បុណ្យណូអែល៖ ប្រមុខរដ្ឋាភិបាលអំពាវនាវឲ្យប្រជាពលរដ្ឋរក្សាសុវត្ថិភាពក្នុងស្ថានភាពឆ្លងជំងឺកូវីដ១៩
ប្រមុខរដ្ឋាភិបាលកម្ពុជា លោកនាយករដ្ឋមន្រ្តី ហ៊ុន សែន បានចេញមកអំពាវនាវឲ្យពលរដ្ឋមានការប្រុងប្រយ័ត្នខ្ពស់ ក្នុងការរៀបចំពិធីបុណ្យណូអែល នៅក្នុងថ្ងៃនេះ។ ការអំពាវនាវបែបនេះ ក៏ព្រោះតែប្រទេសកម្ពុជា និងសកលលោកជារួម កំពុងប្រឈមនឹងការរាតត្បាតនៃការឆ្លងជំងឺរលាកសួត កូវីដ១៩។
ចុះផ្សាយនៅថ្ងៃ៖
ស្តាប់ - ០១:៤៣
តាមរយៈប្រព័ន្ធបណ្តាញសង្គមហ្វ៊េសប៊ុកផ្ទាល់ខ្លួន នៅព្រឹកថ្ងៃទី២៥ធ្នូនេះ លោកនាយករដ្ឋមន្រ្តី ហ៊ុន សែន បានធ្វើការអំពាវនាវឲ្យប្រជាពលរដ្ឋកម្ពុជាគ្រប់រូប មានការប្រុងប្រយ័ត្ន និងធ្វើយ៉ាងណារក្សាបាននូវសុវត្ថិភាពសុខភាពខ្ពស់ ដើម្បីទប់ស្កាត់ការរីករាលដាលនៃការឆ្លងជំងឺកូវីដ១៩ នាឱកាសពិធីបុណ្យគ្រីស្ទម៉ាស ឬបុណ្យណូអែលនេះ។
ដោយសារតែពិធីបុណ្យណូអែល ជាពិធីបុណ្យធំមួយរបស់សាសនាគ្រឹស្ត លោកនាយករដ្ឋមន្រ្តី ក៏បានណែនាំចំពោះ គ្រឹស្តសាសនិក នៅក្នុងប្រទេសកម្ពុជា កុំឲ្យមានជួបជុំនិងរៀបចំពិធីបុណ្យជាលក្ខណៈអធិកអធម ព្រោះថាប្រទេសកម្ពុជាកំពុងស្ថិតក្នុងស្ថានការណ៍មួយនៃការទប់ស្កាត់ការឆ្លងជំងឺកូវីដ១៩ជាបន្ត។ ដោយជំនួសមកវិញ គ្រឹស្តសាសនិក ត្រូវរៀបចំកម្មវិធីជួបជុំតែជាលក្ខណៈគ្រួសាររៀងៗខ្លួន។ នេះបើតាមលោកនាយករដ្ឋមន្រ្តី
សូមជម្រាបជូនថា នាឱកាសពិធីបុណ្យណូអែលនេះ ក៏ដូចជាពិធីបុណ្យឆ្លងឆ្នាំប៉ុន្មានថ្ងៃខាងមុខ នៅសួនច្បារមុខសណ្ឋាគារ និងកាស៊ីណូ ណាហ្គាវើល បានរៀបចំតុបតែងលម្អជាមួយនឹងដើមឈើសាប៉ាំង និងភ្លើងចម្រុះពណ៌ពាសពេញទីធ្លាសួនសាធារណៈមុខសណ្ឋាគារខ្លួន ដែលធ្វើឲ្យមានសាធារណជនជាច្រើន បានប្រមូលផ្តុំគ្នាទៅថតរូបនៅទីនោះ។ ហើយនេះជាការប្រឈមខ្ពស់ចំពោះការឆ្លងជំងឺកូវីដ១៩ និងខុសពីគោលការណ៍ណែនាំរបស់រដ្ឋាភិបាល ដែលកំណត់មិនឲ្យមានការជួបជុំលើសពី២០នាក់។ គោលការណ៍ណែនាំ ដែលរដ្ឋាភិបាលកំណត់មិនឲ្យមានការជួបជុំជាសាធារណៈលើសពី២០នាក់ ក្នុងន័យទប់ស្កាត់ការរាលដាលនៃជំងឺកូវីដ១៩ កាលពីថ្ងៃទី៣០វិច្ឆិកាកន្លងមក។
គួរបញ្ជាក់ជូនថា ពិធីបុណ្យណូអែលនៅក្នុងឆ្នាំនេះ ត្រូវបានកំណត់ឲ្យរៀបចំដោយមានការប្រុងប្រយ័ត្ន ដើម្បីបង្ការការឆ្លងនៃជំងឺកូវីដ១៩។ ជាទូទៅ ហាងលក់ទំនិញ និងទីតាំងឯកជនជាច្រើនផ្សេងទៀត ក៏បានធ្វើការតុបតែងលម្អសម្ភារណូអែលរៀងៗខ្លួនដែរ បើទោះណា ជាមិនមានសកម្មភាពអបអរពិធីបុណ្យអឺរ៉ុបនេះអ៊ូអរដូចឆ្នាំកន្លងទៅក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ