អ្នកនយោបាយអតីតបក្សប្រឆាំងលើកពេលដំណើរមាតុភូមិនិវត្តន៍ដោយបញ្ហាជើងហោះហើរ
ដំណើរមាតុភូមិនិវត្តន៍របស់លោក ស្រី មូរសុខហួរ និងអ្នកនយោបាយបក្សប្រឆាំងផ្សេងទៀត ដែលគ្រោងចេញពីសហរដ្ឋអាមេរិកនៅថ្ងៃទី០៤មករាខានស្អែកនេះ ត្រូវបានលើកពេល។ នេះគឺជាការបញ្ជាក់នៅក្នុងសេចក្ដីប្រកាសព័ត៌មានរបស់អតីតគណបក្សសង្គ្រោះជាតិ នៅថ្ងៃសៅរ៍ ទី០២មករានេះ។ បើតាមអ្នកនយោបាយនិរទេសខ្លួន ការលើកពេលនេះដោយសារតែយន្តហោះដែលគ្រោងដឹកពួកគេ ផ្អាកការហោះហើរ។
ចុះផ្សាយនៅថ្ងៃ៖ កែប្រែថ្ងៃទី៖
«ដោយយន្តហោះនៃក្រុមហ៊ុនអាកាសចរណ៍ EVA Airways ដែលលោកស្រី មូរ សុខហួរ និងប្រតិភូអមដំណើរត្រូវធ្វើដំណើរចេញពីសហរដ្ឋអាមេរិកនៅថ្ងៃទី០៤មករា២០២១ បានផ្អាកការហោះហើរ ដូច្នេះ ដំណើរមាតុភូមិនិវត្តន៍របស់ថ្នាក់ដឹកនាំគណបក្សសង្គ្រោះជាតិត្រូវលើកពេលទៅថ្ងៃទី១៥មករា២០២១វិញ តាមជើងយន្តហោះរបស់ក្រុមហ៊ុនអាកាសចរណ៍ Singapore Airlines»។ នេះគឺជាហេតុផលដែលត្រូវបានគូសបញ្ជាក់នៅក្នុងសេចក្ដីប្រកាសព័ត៌មានរបស់ក្រុមអ្នកនយោបាយនិរទេសខ្លួន។
លោក អេង ឆៃអ៊ាង អនុប្រធានអតីតគណបក្សសង្គ្រោះជាតិដែលកំពុងនៅក្រៅប្រទេស ប្រាប់វិទ្យុបារាំងអន្ដរជាតិ RFI តាមទូរសព្ទថា មូលហេតុដែលយន្តហោះនោះផ្អាកការហោះហើរ គឺដោយសារតែបញ្ហាកូវីដ១៩។ បើតាមអ្នកនយោបាយដដែលនេះ ក្នុងករណីយន្តហោះនៃក្រុមហ៊ុនអាកាសចរណ៍ Singapore Airlines ដែលត្រូវចេញដំណើរពីសហរដ្ឋអាមេរិកនៅថ្ងៃទី១៥មករា២០២១ មិនមានការប្រែប្រួលទេ នោះលោកស្រី មូរ សុខហួរ និងប្រតិភូនឹងមកដល់ព្រលានយន្តហោះអន្ដរជាតិភ្នំពេញ នៅថ្ងៃទី១៧មករា។
សូមបញ្ជាក់ថា នេះគឺជាការខកខានជាលើកទី២ហើយ ដែលអ្នកនយោបាយនិរទេសខ្លួននៅក្រៅប្រទេសមិនបានមកដល់កម្ពុជាតាមការគ្រោងទុក។ នៅក្នុងប្រទេសកម្ពុជាឯណេះវិញ សកម្មជនគាំទ្រដំណើរមាតុភូមិនិវត្តន៍នេះ យ៉ាងហោចណាស់១៣នាក់ ត្រូវបានចាប់ខ្លួននៅដើមសប្ដាហ៍នេះ ក្នុងនោះ២នាក់ត្រូវបានចាប់ខ្លួននៅខេត្តត្បូងឃ្មុំ និង៣នាក់ទៀតត្រូវបានចាប់ខ្លួននៅភ្នំពេញ។ ចំណែកមនុស្ស៨នាក់ផ្សេងទៀត ត្រូវបានចាប់ខ្លួននៅជិតសាលាដំបូងរាជធានីភ្នំពេញ ខណៈពួកគេកំពុងឃ្លាំមើលការបើកសវនាការករណីសកម្មជនបក្សប្រឆាំង២១នាក់ រួមទាំងលោកសម រង្ស៊ី ផងដែរ ដែលត្រូវបានចោទពីបទ «ញុះញង់» និង «រួមគំនិតក្បត់»។ ជាការចោទប្រកាន់ក្រោយពីលោក សម រង្ស៊ី ប្រកាសចូលស្រុក កាលពីថ្ងៃទី០៨វិច្ឆិកាឆ្នាំ២០១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ