តុលាការចាប់ផ្តើមសួរឆ្លើយលើមន្រ្តី និងសកម្មជនអតីតបក្សប្រឆាំងរឿងរួមគំនិតក្បត់ និងញុះញង់ឱ្យប្រព្រឹត្តបទល្មើស
នៅព្រឹកថ្ងៃព្រហស្បតិ៍នេះ សាលាដំបូងរាជធានីភ្នំពេញ បានបើកសវនាការសួរឆ្លើយទៅលើមន្រ្តី និងសកម្មជនអតីតគណបក្សសង្រ្គោះជាតិប្រមាណ៦០នាក់នៅក្នុងសំណុំរឿងរួមគំនិតក្បត់ និងញុះញង់ឱ្យប្រព្រឹត្តបទល្មើសជាអាទិ៍។ សវនាការនៅព្រឹកនេះ មិនទាន់មានការសម្រេចជាផ្លូវការបែបណានោះទេ។ ប៉ុន្តែ អ្នកការពារសិទ្ធិមនុស្សអង្គការសហប្រជាជាតិបានសម្តែងកង្វល់ចំពោះសវនាការលើមនុស្សច្រើននាក់នេះដោយថា ការទទួលបានការជំនុំជម្រះដោយយុត្តិធម៌របស់ពួកគេប្រឈមនឹងហានិភ័យ។
ចុះផ្សាយនៅថ្ងៃ៖
ស្តាប់ - ០២:១៧
សវនាការនៅថ្ងៃព្រហស្បតិ៍នេះ គឺជាសវនាការដំណាក់កាលទី១នៃសំណុំរឿងរួមគំនិតក្បត់ និងញុះញង់ឱ្យប្រព្រឹត្តបទសល្មើសជាអាទិ៍ដែលពាក់ព័ន្ធនឹងមន្រ្តី និងសកម្មជនអតីតគណបក្សសង្រ្គោះជាតិប្រមាណជាង១៤០នាក់។ តុលាការសាលាដំបូងរាជធានីភ្នំពេញបានបំបែកសំណុំរឿងនេះជា២ដំណាក់កាលព្រោះតែមានមនុស្សច្រើនពេក ដោយដំណាក់កាលទី១ធ្វើឡើងនៅថ្ងៃនេះ និងដំណាក់កាលទី២ នឹងធ្វើឡើងនៅថ្ងៃទី០៤ ខែមីនា ឆ្នាំ២០២១។
មុនសវនាការនេះមួយថ្ងៃនេះ លោកស្រី រ៉ូណា ស្មីត អ្នករាយការណ៍ពិសេសអង្គការសហប្រជាជាតិទទួលបន្ទុកស្ថានភាពសិទ្ធិមនុស្សនៅកម្ពុជាបានបង្ហាញនូវកង្វល់អំពីការជំនុំជម្រះក្តីដែលលោកស្រីចាត់ទុកថា មានលក្ខណៈទ្រង់ទ្រាយធំ នេះ។ តាមរយៈទំព័រហ្វេសប៊ុក លោកស្រីរ៉ូណា ស្មីត បានលើកឡើងថា សវនាការនេះនឹងធ្វើឱ្យសិទ្ធិបុគ្គលរបស់ពួកគេក្នុងការទទួលបានការជំនុំជម្រះក្តីប្រកបដោយយុត្តិធម៌ត្រូវប្រឈមនឹងហានិភ័យ។
បន្ថែមលើនេះ លោកស្រីរ៉ូណា ស្មីត ក៏បានសម្តែងកង្វល់ផងដែរអំពីជនជាប់ចោទមួយចំនួនដែលត្រូវបានកាត់ទោសកំបាំងមុខ បើទោះជាពួកគេបានព្យាយាមវិលត្រឡប់មកប្រទេសកម្ពុជាវិញដើម្បីចូលរួមក្នុងការជំនុំជម្រះក្តីនេះក៏ដោយ។ ត្រង់ចំណុចនេះ អ្នកការពារសិទ្ធិមនុស្សរបស់អង្គការសហប្រជាជាតិទំនងជាចង់សំដៅដល់លោកសម រង្ស៊ី និងមន្រ្តីជាន់ខ្ពស់ដទៃទៀតនៃអតីតគណបក្សសង្រ្គោះជាតិដែលកំពុងស្នាក់នៅក្រៅប្រទេស។ ក្រុមមន្រ្តីអតីតគណបក្សសង្រ្គោះជាតិដែលដឹកនាំលោកស្រីមួរ សុខហួរ អនុប្រធានអតីតបក្សប្រឆាំងបានបង្ហាញឆន្ទៈចូលមកប្រទេសកម្ពុជាវិញ ដើម្បីតតាំងជាមួយតុលាការសាលាដំបូងរាជធានីភ្នំពេញ។ ប៉ុន្តែ ពួកគេបានប្រកាសលើកពេលមកកម្ពុជាពីការកំណត់មកថ្ងៃទី០៤ ខែមករា ទៅថ្ងៃទី១៥ ខែមករាវិញ។
ចំពោះបញ្ហានេះ លោកស្រីរ៉ូណា ស្មីត បានស្នើយ៉ាងទទូចឱ្យរដ្ឋាភិបាលកម្ពុជាគោរពសិទ្ធិទទួលបានការជំនុំជម្រះក្តីប្រ កបដោយយុត្តិធម៌ដល់បុគ្គលទាំងនេះ និងបានលើកទឹកចិត្តឱ្យអាជ្ញាធរកម្ពុជាជួយសម្រួលដល់ការវិលត្រឡប់របស់ពួកគេ និងអនុញ្ញាតឱ្យពួកគេចូលរួមសវនាការ និងការពារក្តីរបស់ខ្លួននៅក្នុងតុលាការ។ សម្រាប់លោកស្រីរ៉ូណា ស្មីតក្នុងករណីការបង្ហាញខ្លួនរបស់ពួកគេមិនអាចចាត់ចែងបានទេនោះ លោកស្រីចង់ឱ្យអាជ្ញាធរកម្ពុជាជួយសម្រួលឱ្យមានការចូលរួមសវនាការពីចម្ងាយដល់ពួកគេ ឬពន្យាការជំនុំជម្រះរហូតដល់ជនជាប់ចោទអាចធ្វើដំណើរមកកម្ពុជាបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ