែរអ៊ីស្លាមប្រមាណជាង១០០នាក់ ក៏បានរកឃើញមានវិជ្ជមានកូវីដ១៩ បន្ទាប់ពីពួកគេបានទៅចូលរួមពិធីសាសនានៅប្រទេសម៉ាឡេស៊ី។
តួលេខនៃអ្នកផ្ទុកជំងឺកូវីដ១៩នៅកម្ពុជា បានកើនឡើងស្ទើរជារៀងរាល់ថ្ងៃ រហូតដល់ថ្ងៃទី២២មីនាឆ្នាំ២០២០ ក្រសួងសុខាភិបាលបានរកឃើញអ្នកកើតជំងឺកូវីដ១៩ រហូតដល់៣១នាក់នៅឯខេត្តព្រះសីហនុ។ ក្នុងនោះមានបុរស២នាក់ជាជនជាតិខ្មែរ និង២៩នាក់ទៀតជាជនជាតិបារាំង។
ស្ថានភាពកូវី១៩នៅកម្ពុជា បានចាប់ផ្តើមមានសភាពធ្ងន់ធ្ងរ និងទន្ទឹមនឹងវិធានការទប់ស្កាត់ការចម្លងជំងឺផ្លូវដង្ហើមនេះ លោកនាយករដ្ឋមន្រ្តី ហ៊ុន សែន នៅថ្ងៃទី៨មេសា បានដាក់វិធានការហាមឃាត់ការធ្វើដំណើរចេញក្រៅទីក្រុងភ្នំពេញក្នុងរយៈពេលមួយសប្តាហ៍ នៅអំឡុងពេលកម្ពុជាត្រៀមរៀបចំពិធីបុណ្យចូលឆ្នាំប្រពៃណីជាតិ។
ក្រោយពីមានវិធានការសុខាភិបាល និងភាគច្រើននៃការរកឃើញវិជ្ជមានកូវីដ១៩នៅកម្ពុជា ជាករណីនាំចូល ស្ថានភាពកូវីដ១៩នៅកម្ពុជាចាប់ផ្តើមថមថយបន្តិច ក៏ប៉ុន្តែជើងហោះក្រៅប្រទេសមួយចំនួនក៏នៅតែបន្តរឹតបន្តឹង។
គួរកត់សម្គាល់ថា ការកត់ត្រាអ្នកវិជ្ជមានកូវីដ១៩មានជាបន្តបន្ទាប់ តែក្នុងអត្រាមួយទាបនៅរយៈពេលប៉ុន្មានខែ ក្រោយការដាក់វិធានការរឹតបន្តឹងរបស់រដ្ឋាភិបាលកម្ពុជា។ ក៏ប៉ុន្តែករណីវិជ្ជមានកូវីដ១៩ បានផ្ទុះជាថ្មីម្តងទៀត តាមរយៈព្រឹត្តិការណ៍៣វិច្ឆិកា។ ព្រឹត្តិការណ៍៣វិច្ឆិកា ដែលជាការរកឃើញលើរដ្ឋមន្រ្តីការបរទេសហុងគ្រី លោក Péter Szijjártó។ ក្រោយពីការរកឃើញនេះ លោកនាយករដ្ឋមន្រ្តី ហ៊ុន សែន ព្រមទាំងមន្រ្តីជាន់ខ្ពស់ជាច្រើនត្រូវបានធ្វើចត្តាឡីស័ក ដើម្បីតាមដានមើលថា លោកបានឆ្លងជំងឺកូវីដ១៩ឬក៏អត់។ តែយ៉ាងណាជាតុល្យការនៃព្រឹត្តិការណ៍៣វិច្ឆិកា កម្ពុជាបានរកឃើញអ្នកឆ្លងជំងឺកូវីដ១៩ ចំនួន៤នាក់ ក្នុងនោះមានតំណាងរាស្ត្រ លោក សួស យ៉ារ៉ា ផងដែរ។
បន្ទាប់ពីព្រឹត្តិការណ៍៣វិច្ឆិកា បានបិទបញ្ចប់នៅថ្ងៃទី១៨វិច្ឆិកាឆ្នាំ២០២០ កម្ពុជាបានប្រឈមនឹងការឆ្លងជំងឺកូវីដ១៩ជាថ្មីម្តងទៀតនៅថ្ងៃទី២៨វិច្ឆកា ដែលត្រូវបានគេស្គាល់ថាជាព្រឹត្តិការណ៍ឆ្លងកូវីដ១៩ជាសហគមន៍។ ព្រឹត្តិការណ៍សហគមន៍បានផ្តើមរកឃើញពីលោក ឆែម សាវុធ អគ្គនាយកពន្ធនាគារនៃក្រសួងមហាផ្ទៃ និងបន្តរាលដាលជាបន្តបន្ទាប់ ជាពិសេសនៅទីក្រុងភ្នំពេញ ដែលបណ្តាលឲ្យអត្រាអ្នកឆ្លងជំងឺកូវីដ១៩មានការកើនឡើងលឿន និងប្រជាពលរដ្ឋរាប់ពាន់ត្រូវបានយកសំណាកទៅធ្វើតេស្ត និងធ្វើចត្តាឡីស័ក។
ស្ថានការណ៍ជំងឺកូវីដ១៩នៅតែបន្តយាយីនៅកម្ពុជា ដោយរយៈកាលចុងក្រោយ កម្ពុជាកំពុងប្រឈមនឹងការទប់ស្កាត់ជំងឺកូវីដ១៩ ក្រោយពលករប្រមាណជាងមួយម៉ឺននាក់ បានត្រលប់ចូលមកកម្ពុជាវិញ ក្រោយការផ្ទុះជំងឺកូវីដ១៩ជាសហគមន៍ នៅប្រទេសថៃ។ គិតមកទល់ថ្ងៃទី២៧មករានេះ មានពលករខ្មែរ៨៣រកឃើញថាវិជ្ជមានកូវីដ១៩។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល បានលើកឡើងថា រយៈពេលមួយឆ្នាំមកនេះ ចំនួនអ្នកឆ្លងជំងឺកូវីដ១៩ ជាចំនួនមួយច្រើនសម្រាប់ប្រទេសកម្ពុជា តែយ៉ាងណាការចូលរួមសហការពីប្រជាពលរដ្ឋក្នុងការពារខ្លួន ជាវិធានការមួយល្អដើម្បីទប់ស្កាត់ការឆ្លងជាបន្ត។
គួរបញ្ជាក់ជូនថា មួយឆ្នាំមកនេះ កម្ពុជាបានរកឃើញអ្នកឆ្លងជំងឺកូវីដ១៩ សរុបចំនួន៤៦០នាក់ និងមិនមានអ្នកស្លាប់ដោយសារជំងឺកូវីដ១៩នេះណាម្នាក់ឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ