លោក ស ខេង បញ្ជាឲ្យអាជ្ញាធរថ្នាក់ក្រោមជាតិពង្រឹងការកំណត់អត្តសញ្ញាណជនក្រីក្រក្នុងអំឡុងកូវីដ១៩
រដ្ឋមន្ត្រីក្រសួងមហាផ្ទៃ លោក ស ខេង នៅថ្ងៃចន្ទនេះ បានចេញលិខិតមួយច្បាប់ប្រាប់ទៅអភិបាលរាជធានី-ខេត្តទាំងអស់ឲ្យពង្រឹងការអនុវត្តការកំណត់អត្តសញ្ញាណកម្មគ្រួសារក្រីក្រទៅតាមការស្នើសុំ ក្នុងអំឡុងពេលនៃការរាលដាលកូវីដ១៩បន្តទៀត។ ការរំឭកយ៉ាងដូច្នេះរបស់ក្រសួងមហាផ្ទៃ គឺស្របពេលដែលរដ្ឋាភិបាលប្រកាសបន្តបើកប្រាក់ឧបត្ថម្ភជុំទី៤ ចំនួន៣ខែបន្ថែមទៀត ដល់ពលរដ្ឋក្រីក្រដែលរងផលប៉ះពាល់ដោយសារកូវីដ១៩។
ចុះផ្សាយនៅថ្ងៃ៖
ស្តាប់ - ០២:០៤
«ត្រូវធ្វើការណែនាំឲ្យបានម៉ឺងម៉ាត់ដល់អាជ្ញាធរមូលដ្ឋាន ជាពិសេស មេភូមិ និងក្រុមប្រឹក្សាឃុំ សង្កាត់ ត្រូវពង្រឹងការបំពេញការកំណត់អត្តសញ្ញាណកម្មគ្រួសារក្រីក្រតាមការស្នើសុំ ក្នុងអំឡុងពេលនៃការរាលដាលកូវីដ១៩នេះឲ្យបានត្រឹមត្រូវ ច្បាស់លាស់ និងខ្ជាប់ខ្ជួនបំផុត។ ត្រូវជៀសវាងឲ្យខាងតែបាននូវការយោគយល់ និងឃុបឃិតគ្នាដើម្បីដាក់បញ្ចូលក្រុមគ្រួសារ សាច់ញាតិ មិត្តភ័ក្ត ឬអ្នកស្គាល់គ្នា ដែលមិនមែនជាគ្រួសារក្រីក្រ និងងាយរងគ្រោះពិតប្រាកដ ដើម្បីទទួលបានប្រាក់ឧបត្ថម្ភនេះ មុនដំណាច់ឆ្នាំ២០២០»។ នេះជាការគូសបញ្ជាក់នៅក្នុងលិខិតមួយច្បាប់របស់លោក ស ខេង ប្រាប់ទៅអភិបាលរាជធានី-ខេត្តទាំងអស់នៅថ្ងៃទី២៨ធ្នូនេះ។
បើតាមក្រសួងមហាផ្ទៃ មានគ្រួសារក្រីក្រជាង៧០ម៉ឺនគ្រួសារឬស្មើនឹង២,៨លាននាក់កំពុងទទួលបានប្រាក់ឧបត្ថម្ភពីរដ្ឋចាប់តាំងពីខែមិថុនាដល់ខែធ្នូឆ្នាំ២០២០នេះ។ ការផ្តល់ប្រាក់ឧបត្ថម្ភដល់ជនក្រីក្រកន្លងមកនេះ ត្រូវបានក្រសួងមហាផ្ទៃចាត់ទុកថា ជាជោគជ័យដែលទទួលបានការគាំទ្រយ៉ាងធំធេងពីពលរដ្ឋ និងដៃគូរអភិវឌ្ឍន៍។
ទន្ទឹមនឹងនេះ រដ្ឋាភិបាលក៏បានប្រកាសថា នឹងបន្តបើកប្រាក់ឧបត្ថម្ភជុំទី៤ចំនួន៣ខែបន្ថែមទៀតគឺខែមករា កុម្ភៈ និងមីនា ឆ្នាំ២០២១ ដើម្បីជួយពលរដ្ឋក្រីក្រដែលរងផលប៉ះពាល់ដោយកូវីដ១៩។តែមួយគ្នានោះ ក្រសួងបានព្រមានចំពោះមន្ត្រីឃុំ សង្កាត់ ណា ដែលបានអនុវត្តមិនប្រក្រតីក្នុងកម្មវិធីឧបត្ថម្ភសាច់ប្រាក់នេះ។
ការព្រមានដូច្នេះរបស់ក្រសួងមហាផ្ទៃ គឺធ្វើឡើងបន្ទាប់ពីប្រមុខរដ្ឋាភិបាល លោក ហ៊ុន សែន នៅថ្ងៃទី២៣ធ្នូ បានសរសេរលើហ្វេសប៊ុករបស់លោកថា ដើម្បីឲ្យការងារធ្វើបច្ចុប្បន្នភាពគ្រួសារក្រីក្រកាន់តែមានប្រសិទ្ធភាព លោកស្នើឲ្យក្រសួងមហាផ្ទៃត្រូវសហការជាមួយក្រសួងពាក់ព័ន្ធនានា និងត្រូវរាយការណ៍ជាបន្ទាន់ ប្រសិនបើរកឃើញថាមានបញ្ហាមិនប្រក្រតីណាមួយកើតឡើង។
ជាមួយគ្នានោះ លោក ហ៊ុន សែន ថែមទាំងព្រមានវិធានការក្តៅ និងមិនលើកលែងជាដាច់ខាតចំពោះអ្នកពាក់ព័ន្ធទាំងអស់ ប្រសិនបើរកឃើញថាមានបញ្ហាមិនប្រក្រតីកើតមានឡើងនៅក្នុង ភូមិឬ ឃុំ-សង្កាត់ ណាមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ