វិបត្តិកូវីដ១៩៖ រដ្ឋាភិបាលដាក់ចេញគោលនយោបាយ៣ចំណុចដើម្បីស្តារសេដ្ឋកិច្ចកម្ពុជា
រដ្ឋាភិបាលកម្ពុជានឹងដាក់ផែនការ៣ចំណុច ដើម្បីស្តារសេដ្ឋកិច្ច និងបង្កើនការវិនិយោគឡើងវិញក្រោយរងការប៉ះពាល់ដោយសារការរាលត្បាតនៃជំងឺកូវីដ១៩ជាសកល។ ការអះអាងអំពីគោលនយោបាយនេះ គឺធ្វើឡើងបន្ទាប់ពីមានកិច្ចប្រជុំអន្តរក្រសួងអំពីការបញ្ជាទិញនិងផ្តល់វ៉ាក់សាំងកូវីដ១៩ដល់ប្រជាពលរដ្ឋ នៅថ្ងៃទី១៧ធ្នូម្សិលមិញ។
ចុះផ្សាយនៅថ្ងៃ៖
ស្តាប់ - ០២:១០
ផែនការ៣ចំណុចស្តារឡើងវិញនូវសេដ្ឋកិច្ចកម្ពុជា ក្រោយរងការប៉ះពាល់ពីវិបត្តិកូវីដ១៩ រួមមាន ទី១. ការបន្តអនុវត្តគោលនយោបាយចម្រុះ រវាងរូបិយវត្ថុ សារពើពន្ធ និងរចនាសម្ព័ន្ធក្នុងវិស័យម៉ាក្រូសេដ្ឋកិច្ច។ ទី២. ការធ្វើកំណែទម្រង់រចនាសម្ព័ន្ធ និងពង្រីកសក្តានុពល ដើម្បីពង្រឹងការប្រកួតប្រជែងលើទីផ្សារ និងដោះស្រាយបញ្ហារាំងស្ទះនៅក្នុងការធ្វើពិពធកម្មសេដ្ឋកិច្ច។ និងទី៣. ការបង្កើនកំណើនវិនិយោគក្នុងស្រុកបន្ថែម ដោយតាមរយៈការប្រើប្រាស់ប្រព័ន្ធបច្ចេកវិទ្យាឌីជីថល។ យន្តការទាំង៣ ជាគោលនយោបាយសម្រាប់ដោះស្រាយបញ្ហាសេដ្ឋកិច្ចកម្ពុជា ក្រោយវិបត្តិនៃជំងឺកូវីដ១៩។ នេះបើតាមការបញ្ជាក់របស់លោកវង្សី វិស្សុត រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ។
ទន្ទឹមគ្នានេះដែរ លោកបានបន្តថា បច្ចុប្បន្នរដ្ឋាភិបាលក៏បានដាក់នូវវិធានការចំនួន៣ផ្សេងទៀត ក្នុងការធានាដល់សុវត្ថិភាព និងសេដ្ឋកិច្ចប្រជាពលរដ្ឋផងដែរ។ វិធានការទាំង៣នោះមាន ការការពារអាយុជីវិត ការការពារជីវភាពរស់នៅ និងការការពារមុខរបរអាជីវកម្មរបស់ប្រជាពលរដ្ឋ ដើម្បីជាផ្នែករុញសេដ្ឋកិច្ចកម្ពុជាឲ្យងើបឡើងវិញបានឆាប់រហ័ស។
ក្រៅពីការស្តារសេដ្ឋកិច្ចឡើងវិញនេះ វិស័យធនធានមនុស្សក៏ជាចំណុចស្នូលមួយទៀតក្នុងការរុញប្រទេសកម្ពុជាឲ្យឆ្ពោះទៅកាន់គោលដៅក្លាយទៅជាប្រទេសចំណូលមធ្យមកម្រិតខ្ពស់នៅឆ្នាំ២០៣០ បើទោះបីបច្ចុប្បន្នកម្ពុជាកំពុងរងវិបត្តិកូវីដ១៩ក៏ដោយ។ នេះបើតាមការគូសបញ្ជាក់បន្ថែមពីលោក វង្សី វិស្សុត។
សូមជម្រាបជូនថា លោកនាយករដ្ឋមន្រ្តី ហ៊ុន សែន ធ្លាប់បានលើកឡើងក្នុងជំនួបកិច្ចប្រជុំកំពូលអាស៊ីប៉ាហ្វិកលើកទី២ កាលពីឆ្នាំ២០១៩ ថា កម្ពុជានឹងបន្តជម្រុញការខិតខំបន្ថែម ឲ្យធ្វើយ៉ាងណាក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០។
តែអ្នកជំនាញផ្នែកអភិវឌ្ឍន៍របស់ធនាគារពិភពលោក លោក Norman Loayza មើលឃើញថាប្រសិនបើកម្ពុជាចង់ក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ខាងមុខ នោះកម្ពុជាត្រូវការវិនិយោគិនមកវិនិយោគលើវិស័យធនធានមនុស្ស និងវិស័យហេដ្ឋារចនាសម្ព័ន្ធជាចាំបាច់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ