ក្រសួងសេដ្ឋកិច្ច៖ វិស័យកសិកម្ម និងកសិឧស្សាហកម្មអាចជួយឱ្យសេដ្ឋកិច្ចកម្ពុជាងើបឡើងវិញលឿន
បន្ទាប់ពីបានរងផលប៉ះពាល់ ជាសកលពីវិបត្តិកូវីដ១៩ ក្រសួងសេដ្ឋកិច្ច និងហិរញ្ញវត្ថុ បានដាក់ចេញនូវគោលនយោបាយ ៣ចំនុច ដើម្បីជំរុញឱ្យសេដ្ឋកិច្ចកម្ពុជាងើបឡើងវិញឆាប់រហ័សក្នុងឆ្នាំ២០២១។ ក្នុងនោះវិស័យកសិកម្ម និងកសិឧស្សាហកម្មគឺជាដង្ហើមសេដ្ឋកិច្ច ព្រោះកម្ពុជា ជាប្រទេសមានសក្តានុពលកសិកម្ម និងមានលទ្ធភាពនាំចេញផលិតផលកសិកម្មទាំងនេះ ទៅក្រៅប្រទេសបានទៀតផង។
ចុះផ្សាយនៅថ្ងៃ៖
ស្តាប់ - ០២:១៧
លោកវង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ ថ្លែងថា បើទោះជាកូវីដ១៩មិនទាន់ផុតរលត់ពីកម្ពុជា តែកម្ពុជាអាចស្តារសេដ្ឋកិច្ចឡើងវិញបាន តាមរយៈគោលនយោបាយ ៣ចំនុច ទី១.គឺការធានាបានការរស់នៅបន្តបាន ទី២. ការធ្វើឱ្យរស់រវើកឡើងវិញនូវជីវភាពរបស់ប្រជាពលរដ្ឋ ក៏ដូចជាផ្នែកអាជីវកម្ម ធុរកិច្ច និងសង្គមទាំងមូល និងទី៣. កិច្ចសម្រួលពាណិជ្ជកម្ម កាត់បន្ថយការចំណាយក្រោមតុ ដើម្បីបង្កបរិយាកាសដល់អ្នកវិនិយោគក្នុង និងក្រៅស្រុក។
សម្រាប់កម្ពុជា កសិកម្មគឺជាដង្ហើមសេដ្ឋកិច្ច ស្របពេលដែលកម្ពុជា មានដីកសិកម្មច្រើន មិនត្រឹមតែផលិតសម្រាប់ហូប និងផ្គត់ផ្គង់ក្នុងស្រុកទេ គឺអាចនាំចេញផលិតផលទាំងនេះ ទៅក្រៅប្រទេសទៀតផង។ ទន្ទឹមនឹងនេះ ភាពប្រកួតប្រជែង តាមរយៈការបន្ទាបថ្លៃដើមនៃការផលិតក៏ជាដើមចម នាំឱ្យសន្ទុះការនាំចេញមានការកើនឡើងខ្ពស់ ដែលនេះជាហេតុផលធ្វើឱ្យសេដ្ឋកិច្ចកម្ពុជា រក្សាបាននៅលំនឹងសេដ្ឋកិច្ច។ នេះបើតាមលោក វង្សី វិស្សុត។
លោករដ្ឋលេខាធិការប្រចាំការបន្តថា ប្រទេសដែលមានសមត្ថភាព ធ្វើឱ្យសេដ្ឋកិច្ចងើបលឿនជាងគេ គឺជាប្រទេសដែលពឹងផ្អែកលើវិស័យកសិកម្ម និងឧស្សាហកម្ម មិនមែនជាប្រទេសដែលពឹងលើសេវាកម្មនោះទេ បើពឹងលើផ្នែកនេះ សេដ្ឋកិច្ចនឹងមានការងើបឡើងយឺតបំផុត។
អ្នកវិភាគ និងអ្នកជំនាញសេដ្ឋកិច្ចនានាមើលឃើញថា វិស័យកសិកម្ម និងកសិឧស្សាហកម្មពិតជាសំខាន់សម្រាប់ស្តារសេដ្ឋកិច្ចកម្ពុជាឡើងវិញក្រោយកូវីដ១៩ ស្របពេលដែលវិស័យអាទិភាពមួយចំនួនទៀតរងការវាយប្រហារយ៉ាងដំណំពីឥទ្ធិពលនៃជំងឺឆ្លងសកល ក៏ប៉ុន្តែ ដើម្បីឲ្យវិស័យទាំងនេះ អាចដើរទៅមុខ លុះត្រាតែរដ្ឋាភិបាលមានយន្តការជាក់លាក់ផងដែរ។
ទោះយ៉ាងណា បើតាមលោក វង្សី វិស្សុត ដើម្បីជំរុញខឿនសេដ្ឋកិច្ចកម្ពុជាឱ្យកាន់តែខ្លាំង និងរឹងមាំ កម្ពុជាត្រូវតែបន្តអនុវត្តការបង្កើនភាពធនសេដ្ឋកិច្ចជាបន្តទៀត ដែលកាលពីឆ្នាំ២០២០ កម្ពុជាបានអនុវត្តល្អប្រសើរហើយ ទើបធ្វើឱ្យសេដ្ឋកិច្ចកម្ពុជាធ្លាក់ចុះត្រឹម ដក៣,១%។ លោកថា ប្រសិនមិនមានការគ្រប់គ្រងល្អ និងអន្តរាគមន៍មានប្រសិទ្ធភាពទេនោះ សេដ្ឋកិច្ចកម្ពុជាអាចនឹងធ្លាក់ចុះច្រើនជាងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ