កម្ពុជាកំពុងពិនិត្យលក្ខណៈសម្បត្តិនៃវ៉ាក់សាំងបង្ការជំងឺកូវីដ១៩របស់ក្រុមហ៊ុនមួយចំនួន
ក្រុមការងារអន្តរក្រសួងទទួលបន្ទុកការចរចានិងការពិគ្រោះយោបល់ដើម្បីទិញវ៉ាក់សាំងបង្ការជំងឺកូវីដ-១៩ បានបើកកិច្ចប្រជុំលើកទី១នៅថ្ងៃទី ០៨ មករានេះ ដើម្បីពិនិត្យមើលលក្ខណៈសម្បត្តិនៃវ៉ាក់សាំងរបស់ក្រុមហ៊ុនមួយចំនួន។ ប៉ុន្តែកិច្ចប្រជុំលើកទី១នេះ នៅមិនទាន់កំណត់ថា តើនឹងត្រូវទិញវ៉ាក់សាំងពីក្រុមហ៊ុនណា និងពេលណាមួយនៅឡើយទេ។
ចុះផ្សាយនៅថ្ងៃ៖
ស្តាប់ - ០២:០១
ក្រុមការងារអន្តរក្រសួងទទួលបន្ទុកការចរចានិងការពិគ្រោះយោបល់ ដើម្បីទិញវ៉ាក់សាំងបង្ការជំងឺកូវីដ-១៩ នៅមិនទាន់កំណត់ថា តើនឹងត្រូវបញ្ជាទិញវ៉ាក់សាំងបង្ការជំងឺកូវីដ១៩នេះ ពីក្រុមហ៊ុនណាមួយនៅឡើយទេ ខណៈដែលវ៉ាក់សាំងរបស់ក្រុមហ៊ុន Pfizer/BioNTech ដែលអង្គការសុខភាពពិភពលោក (WHO) ទើបតែបានផ្តល់ការអនុញ្ញាតអោយប្រើប្រាស់នោះ គឺសម្រាប់តែករណីបន្ទាន់ប៉ុណ្ណោះ។ ប៉ុន្តែយ៉ាងណាក្តី កិច្ចប្រជុំលើកទី១របស់ក្រុមការងារអន្តរក្រសួង ដឹកនាំដោយលោក វង្សី វិស្សុត រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការប្រចាំការក្រសួងសេដ្ឋកិច្ចនិងហិរញ្ញវត្ថុនៅថ្ងៃទី ០៨ មករានេះ បានពិនិត្យមើលលក្ខណៈសម្បត្តិនៃវ៉ាក់សាំងរបស់ក្រុមហ៊ុនមួយចំនួន ដែលមានសក្តានុពលក្នុងការទទួលបាននូវការទទួលស្គាល់ពីអង្គការសុខភាពពិភពលោក។
យោងតាមកំណត់ហេតុនៃកិច្ចប្រជុំក្រុមការងារអន្តរក្រសួងនៅលើកទី១នេះ ក៏បានពិភាក្សានិងពិគ្រោះយោបល់ អំពីយុទ្ធសាស្ត្រ និងផែនការធ្វើលទ្ធកម្មទិញវ៉ាក់សាំងបង្ការជំងឺកូវីដ១៩នេះ ដើម្បីផ្តល់ជូនប្រជាជនកម្ពុជាអោយបានលឿននិងឆាប់រហ័ស សមល្មមនឹងតម្រូវការរបស់កម្ពុជា ដោយធានាបាននូវសុវត្ថិភាព គុណភាព និងប្រសិទ្ធភាពខ្ពស់។ កិច្ចប្រជុំនេះ ក៏បានពិភាក្សាពាក់ព័ន្ធនឹងការកំណត់គោលការណ៍ទិញ ការបែងចែក ព្រមទាំងបរិមាណវ៉ាក់សាំង ទាំងសម្រាប់ការប្រើប្រាស់ក្នុងករណីបន្ទាន់ និងទាំងសម្រាប់ការប្រើប្រាស់ជាទូទៅដែរ។
គួររំលឹកជូនថា កាលពីខែធ្នូ ឆ្នាំ២០២០កន្លងទៅ លោកនាយករដ្ឋមន្ត្រី ហ៊ុន សែន បានប្រកាសពីការត្រៀមបម្រុងថវិកាប្រមាណពី១០០ទៅ២០០លានដុល្លារអាមេរិក សម្រាប់ទិញវ៉ាក់សាំងបង្ការជំងឺកូវីដ១៩ជំហានដំបូង ចំនួន១លានដូស ដើម្បីចាក់ជូនប្រជាពលរដ្ឋកម្ពុជាដោយឥតគិតថ្លៃ ប្រមាណជា៥០ម៉ឺននាក់។ ហើយក្រុមគោលដៅអាទិភាពដែលនឹងទទួលបានការចាក់វ៉ាក់សាំងមុនគេ គឺជាគ្រូពេទ្យ គ្រូបង្រៀន កងកម្លាំងប្រដាប់អាវុធ និងមន្ត្រីរាជការជាដើម។ បើតាមលោកនាយករដ្ឋមន្ត្រី លោកក៏បានណែនាំអោយរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ត្រៀមថវិកាសម្រាប់ទិញវ៉ាក់សាំងបង្ការជំងឺកូវីដ១៩នេះ ពី២ទៅ៣លានដូសថែមទៀត សម្រាប់ដំណាក់កាលបន្ទាប់ ខណៈដែលប្រជាជនកម្ពុជាមានចំនួនជាង១៦លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ