លោកសុខ ឥសាន៖ខួប៧មករាឆ្នាំនេះ ទោះមិនធ្វើនៅថា្នក់ជាតិ តែអាចមានការប្រារព្ធអបអរតូចៗនៅមូលដ្ឋាន
ការប្រារព្ធមីទ្ទីងរំឭកខួបជ័យជម្នះ៧ មករានៅក្នុងឆ្នាំ២០២១នេះ ត្រូវបានគណបក្សប្រជាជនកម្ពុជាប្រកាសមិនធ្វើដូចរាល់ឆ្នាំទេក្នុងន័យបង្ការការពារការឆ្លងរីករាលដាលនៃជំងឺកូវីដ១៩។ នេះ គឺជាលើកទី១ហើយដែលគណបក្សកាន់អំណាចបានសម្រេចមិនធ្វើពិធីប្រារព្ធថ្ងៃជ័យជម្នះលើរបបខ្មែរក្រហម៧ មករានេះ។ ប៉ុន្តែ លោកសុខ ឥសាន អ្នកនាំពាក្យគណបក្សបានគូសបញ្ជាក់ថា បើទោះបីនៅថ្នាក់ជាតិមិនរៀបចំការប្រារព្ធអបអរមែន តែនៅថ្នាក់មូលដ្ឋាន អាចនឹងមានការជួបជុំគ្នាអបអរបន្តិចបន្តួចដែរនៅថ្ងៃទី០៧ ខែមករានេះ។
ចុះផ្សាយនៅថ្ងៃ៖
ស្តាប់ - ០២:៣០
គិតពីថ្ងៃចន្ទនេះ គឺនៅសល់ពេលតែ៣ថ្ងៃទៀតប៉ុណ្ណោះដល់ថ្ងៃជ័យជម្នះ៧មករាហើយ ប៉ុន្តែនៅឆ្នាំនេះពុំមានការប្រារព្ធពិធីអបអររំលឹកខួបទ្រង់ទ្រាយធំដូចឆ្នាំមុនៗនោះឡើយ។ អ្នកនាំពាក្យគណបក្សប្រជាជនកម្ពុជា លោកសុខ ឥសាន បានអះអាងប្រាប់វិទ្យុបារាំងអន្តរជាតិជាថ្មីនៅព្រឹកថ្ងៃចន្ទនេះថា ការមិនរៀបចំប្រារព្ធពិធីមីទ្ទីងរំឭកខួបថ្ងៃ៧មករានៅក្នុងឆ្នាំ២០២១នេះ គឺធ្វើឡើងតាមសភាពការណ៍នៃការរីករាលដាលនៃជំងឺកូវីដ១៩ ពោល គឺគណបក្សកាន់អំណាចបង្ការការពារដល់សមាជិក សមាជិការបស់ខ្លួនពីហានិភ័យឆ្លងជំងឺរាតត្បាតមួយនេះបើមានការជួបជុំធំដុំដូចរាល់ឆ្នាំនោះ។
បើទោះបីមិនរៀបចំទ្រង់ទ្រាយធំ ប៉ុន្តែគណបក្សប្រជាជនកម្ពុជានៅតាមមូលដ្ឋាន គឺនឹងអាចមានការជួបជុំគ្នាទ្រង់ទ្រាយតូចៗ ដើម្បីអបអរថ្ងៃជ័យជម្នះ ៧ មករា។ នេះបើតាមការគូសបញ្ជាក់ឱ្យដឹងរបស់លោកសុខ ឥសាន។ លោកបានបន្ថែមទៀតថា ថ្ងៃ៧មករាខាងមុខនេះ គណបក្សប្រជាជនកម្ពុជាមិនមានគោលការណ៍ឱ្យសមាជិករបស់ខ្លួនចុះចែកចាយអំណោយជំនួសឱ្យការជួបជុំគ្នាទ្រង់ទ្រាយធំនោះទេ ប៉ុន្តែការចែកអំណោយបន្តិចបន្តួចណាមួយនោះ គឺគ្រាន់តែជារឿងធម្មតារបស់មន្រ្តីបក្សដែលតែងតែចុះទៅពង្រឹងនៅតាមមូលដ្ឋានប៉ុណ្ណោះ។
សូមបញ្ជាក់ថា នេះ គឺជាលើកទី១ហើយនៅក្នុងរយៈពេល៤២ឆ្នាំមកនេះដែលគណបក្សប្រជាជនកម្ពុជាបានសម្រេចផ្អាកការប្រារព្ធពិធីមីទ្ទីងរំឭកខួបថ្ងៃជ័យជម្នះ៧មករា ដោយសារតែការរីករាលដាលនៃជំងឺកូវីដ១៩។ ដោយសារតែជំងឺនេះ គណបក្សកាន់អំណាចក៏បានលុបចោលការប្រារព្ធរំលឹកខួប២៩ធ្នូ ដែលជាថ្ងៃបញ្ចប់សង្រ្គាមស៊ីវិលនៅក្នុងប្រទេសកម្ពុជា និង បានសម្រេចផ្អាករៀបចំសន្និបាតគណៈកម្មាធិការកណ្ដាលប្រចាំ២០២០របស់ខ្លួនផងដែរ។
៧មករា គឺជាថ្ងៃដែលកងទ័ពរំដោះរបស់កម្ពុជា និងវៀតណាមបានវាយយកឈ្នះលើកងទ័ពខ្មែរក្រហមនៅក្នុងឆ្នាំ១៩៧៩។ ឆ្នាំមុនៗ បក្សប្រជាជនកម្ពុជាតែងតែរៀបចំប្រារព្ធថ្ងៃជ័យជម្នះនេះក្នុងទ្រង់ទ្រាយធំនៅក្នុងរាជធានីភ្នំពេញក្រោមវត្តមានឥស្សរជននយោបាយជាន់ខ្ពស់រួមមានលោកនាយករដ្ឋមន្រ្តីហ៊ុន សែន ប្រធានគណបក្ស លោកហេង សំរិនប្រធានកិត្តិយស លោកស ខេង អនុប្រធាន និងលោកសាយ ឈុំ អគ្គលេខាធិការគណបក្សជាដើម។ ក្រុមអតីតបក្សប្រឆាំងនៅក្រៅប្រទេសមិនទទួលស្គាល់ និងបានបរិហារថ្ងៃ៧មករាថា ជាថ្ងៃដែលវៀតណាមចូលមកឈ្លានពានប្រទេសកម្ពុជា។ ប៉ុន្តែសម្រាប់រដ្ឋាភិបាល និងបក្សប្រជាជនកម្ពុជាវិញ ថ្ងៃ៧មករា គឺជាថ្ងៃកំណើតទី២របស់ប្រជាពលរដ្ឋខ្មែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ