មុនចូលឆ្នាំថ្មី៖គណបក្ស និងអ្នកនយោបាយខ្មែរចាប់ផ្តើមចេញសារជូនពរដល់ពលរដ្ឋខ្មែរឱ្យជួបក្តីសុខ និងជៀសផុតកូវីដ
នៅប៉ុន្មានម៉ោងទៀតប៉ុណ្ណោះ ឆ្នាំ២០២០នឹងក្លាយជាឆ្នាំចាស់ផ្លាស់ដោយឆ្នាំថ្មី២០២១។ នៅថ្ងៃចុងក្រោយនៃឆ្នាំ២០២០នេះ គណបក្ស និង អ្នកនយោបាយនៅកម្ពុជាបានចេញសារជូនពរដល់ប្រជាពលរដ្ឋខ្មែរនៅលើទំព័រហ្វេសប៊ុករបស់ពួកគេ។ សារទាំងនេះ គឺបួងសួងសុំឱ្យពលរដ្ឋខ្មែរជួបប្រទះសេចក្តីសុខ ជៀសផុតពីជំងឺរាតត្បាតកូវីដ១៩ និង បួងសួងសុំឱ្យឆ្នាំថ្មីនាំឱ្យខ្មែរមានសាមគ្គីភាព និងឯកភាពជាតិជាដើម។
ចុះផ្សាយនៅថ្ងៃ៖
ស្តាប់ - ០២:២៩
លោកកឹម សុខា ប្រធានអតីតបក្សសង្រ្គោះជាតិតាមរយៈទំព័រហ្វេសប៊ុកនៅព្រឹកថ្ងៃទី៣១ ខែធ្នូ ឆ្នាំ២០២០នេះ បានបួងសួងឱ្យឆ្នាំ២០២០ នាំយកទៅឱ្យផុតរលត់ពីភពផែនដី ជាពិសេស ពីកម្ពុជានូវគ្រោះភ័យ ជំងឺរាតត្បាត អំពើអកុសល ដែលបណ្តាលឲ្យមានការឈឺចាប់ ភាពអវិជ្ជមាន និងភាពអយុត្តិធម៌ កុំឱ្យកើតមាន និងប៉ះពាល់ដល់ប្រជាពលរដ្ឋខ្មែរតទៅទៀត។ លោកក៏បួងសួងឱ្យឆ្នាំថ្មី២០២១ នាំមកនូវការបង្រួបបង្រួមជាតិ ឯកភាពជាតិ សាមគ្គីជាតិ ដែលនឹងផ្តល់នូវសន្តិភាព ស្ថិរភាពរឹងមាំ ភាពសុខដុមរមនា ភាពកក់ក្តៅ ជូនដល់ប្រជាពលរដ្ឋផងដែរ។ បន្ថែមលើនេះ លោកប្រធានអតីតបក្សប្រឆាំងក៏ចង់ឱ្យបញ្ឈប់ការធ្វើឱ្យមានការឈឺចាប់ដល់ពលរដ្ឋខ្មែរ និងចង់ឱ្យមានការចែករំលែកនូវសេចក្តីស្រឡាញ់រាប់អាន ដើម្បីសេចក្តីសុខទាំងអស់គ្នា ទាំងបុគ្គលម្នាក់ៗផ្ទាល់ គ្រួសារ ប្រទេសជាតិ និងពិភពលោក។
ចំណែក ពេជ្រ ស្រស់ ប្រធានគណបក្សយុវជនកម្ពុជាវិញបានជូនពរឱ្យប្រជាពលរដ្ឋខ្មែរមានក្តីសុខ និងបានក្រើនរំលឹកកុំឱ្យភ្លេចជំងឺកូវីដ១៩។ លោកពេជ្រ ស្រស់ ក៏បានដាស់តឿនឱ្យប្រជាពលរដ្ឋកុំនាំគ្នាចេញក្រៅផ្ទះជួបមនុស្សច្រើន ដើម្បីបង្ការកុំឲ្យឆ្លងជំងឺកូវីដ១៩ ពីព្រោះជំងឺនេះទាំងចាស់ ទាំងថ្មី មិនទាន់រលត់ផុតចេញពីកម្ពុជានៅឡើយទេ។ ចំពោះគណបក្សប្រជាធិបតេយ្យមូលដ្ឋានវិញ តាមរយៈទំព័រហ្វេសប៊ុកដូចគ្នា គណបក្សនយោបាយនេះ ក៏បានជូនពរប្រជាពលរដ្ឋខ្មែរគ្រប់រូបឱ្យជួបសេចក្តីសុខ និងសុវត្ថិភាពនៅក្នុងដំណើរជិតឆ្ងាយ។ គណបក្សប្រជាធិបតេយ្យមូលដ្ឋាន ក៏បានបួងសួងសុំឱ្យរឿងមិនល្អដែលកើតមាននៅក្នុងឆ្នាំចាស់រសាត់អណ្តែតចេញទៅឱ្យឆ្ងាយអស់ពីដែនកម្ពុជា និងទទួលបានរឿងល្អដែលនាំឱ្យកម្ពុជាសុខសាន្ត ព្រមទាំងនាំមកនូវភាពសម្បូរសប្បាយដល់គ្រប់ក្រុមគ្រួសារខ្មែរ។
ដោយឡែកសម្រាប់លោកហេង សំរិន ប្រធានរដ្ឋសភា និង ជាប្រធានកិត្តិយសគណបក្សប្រជាជនកម្ពុជាវិញ លោកក៏បានជូនពរដល់ប្រជាពលរដ្ឋខ្មែរទាំងនៅក្នុងប្រទេស និងក្រៅប្រទេសឱ្យជួបតែសេចក្តីសុខ សុភមង្គលនៅក្នុងឆ្នាំថ្មី២០២១។ ជាមួយការជូនពរនេះ លោកហេង សំរិន ក៏បានរំលេចឱ្យដឹងផងដែរពីការមានសុខសន្តិភាពពេញលេញរបស់ប្រទេសកម្ពុជានៅក្នុងរយៈពេលពីរទសវត្សរ៍ មានស្ថិរភាពនយោបាយ សណ្តាប់ធ្នាប់សង្គម និង កំណើនសេដ្ឋកិច្ចល្អ។ លោកប្រធានរដ្ឋសភាកម្ពុជាក៏បានរំលឹក និងអំពាវនាវដល់ប្រជាពលរដ្ឋខ្មែរឱ្យបន្តការប្រុងប្រយ័ត្នការពារខ្លួនពីជំងឺកូវីដ១៩ ដោយត្រូវពាក់ម៉ាស រក្សាគម្លាតបុគ្គល និងសង្គម និងត្រូវឧស្សាហ៍លាងសម្អាតដៃផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ