HRWអំពាវនាវឲ្យស្ថាប័នផ្តល់កម្ចីអន្តរជាតិស៊ើបអង្កេតកម្ចីនៅកម្ពុជា ដែលប៉ះពាល់សិទ្ធិមនុស្ស
ធនាគារពិភពលោក ឬស្ថាប័នផ្តល់ឥណទានអន្តរជាតិ គួរតែបើកការស៊ើបអង្កេតជុំវិញការលក់ដីដោយបង្ខំ និងការរំលោភបំពានសិទ្ធិមនុស្សផ្សេងទៀត ដែលជាប់ពាក់ព័ន្ធនឹងប្រាក់កម្ចីកេងប្រវ័ញ្ច និងបំណុលវ័ណ្ឌកក្នុងវិស័យមីក្រូហិរញ្ញវត្ថុនៅកម្ពុជា។ នេះគឺជាការអំពាវនាវរបស់អង្គការឃ្លាំមើលសិទ្ធិមនុស្ស Human Rights Watch កាលពីថ្ងៃទី១៤ ខែធ្នូ។ តែអ្នកនាំពាក្យនៃសមាគមមីក្រូហិរញ្ញវត្ថុកម្ពុជាបដិសេធចំពោះការចោទប្រកាន់បែបអវិជ្ជមានទាំងឡាយណា លើវិស័យមីក្រូហិរញ្ញវត្ថុនៅកម្ពុជា។
ចុះផ្សាយនៅថ្ងៃ៖
ស្តាប់ - ០២:៣៧
លោក ហ្វីល រ៉ូបឺតសុន (Phil Robertson) នាយករងប្រចាំតំបន់អាស៊ីនៃអង្គការឃ្លាំមើលសិទ្ធិមនុស្សបានលើកឡើងនៅក្នុងសេចក្តីថ្លែងការណ៍ចេញផ្សាយ កាលពីថ្ងៃទី១៤ ខែធ្នូថា អ្នកផ្តល់ជនួយអន្តរជាតិ ដល់វិស័យមីក្រូហិរញ្ញវត្ថុកម្ពុជា គួរតែឈប់បំប៉ន់ប្រព័ន្ធ ដែលកំពុងរំលោភបំពានសិទ្ធិអ្នកជាប់បំណុល ខណៈដែលពួកគេកំពុងតែរងគ្រោះដោយសារវិបត្តិសុខភាព និងវិបត្តិសេដ្ឋកិច្ច។ លោកបន្តថា សាជីវកម្មហិរញ្ញវត្ថុអន្តរជាតិ(IFC) និងម្ចាស់ជំនួយមីក្រូហិរញ្ញវត្ថុ គួរតែបើកការស៊ើបអង្កេតផ្ទាល់ ដែលមានការណែនាំដោយអ្នកជំនាញសិទ្ធិមនុស្ស។
បញ្ហាបំណុលរបស់ប្រជាពលរដ្ឋនេះ កាន់តែធ្លាក់ទៅរកស្ថានភាពអាក្រក់ទៅនៅពេលដែលកម្ពុជារងគ្រោះដោយជំងឺកូវីដ១៩។ នេះបើតាមសេចក្តីថ្លែងការណ៍របស់អង្គការឃ្លាមើលសិទ្ធិមនុស្សចេញផ្សាយកាលពីថ្ងៃទី១៤ ខែធ្នូ។
តាមរយៈសេចក្តីថ្លែងការណ៍របស់ខ្លួន អង្គការសិទ្ធិមនុស្ស ដែលមានមូលដ្ឋាននៅក្រុងញូយ៉កមួយនេះ បានដកស្រង់របាយការណ៍មួយរបស់ស្ថាប័នជំនាញផ្នែកហិរញ្ញវត្ថុ(MIMOSA)ថា ទំហំនៃកម្ចីក្នុងប្រទេសក៏បានបន្តកើនឡើងជាបន្តបន្ទាប់តាមឆ្នាំ ដែលធ្វើអ្នកជំពាក់បំណុលមិនអាចសងបំណុលដ៏ច្រើនហួសហេតុក្លាយជាបំណុលវ័ណ្ឌក។
លោក ហ្វីល រ៉ូបឺតសុន បានលើកឡើងថា ធនាគារពិភពលោកមិនមែនជាអ្នកថ្មីទេ ដែលជាប់ពាក់ព័ន្ធនឹងការរឹបអូសដីធ្លី និងរំលោភបំពាននៅក្នុងប្រទេសកម្ពុជា ហើយធនាគារនេះគួរតែធ្វើយ៉ាងណាដោះស្រាយការព្រួយបារម្ភទាំងនេះ។
លោក កាំង តុងងី ប្រធាននាយកដ្ឋានទំនាក់ទំនង និងជាអ្នកនាំពាក្យសមាគមមីក្រូហិរញ្ញវត្ថុកម្ពុជាបានលើកឡើងថា ការអំពាវនាវខាងលើរបស់អង្គការសិទ្ធិមនុស្សនេះ មិនមែនជារឿងថ្មីនោះទេ ព្រោះអង្គការនេះបានដកស្រង់នូវរបាយការណ៍ចាស់ពីមុនមកប៉ុណ្ណោះ។ កន្លងមកសមាគមមីក្រូហិរញ្ញវត្ថុក៏ធ្លាប់បានឆ្លើយតបហើយដែរ។ លោកបញ្ជាក់ថា អត្ថបទនេះ គឺបានសរសេរដោយអ្នក ដែលមិនបានយល់ដឹងពីស្ថានភាពហិរញ្ញវត្ថុនៅក្នុងប្រទេសកម្ពុជា។
លោក កាំង តុងងី បានអះអាងទៀតថា អត្ថបទខាងលើនេះ មិនបានមើលឃើញពីការខិតប្រឹងប្រែងរបស់វិស័យមីក្រូហិរញ្ញវត្ថុ ក្នុងពេលដែលកម្ពុជាជួបវិបត្តិកូវីដ១៩នោះទេ។ កន្លងមកវិស័យនេះបានចូលរួមយុទ្ធនាការនានារបស់រដ្ឋាភិបាល ដើម្បីប្រយុទ្ធប្រឆាំងនឹងកូវីដ១៩។
បើតាមលោក កាំង តុងងី ក្នុងពេលកូវីដ១៩ សមាជិករបស់សមាគមមីក្រូហិរញ្ញវត្ថុ ដែលមានជាង១០០ស្ថាប័ន បានរៀបចំឥណទានឡើងវិញ ដល់អតិថិជន រហូតដល់ជាង២៧ម៉ឺននាក់ ដែលមានទំហំជាទឹកប្រាក់ប្រមាណ១ ៣០០លានដុល្លារអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ