អ្នកជំនាញ៖ ការផ្អាកនាំចូលត្រី ដើម្បីទប់ស្កាត់ការឡើងថ្លៃនៅទីផ្សារក្នុងស្រុក មិនមានប្រសិទ្ធភាពយូរអង្វែង
វិធានការបន្ទាន់ផ្អាកការនាំចូលត្រីជាបណ្តោះអាសន្នដើម្បីទប់ស្កាត់ការឡើងថ្លៃនៅទីផ្សារក្នុងស្រុក មិនមានប្រសិទ្ធភាពយូរអង្វែងនោះទេ។ បើតាមអ្នកជំនាញកសិកម្ម រដ្ឋាភិបាលកម្ពុជាត្រូវមានទស្សនៈវិស័យវែងឆ្ងាយ ដោយការសិក្សា អំពីទីផ្សារ បង្កើនសមត្ថភាពនៃការចិញ្ចឹមត្រីក្នុងស្រុក និងការកាត់បន្ថយថ្លៃដើមផលិតជាដើម។
ចុះផ្សាយនៅថ្ងៃ៖
លោក យ៉ង សាំងកុមារ អ្នកជំនាញផ្នែកកសិកម្ម នៅថ្ងៃទី៩មករានេះ បានឲ្យដឹងថា ចំណាត់ការបន្ទាន់ទប់ស្កាត់លំហូរនាំចូលត្រីពីប្រទេសជិតខាងរបស់រដ្ឋាភិបាលកម្ពុជានៅពេលនេះ គ្រាន់តែជាការដោះស្រាយបញ្ហាសម្រាប់រយៈពេលខ្លីតែប៉ុណ្ណោះ។ វិធានការបន្ទាន់ដែលរដ្ឋាភិបាលបានដាក់ចេញនោះ គឺទាមទារអោយមានការអនុវត្តដោយតម្លាភាព ប្រសិទ្ធភាពនិងច្បាស់លាស់ ខណៈដែរលោកមើលឃើញថា ច្រកទ្វារព្រំដែនកម្ពុជាហាក់បីដូចជាមានភាពធូររលុយនៅឡើយ។
ជុំវិញបញ្ហាតម្លៃត្រីឡើងថ្លៃនៅពេលនេះ លោក យ៉ង សាំងកុមារ បន្ថែមថា ចំណាត់ការសំខាន់ប្រកបដោយស្ថេរភាពសម្រាប់ដោះស្រាយបញ្ហាតម្លៃត្រីនៅកម្ពុជាមានដូចជា ការការពារទីផ្សារ និងបង្កើនសមត្ថភាពផលិត ការកាត់បន្ថយការឡើងថ្លៃចំណីត្រី និងការធ្វើផែនការផលិតឆ្លើយតបសមស្របទៅនឹងតម្រូវការក្នុងស្រុក។
បើតាមអ្នកជំនាញផ្នែកវិស័យកសិកម្មរូបនេះ កម្ពុជាមានលទ្ធភាពនិងសមត្ថភាពច្រើនក្នុងការចិញ្ចឹមត្រីដើម្បីផ្គត់ផ្គង់សម្រាប់ទីផ្សារក្នុងស្រុក។ ចំពោះអ្នកចិញ្ចឹមត្រី ត្រូវអភិវឌ្ឍសមត្ថភាពនិងបច្ចេកទេសចិញ្ចឹមត្រីបន្ថែម ដោយផ្តើមចេញពីការគិតគូថ្លៃចំណី ការជ្រើសរើសពូជត្រី និងស្វែងយល់ពីរដូវកាលនៃប្រភេទត្រីនីមួយៗ។
យ៉ាងណាក៏ដោយ ក្រសួងកសិកម្ម នៅថ្ងៃទី៨មករាម្សិលមិញ បានរៀបចំកិច្ចប្រជុំភាគីពាក់ព័ន្ធរួមមានសមាគមវប្បករនៅកម្ពុជា និងតំណាងអាជីវករនាំចេញនាំចូលត្រី ដើម្បីរកដំណោះស្រាយនិងការមិនពេញចិត្តចំពោះចំណាត់ការនៃការផ្អាកជាបណ្តោះអាសន្ននូវការនាំចូលត្រីពីប្រទេសក្រៅ។
សូមជម្រាបជូនថា វិធានការដាក់ចេញដើម្បីផ្អាកការនាំចូលត្រីនោះ រួមមាន៖ ការផ្តល់ជូននូវព័ត៌មានពីសមាគមន៍វប្បករទៅឈ្មួញ អំពីប្រភេទនិងបរិមាណត្រីដែលប្រមូលផលនៅតាមខែនីមួយៗ ដើម្បីធ្វើការប្រមូលទិញ។ រីឯអាជីវករនាំចេញនាំចូលត្រីវិញ ក៏បានឯកភាពនិងយល់ព្រមផ្អាកនូវការនាំចូលប្រភេទត្រីមួយចំនួនដែលវារីវប្បករអាចផលិតក្នុងស្រុកបាន។ បន្ថែមពីនេះ ក្រសួងក៏បានបង្កើតឲ្យមានសមាគមនិងបណ្តុំអ្នកប្រមូលត្រីនៅតាមតំបន់ ដើម្បីប្រមូលទិញត្រីដែលផលិតបានក្នុងស្រុក និងធានាថាគ្មានឡើយការនាំចូលនិងនាំចេញត្រីខុសច្បាប់។
សូមបញ្ជាក់ជូនថា ឆ្នាំ២០១៩ កម្ពុជាបាននាំចូលត្រីសរុបជាង១ម៉ឺន២ពាន់តោន(១២ ៧៥៦) និងគិតត្រឹមរយៈពេលជិតមួយឆ្នាំគិតត្រឹមថ្ងៃទី២៥ធ្នូនេះ កម្ពុជាបាននាំចូលត្រីចំនួនជាង១ម៉ឺន៧ពាន់តោន (១៧ ៤០០)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ