តុលាការក្រុងភ្នំពេញដាក់ទោសមេដឹកនាំអតីតបក្សប្រឆាំងជាប់ពន្ធនាគារចំនួន៤ឆ្នាំ
សាលាដំបូងរាជធានីភ្នំពេញ នៅថ្ងៃពុធម្សិលមិញនេះ បានសម្រេចផ្តន្ទាទោសលោក សម រង្ស៊ី ប្រធានស្ដីទីអតីតបក្សប្រឆាំង ឲ្យជាប់ពន្ធនាគារចំនួន៤ឆ្នាំ និងពិន័យជាប្រាក់ចំនួន៨លានរៀល ព្រមទាំងបង្គាប់ឲ្យសងជំងឺចិត្តដើមបណ្ដឹងចំនួន២ពាន់លានរៀល ពាក់ព័ន្ធនឹងបទញុះញង់ឲ្យប្រព្រឹត្តបទល្មើសជាអាថិ៍។
ចុះផ្សាយនៅថ្ងៃ៖
នៅក្នុងសំណុំរឿងដូចគ្នានេះ អ្នកពាក់ព័ន្ធចំនួន៤នាក់ទៀត ក៏ត្រូវតុលាការសម្រេចផ្ដន្ទាទោសឲ្យជាប់ពន្ធនាគារពី១ឆ្នាំកន្លះ ទៅ១ឆ្នាំ៨ខែ និងពិន័យជាប្រាក់ម្នាក់ៗ៤លានរៀលផងដែរ។ សូមជម្រាបថា ការផ្ដន្ទាទោសលើលោកសម រង្ស៊ី និងអ្នកពាក់ព័ន្ធទាំង៤នាក់នេះ ធ្វើឡើងនៅក្នុងសំណុំរឿងចំនួន២ ដែលបានបើកសវនាការជំនុំជម្រះកាលពីថ្ងៃទី២១ខែធ្នូកន្លងទៅ។ សំណុំរឿងទាំងពីរនោះ រួមមាន ការបំភ្លៃព័ត៌មាននៃការស្លាប់របស់លោក ហុក ឡង់ឌី អតីតអគ្គស្នងការនគរបាលជាតិ និង ករណីញុះញង់ប្រជាពលរដ្ឋកុំឲ្យសងបំណុលធនាគារ។
មេធាវីការពារក្ដីឲ្យជនត្រូវចោទ លោក សំ សុគង់ ថ្លែងថា ការកាត់សេចក្ដីរបស់តុលាការដូច្នេះ មិនបានផ្ដល់យុត្តិធម៌ដល់កូនក្ដីលោកទេ។ លោកមេធាវីបន្តថា លោកនឹងពិភាក្សាជាមួយកូនក្ដីបន្តទៀត ដើម្បីប្ដឹងទាស់ទៅសាលាឧទ្ធរណ៍។ យ៉ាងណាក៏ដោយ ចំពោះការប្ដឹងបន្តនេះដែរ លោក សំ សុគង់ គូសបញ្ជាក់ថា សិទ្ធិសម្រេចគឺស្ថិតនៅលើកូនក្ដីរបស់លោកផ្ទាល់។
ចំណែក លោក អំ សំអាត នាយករងអង្គការសិទ្ធិមនុស្សលីកាដូ យល់ឃើញថា សាលក្រមរបស់តុលាការលើលោក សម រង្ស៊ី នាពេលនេះ គឺជាការព្រមានដល់អ្នកដែលចង់រិះគន់ក្រោយៗ។ ប៉ុន្តែនៅក្នុងប្រទេសដែលប្រកាន់យកលទ្ធិប្រជាធិបតេយ្យ លោក អំ សំអាត សង្កត់ធ្ងន់ថា ការរិះគន់ស្ថាបនា និងសេរីភាពក្នុងការបញ្ចេញមតិ គឺជារឿងសំខាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ