ខេត្តជាប់ព្រំដែនថៃពិចារណាលទ្ធភាពពន្យារពេលបើកបវេសនកាល ព្រោះខ្វះកន្លែងធ្វើចត្តាឡីស័ក
ខេត្តជាប់ព្រំដែនកម្ពុជា-ថៃមួយចំនួន កំពុងខ្វះកន្លែងធ្វើចត្តាឡីស័កសម្រាប់ពលករខ្មែរមកពីប្រទេសថៃ។ ក្នុងពេលដែលកន្លែងធ្វើចត្តាឡីស័កភាគច្រើនជាសាលារៀន អាជ្ញាធរខេត្តទាំងនោះ បានប្រាប់វិទ្យុបារាំងអន្ដរជាតិ RFI ថា ខ្លួនកំពុងតែពិចារណាពន្យារពេលការបើកបវេសនកាលឆ្នាំសិក្សាថ្មី ២០២០-២០២១ ដោយផ្ដល់អាទិភាពដល់ការប្រើប្រាស់សាលាសម្រាប់ប្រើប្រាស់ជាទីតាំងចត្តាឡីស័ក។ ប៉ុន្តែយ៉ាងណាក៏ដោយ ក្រសួងអប់រំនៅថ្ងៃនេះ នៅតែរក្សាជំហរបើកបវេសនកាលឆ្នាំសិក្សាថ្មីនៅថ្ងៃទី១១មករាខាងមុខនេះដដែល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
អភិបាលរង និងជាអ្នកនាំពាក្យខេត្តបាត់ដំបង លោក សឿម ប៊ុនរិទ្ធី នៅថ្ងៃសៅរ៍នេះ បានឲ្យដឹងថា ប្រសិនបើស្ថានការណ៍នៃជំងឺកូវីដ១៩នៅប្រទេសថៃ នៅតែបន្តអូសបន្លាយយូរទៀត អាជ្ញាធរខេត្តបាត់ដំបងនឹងបង្ខំចិត្តពន្យារពេលបើកបវេសនកាលចូលរៀនរបស់សិស្សានុសិស្សដោយគ្មានកំណត់កាលបរិច្ឆេទ។
លោក សឿម ប៊ុនរិទ្ធី បានលើកឡើងថា បច្ចុប្បន្នមណ្ឌលធ្វើចត្តាឡីស័កសម្រាប់ពលករខ្មែរដែលត្រឡប់មកពីប្រទេសថៃ នៅខេត្តបាត់ដំបងសរុបទាំង១១ គឺជាសាលារៀន ដូច្នេះ អាជ្ញាធរខេត្តបាត់ដំបង បានត្រៀមស្នើទៅក្រសួងអប់រំ ពន្យារពេលបើកបវេសនកាលថ្មីរួចហើយ។
ក្រៅតែពីខេត្តបាត់ដំបង ខេត្តបន្ទាយមានជ័យឯណោះវិញ អាជ្ញាធរក៏បានបង្ហាញក្តីព្រួយបារម្ភអំពីការខ្វះខាតទីតាំងធ្វើចត្តាឡីស័កសម្រាប់ពលករខ្មែរមកពីប្រទេសថៃនេះដែរ ហើយលទ្ធភាពនៃការពន្យារពេលបើកបវេសនកាលចូលរៀននេះ ក៏ជាជម្រើសមួយដែលខេត្តកំពុងពិចារណាផងដែរ។
សូមរំព្ញកថា ក្រសួងអប់រំ កាលពីថ្ងៃទី២៩ ខែធ្នូ ឆ្នាំ២០២០ បានប្រកាសសម្រេចឱ្យបើកបវេសនកាលឆ្នាំសិក្សាថ្មី ឆ្នាំ២០២០-២០២១ នៅថ្ងៃទី១១ ខែមករា ឆ្នាំ២០២១ ខាងមុខនេះ ក្រោយពីរដ្ឋាភិបាលប្រកាសបិទបញ្ចប់ព្រឹត្តិការណ៍សហគមន៍ ២៨ វិច្ឆិកា។
ឆ្លើយតបទៅនឹងការយកសាលារៀនធ្វើជាទីតាំងចត្តាឡីស័កសម្រាប់ពលករខ្មែរមកពីប្រទេសថៃនេះ លោក រស់ សុវាចា អ្នកនាំពាក្យក្រសួងអប់រំយុវជន និងកីឡា នៅថ្ងៃសៅរ៍នេះដែរ បានអះអាងថា គ្មានឡើយការពន្យារពេលបើកបវេសនកាលថ្មី ឆ្នាំ២០២០-២០២១នេះ។ ក៏ប៉ុន្តែ លោកបានបន្ថែមថា ក្នុងករណីមានការប្រែប្រួល ក្រសួងអប់រំ នឹងធ្វើការពិនិត្យពិចារណាឡើងវិញ និងធ្វើការជូនដំណឹងជាថ្មីម្តងទៀត។
គិតត្រឹមថ្ងៃសៅរ៍ទី២មករានេះ ក្រសួងសុខាភិបាល បានរកឃើញពលករខ្មែរមកពីថៃជាស្រី្ត ចំនួន១២នាក់ ដែលមានវិជ្ជមានវីរុសកូវីដ១៩ ក្នុងចំណោមនោះមាន ពលករខ្មែរជាស្រី្ត ២នាក់មានទីលំនៅក្នុងខេត្តបាត់ដំបង និង១០នាក់ទៀតនៅខេត្តប៉ៃលិន។ បច្ចុប្បន្ននេះ ពលករទាំង១២នាក់នេះ កំពុងទទួលការព្យាបាលនៅមន្ទីរពេទ្យបង្អែកខេត្តបាត់ដំបង និងខេត្តប៉ៃលិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ