នៅកម្ពុជា៖ ការវាយប្រហារតាមប្រព័ន្ធតេឡេក្រាម ក្លាយជាក្ដីបារម្ភរបស់ក្រសួងប្រៃសណីយ៍និងទូរគមនាគមន៍
ការកើនឡើងនៃការវាយប្រហារតាមប្រព័ន្ធតេឡេក្រាមនៅកម្ពុជា បានក្លាយទៅជាក្ដីបារម្ភថ្មី ដែលតម្រូវឲ្យក្រសួងប្រៃសណីយ៍និងទូរគមនាគមន៍ទាញសញ្ញាអាសន្ន និងរំឭកឲ្យពលរដ្ឋខ្មែរប្រុងប្រយ័ត្ន។ នៅក្នុងសេចក្ដីជូនដំណឹងចុះថ្ងៃទី១៥ខែធ្នូ ក្រសួងនេះគូសបញ្ជាក់ថា ពួកចោរអ៊ីនធឺណែត ឬ Hacker បានវាយប្រហារជនរងគ្រោះ ដោយបន្លំខ្លួនជាថ្នាក់ដឹកនាំក្នុងជួររដ្ឋាភិបាលឬឈ្មោះបុគ្គលផ្សេងទៀត ដើម្បីបញ្ជូនសារតាមប្រព័ន្ធតេឡេក្រាម។
ចុះផ្សាយនៅថ្ងៃ៖
ស្តាប់ - ០២:៣២
អ្នកប្រើប្រាស់ប្រព័ន្ធតេឡេក្រាម Telegram នៅកម្ពុជា កំពុងរងការគំរាមកំហែង ដោយពួកចោរអ៊ីនធឺណែត ឬ Hacker ដែលកំពុងតែវាយលុកជនរងគ្រោះ ដោយបន្លំខ្លួនជាថ្នាក់ដឹកនាំក្នុងជួរដ្ឋាភិបាលឬឈ្មោះបុគ្គលផ្សេងទៀត ដើម្បីបញ្ជូនសារតាមប្រព័ន្ធតេឡេក្រាម។ ពួកចោរអ៊ីនធឺណែត អាចចូលទៅគ្រប់គ្រងកុំព្យូទ័រឬទូរសព្ទរបស់ជនរងគ្រោះ ប្រសិនបើជនរងគ្រោះចុចបើកឯកសារឬកម្មវិធីដែលមានផ្ទុកមេរោគ។ តាមរយៈការបើកឯកសារឬកម្មវិធីដែលមានផ្ទុកមេរោគនោះ ពួកឧក្រិដ្ឋជន ឬ Hacker អាចលួចយកទិន្នន័យនានា ដូចជាឯកសារ លេខកូដសម្ងាត់សម្រាប់កម្មវិធីផ្សេងៗ ព្រមទាំងអាចលួចថតរូបនិងថតសំឡេង ក៏ដូចជាប្រើប្រាស់អត្តសញ្ញាណជនរងគ្រោះទៅបោកបញ្ឆោតអ្នកដទៃទៀត។
ក្នុងន័យនេះ ក្រសួងប្រៃសណីយ៍និងទូរគមនាគមន៍ បានរំឭកឲ្យពលរដ្ឋផ្ទៀងផ្ទាត់និងត្រួតពិនិត្យគណនីរបស់បុគ្គលដែលបានផ្ញើសារមកឲ្យបានច្បាស់លាស់ ជាពិសេសចំពោះសារណាដែលផ្ញើមកជាលើកដំបូង ទោះបីមានរូបភាពនិងឈ្មោះថ្នាក់ដឹកនាំរដ្ឋាភិបាល ឬអ្នកស្គាល់គ្នាក៏ទេដែរ។ ហើយក្នុងករណីសង្ស័យ ត្រូវទូរសព្ទទៅសួរម្ចាស់គណនីដោយផ្ទាល់តែម្ដង មុននឹងឆ្លើយសារតាមតេឡេក្រាម។
គួរបញ្ជាក់ថា ការទាក់ទងតាមបណ្ដាញតេឡេក្រាម បានទទួលការពេញនិយមជាខ្លាំងនៅកម្ពុជា ដោយសារតែភាពងាយស្រួលក្នុងការផ្ញើនិងទទួលសារដោយឥតគិតថ្លៃនិងគ្មានដែនកំណត់។ កម្មវិធីសម្រាប់ផ្ញើសារតាមទូរសព្ទផ្សេងទៀត ដូចជា WhatsApp, WeChat, និង Viber ក៏ទទួលបានការពេញនិយមមិនចាញ់គ្នាដែរ ប៉ុន្តែការឆបោកតាមប្រព័ន្ធតេឡេក្រាម Telegram ហាក់មានសន្ទុះខ្លាំងជាងគេ។
ជាក់ស្ដែង នៅថ្ងៃទី១១ខែធ្នូកន្លងទៅនេះ នាយកដ្ឋានប្រឆាំងបទល្មើសបច្ចេកវិទ្យានៃក្រសួងមហាផ្ទៃ បានជូនដំណឹងអំពីការលួចយកឈ្មោះនិងរូបរបស់លោក នេត សាវឿន អគ្គស្នងការនគរបាលជាតិ និងលោក ឌី វិជ្ជា អគ្គស្នងការរងនគរបាលជាតិ ទៅបង្កើតគណនីតេឡេក្រាម។ ចោរអ៊ីនធឺណែតនោះ បានយកគណនីតេឡេក្រាមនោះ ទៅផ្ញើសារដែលមានតំណភ្ជាប់មេរោគទៅកាន់អង្គភាពជាតិ និងទៅកាន់សាធារណជនជាច្រើននាក់។ នាយកដ្ឋានប្រឆាំងបទល្មើសបច្ចេកវិទ្យាមកទល់ពេលនេះ បានប្រកាសថា គណនីនោះជាគណនីក្លែងក្លាយ និងកំពុងស្វែងរកជនល្មើសមកចាត់វិធានការតាមផ្លូវច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ