លោកហ៊ុន សែន ប្រកាសបិទបញ្ចប់ព្រឹត្តិការណ៍២៨វិច្ឆិកា ប៉ុន្តែអំពាវនាវឱ្យពលរដ្ឋបន្តប្រុងប្រយ័ត្នខ្ពស់ចំពោះកូវីដ១៩
លោកនាយករដ្ឋមន្រ្តីហ៊ុន សែន បានប្រកាសបិទបញ្ចប់នូវព្រឹត្តិការណ៍សហគមន៍២៨វិច្ឆិកាដែលជាការឆ្លងជំងឺកូវីដ១៩ទៅក្នុងសហគមន៍ជាលើកដំបូងនៅក្នុងប្រទេសកម្ពុជា។ ការប្រកាសនេះ ធ្វើឡើងតាមរយៈការថ្លែងសារពិសេសលើកញ្ចក់ទូរទស្សន៍ជាតិកម្ពុជានៅព្រឹកថ្ងៃទី២៩ ខែធ្នូនេះពីគេហដ្ឋានរបស់លោកនៅក្នុងក្រុងតាខ្មៅ។ បើទោះបីប្រកាសបិទបញ្ចប់មែន តែលោកហ៊ុន សែន បានបន្តអំពាវនាវឱ្យប្រជាពលរដ្ឋទាំងអស់បន្តការប្រុងប្រយ័ត្នខ្ពស់ចំពោះជំងឺកូវីដ១៩។
ចុះផ្សាយនៅថ្ងៃ៖
ស្តាប់ - ០២:៣៦
មូលហេតុសំខាន់ដែលកម្ពុជាអាចបិទបញ្ចប់ព្រឹតិ្តការណ៍សហគមន៍២៨វិច្ឆិកាបាន គឺដោយសារតែស្ថានការណ៍ឆ្លងរាលដាលនៃជំងឺកូវីដ១៩ អាចគ្រប់គ្រងបានហើយដោយមិនមានរកឃើញអ្នកឆ្លងថ្មីក្នុងរយៈពេល១៤ថ្ងៃជាប់ៗគ្នា និងរកមិនឃើញអ្នកសង្ស័យទៀតឡើយ។ នេះបើតាមការគូសបញ្ជាក់ឱ្យដឹងរបស់លោកនាយរកដ្ឋមន្រ្តីហ៊ុន សែន។ បើតាមលោកហ៊ុន សែន ដដែល កម្ពុជាក៏គ្រប់គ្រងបានផងដែរលើពលករខ្មែរមកពីប្រទេសថៃដោយមិនទាន់រកឃើញពលករខ្មែរណាបានឆ្លងជំងឺកូវីដ-១៩នោះទេ។ ចំណែក មូលហេតុសំខាន់មួយទៀតនោះ គឺកម្ពុជាបានព្យាបាលឱ្យជាសះស្បើយនូវអ្នកឆ្លងជំងឺកូវីដ១៩ពីព្រឹត្តិការណ៍សហគមន៍២៨វិច្ឆិកាជាច្រើនជាបន្តបន្ទាប់។
សូមបញ្ជាក់ថា អ្នកឆ្លងជំងឺកូវីដ១៩ក្នុងព្រឹត្តិការណ៍សហគមន៍២៨វិច្ឆិកាមានចំនួន៤១នាក់ក្នុងនោះប្រុស២២នាក់ និងស្រី១៩នាក់។ គិតមកដល់ថ្ងៃទី២៩ ខែធ្នូនេះ អ្នកជំងឺកូវីដ១៩ក្នុងព្រឹត្តិការណ៍នេះចំនួន៣៨នាក់ត្រូវបានព្យាបាលជាសះស្បើយ។ សរុបទៅ កម្ពុជាបានរកឃើញអ្នកឆ្លងកូវីដ១៩ ចំនួន៣៦៤នាក់ ក្នុងនោះអ្នកព្យាបាលជាសះស្បើយចំនួន ៣៦០នាក់ និងអ្នកកំពុងសម្រាកព្យាបាលនៅមន្ទីរពេទ្យមានចំនួន៤នាក់។
បើទោះបីប្រកាសបិទបញ្ចប់ព្រឹត្តិការណ៍សហគមន៍២៨វិច្ឆិកានេះក៏ដោយ ប៉ុន្តែ លោកប្រមុខរដ្ឋាភិបាលកម្ពុជានៅតែបន្តប្រាប់ប្រជាពលរដ្ឋខ្មែរទាំងអស់កុំឱ្យធ្វេសប្រហែសឱ្យសោះ។ លោកលើកឡើងថា ព្រឹត្តិការណ៍សហគមន៍២៨វិច្ឆិកាអាចបិទបញ្ចប់បាន តែកូវីដ១៩មិនអាចបិទបញ្ចប់ការរីករាលដាលបាននោះទេ។ ដូច្នេះហើយ លោកនាយករដ្ឋមន្រ្តីបានអំពាវនាវឱ្យប្រជាពលរដ្ឋបន្តការពារខ្លួនដោយពាក់ម៉ាស លាងដៃ និង រក្សាគម្លាតសុវត្តិភាពឱ្យបានជាង១ម៉ែត្រកន្លះ និងកុំទៅចូលរួមជួបជុំគ្នីគ្នាច្រើន និងកុំស្និតស្នាលគ្នាពេក។ រីឯអ្នកត្រូវធ្វើចត្តាឡីស័ក្តិ លោកនាយករដ្ឋមន្រ្តីហ៊ុន សែន បានប្រាប់ឱ្យពួកគេអនុវត្តឱ្យបានត្រឹមត្រូវតាមការណែនាំរបស់ក្រសួងសុខាភិបាល។
ដោយឡែក ពាក់ព័ន្ធនឹងគម្រោងទិញវ៉ាក់សាំងបង្ការជំងឺកូវីដ១៩វិញ លោកនាយករដ្ឋមន្រ្តីហ៊ុនសែន បានប្រកាសជាថ្មីថា មិនទាន់កំណត់ថាទិញពីក្រុមហ៊ុនណា និងប្រទេសណានៅឡើយទេ ព្រោះមិនទាន់មានការទទួលស្គាល់ជាផ្លូវការពីអង្គការសុខភាពពិភពលោក។ ប៉ុន្តែ លោកបានគូសបញ្ជាក់ថា ការបញ្ជាទិញវ៉ាក់សាំងរបស់កម្ពុជាមានច្រក៣ គឺតាមរយៈកម្មវិធី Covax ការពិភាក្សាជាមួយដៃគូជាទ្វេភាគី ឬពហុភាគី ដើម្បីរកជំនួយឥតសំណង់ និងការផ្គត់ផ្គង់វ៉ាក់សាំងក្នុងតម្លៃសមរម្យ និងធ្វើការចរចាផ្ទាល់ជាមួយក្រុមហ៊ុនផលិតវ៉ាក់សាំងតែម្តង។ លោកហ៊ុន សែន ក៏បានគូសបញ្ជាក់ឱ្យដឹងដែរថា លោកមានគម្រោងចាក់វ៉ាក់សាំងមិនគិតថ្លៃដល់ប្រជាពលរដ្ឋកម្ពុជា៨០% ឫប្រមាណ១៣លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ