លោក ហ៊ុន សែន៖ កម្ពុជាផ្តើមផលិតដំណក់ប្រេងដំបូងរបស់ខ្លួននៅថ្ងៃនេះ
ដំណក់ប្រេងលើកដំបូងរបស់កម្ពុជានឹងចាប់ផ្តើមផលិតចេញពីអណ្តូងប្រេងទី១ នៅក្នុងប្លុកនៃឈូងសមុទ្រកម្ពុជា នៅថ្ងៃទី២៩ធ្នូ ឆ្នាំ២០២០ នេះ។ នេះជាការបញ្ជាក់របស់នាយករដ្ឋមន្ត្រីហ៊ុន សែន ក្រោយពីកម្ពុជាប្រើពេលយ៉ាងយូររងចាំដំណើរការខួងប្រេងចាប់តាំងពីអំឡុងខែធ្នូឆ្នាំ២០១២មក។ បើតាមលោក ហ៊ុន សែន ចំណូលបានមកពីផលិតកម្មប្រេងនេះ នឹងយកទៅបម្រើដល់វិស័យអប់រំនិងសុខាភិបាលនៅកម្ពុជា។
ចុះផ្សាយនៅថ្ងៃ៖
ស្តាប់ - ០២:៥៤
លោកនាយករដ្ឋមន្ត្រីហ៊ុន សែន នៅថ្ងៃទី២៩ ខែធ្នូ នេះ បានប្រកាសអំពីការចាប់ផ្តើមផលិតកម្មប្រេងដំបូងរបស់កម្ពុជា នៅតំបន់ប្លុក A ឈូងសមុទ្រកម្ពុជា ដែលជាការទន្ទឹងរងចាំអស់រយៈកាលដ៏យូរកន្លងមក។ បើតាមលោកនាយករដ្ឋមន្ត្រីហ៊ុន សែន ដោយការប្រឹងប្រែងរបស់រាជរដ្ឋាភិបាល និងការចូលរួមពីក្រុមហ៊ុន KrisEnergy មកដល់ពេលនេះកម្ពុជាបានសម្រេច ដោយជោគជ័យជាស្ថាពរនូវការសាងសង់ ការបំពាក់គ្រឿងសម្ភារៈ និងបរិក្ខារចាំបាច់នានាសម្រាប់ដំណើរការផលិតកម្មធនធានរ៉ែប្រេង។
ក្នុងសារ ដែលផ្សាយតាមទំព័រហ្វេសប៊ុកផ្លូវការរបស់លោកនាថ្ងៃទី២៩ ខែធ្នូនេះ លោកហ៊ុន សែន បានបញ្ជាក់ទៀតថា ការចាប់ផ្តើមផលិតកម្មប្រេងនេះ គឺជាពរជ័យសម្រាប់កម្ពុជា ។ នេះជាការចាប់ផ្ដើមមួយជំហានដំបូងដ៏សំខាន់សម្រាប់កម្ពុជាឆ្ពោះទៅបង្កើតបាននូវសមត្ថភាពជាតិ និងខឿនឧស្សាហកម្មប្រេងកាត ឧស្ម័ន និងថាមពលនៅកម្ពុជា។
លោក ហ៊ុន សែន បញ្ជាក់ទៀតថា កូវីដ-១៩ បានរំខានដល់កម្ពុជា តែក៏មិនអាចបំផ្លាញចោលនូវការខិតខំរបស់កម្ពុជា ដើម្បីផលិតប្រេងនោះបានដែរ។ ចូលឆ្នាំសកលថ្មី២០២១ខាងមុខ ទោះកម្ពុជាមិនបានសប្បាយរីករាយដូចឆ្នាំមុនៗ ដោយសារតែកូវីដ-១៩ តែទទួលបានកាដូដ៍ធំសម្រាប់ជាតិ នោះគឺប្រេងដែលផលិតចេញលើកដំបូងក្នុងទឹកដីកម្ពុជា។ នេះបើតាមលោក ហ៊ុន សែន។
រដ្ឋមន្ត្រីក្រសួងរ៉ែ និងថាមពល លោក ស៊ុយ សែម នៅថ្ងៃទី២៩ ខែធ្នូ បានតាមរយៈលិខិតអបអរសាទរបញ្ជាក់ថា ដំណក់ប្រេងដំបូង ដែលកម្ពុជាទទួលបាននៅថ្ងៃនេះ ជាលទ្ធផលប្រវត្តិសាស្ត្រ ហើយថ្ងៃនេះកម្ពុជាបានក្លាយជាប្រទេសផលិតប្រេងមួយដែរ ក្នុងចំណោមប្រទេសមួយចំនួនតូចក្នុងពិភពលោក។
បន្ថែមពីលើសារក្នុងទំព័រហ្វេសប៊ុក លោកហ៊ុន សែន នៅព្រឹកថ្ងៃទី២៩ ខែធ្នូ នេះបានបញ្ជាក់បន្ថែមថា ចំណូលដែលបានពីរ៉ែប្រេង នឹងត្រូវផ្តល់អាទិភាពលើ វិស័យអប់រំ និងសុខាភិបាល។ លោកអះអាងថានៅពេលខាងមុខនេះ កម្ពុជានឹងមានចំណូលបន្ថែមទៀតពី រ៉ែប្រេង ធ្យូងថ្ម និងរ៉ែមាស។
សូមជម្រាបជូនថាកិច្ចព្រមព្រៀងប្រេងកាតដំបូងត្រូវបានធ្វើឡើងនៅឆ្នាំ ២០០២ ជាមួយសម្ព័ន្ធក្រុមហ៊ុន Chevron Oversea Petroleum (Cambodia) Ltd., LG Caltex Oil Corporation, Mocco Cambodia Co., Ltd. និង KrisEnergy។ តាមផែនការកាលពីពេលនោះ ផលិតកម្មប្រេងដំបូងគ្រោងនឹងចាប់ផ្តើមនៅអំឡុងខែធ្នូឆ្នាំ២០១២។ ប៉ុន្តែដំណើរការអនុវត្តតាមផែនការផលិតប្រេងត្រូវបានរាំងស្ទះ។ លុះក្រោយមកក្នុងពេលចរចាជាមួយរដ្ឋាភិបាល ក្រុមចំនួន៣ក្នុងសម្ព័ន្ធ បានស្នើសុំដកខ្លួនចេញបន្តបន្ទាប់គ្នា នៅឆ្នាំ ២០១៤ និង២០១៦។ រហូតដល់ថ្ងៃទី២៣ ខែសីហាឆ្នាំ ២០១៧ ទើបសម្រេចបាននូវកិច្ចព្រមព្រៀងថ្មី និងគម្រោងផែនការអភិវឌ្ឍនិងអាជីវកម្មអណ្តូងប្រេងថ្មី ដែលបើកផ្លូវឲ្យដំណើរការសាងសង់ និងអភិវឌ្ឍផ្លាតហ្វមអណ្តូងប្រេងអាចចាប់ផ្តើមបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ